ବ୍ରହ୍ମଗିରି,୪ା୬(ଡି.ଏନ.ଏ): ଫନୀ ବାତ୍ୟା ସହାୟତା ପ୍ରଦାନରେ ଅନିୟମିତତା ହୋଇଥିବା ନେଇ ବ୍ରହ୍ମଗିରି ମତ୍ସ୍ୟଜୀବୀ ମହାସଂଘ ପକ୍ଷରୁ ଗୁରୁବାର ତହସିଲ କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା କରାଯାଇଛି। ଏହାସହ ୭ ଦଫା ସମ୍ବନ୍ଧିତ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଛି। ଫନୀରେ ବ୍ରହ୍ମଗିରି ଓ କୃଷ୍ଣପ୍ରସାଦ ଅଞ୍ଚଳରେ କ୍ଷୟକ୍ଷତି ହୋଇଥିବା ବେଳେ ସହାୟତା ପାଇଁ ସରକାରଙ୍କ ନିଷ୍ପତ୍ତି କ୍ରମେ ତଦନ୍ତ ହୋଇଥିଲା। ହେଲେ ଏହି ତଦନ୍ତରେ ବ୍ୟାପକ ଅନିୟମିତତା ହେବାରୁ ଅନେକ ଯୋଗ୍ୟ ହିତାଧିକାରୀ ସହାୟତା ପାଇବାରୁ ବଞ୍ଚତ୍ତ ହୋଇଥିଲେ। ଏ ନେଇ ପ୍ରଶାସନ ନିକଟରେ ଅଭିଯୋଗ କରିବା ପରେ ଉଚ୍ଚପଦାଧିକାରୀମାନେ ଆସି ତଦନ୍ତ କରିଥିଲେ। ଉକ୍ତ ତଦନ୍ତ ତାଲିକାକୁ ପୁରୀ ଜିଲାପାଳ ସ୍ବୀକୃତି ପ୍ରଦାନ କରିବା ସହ ସରକାରଙ୍କଠାରୁ ଅର୍ଥ ମଞ୍ଜୁର ଆଣି ଉଭୟ ବ୍ଲକର ୩୨ ପଞ୍ଚାୟତ ମଧ୍ୟରୁ ୨୮ପଞ୍ଚାୟତର ହିତାଧିକାରୀଙ୍କ ଜମାଖାତାକୁ ଟଙ୍କା ହସ୍ତାନ୍ତର କରିଥିଲେ। କିନ୍ତୁ କୃଷ୍ଣପ୍ରସାଦ ବ୍ଲକର ଅରଖକୁଦା, ମାଣିକା, ଗୋପୀନାଥପୁର ପଣସପଦା ପଞ୍ଚାୟତରେ ଥିବା ହିତାଧିକାରୀଙ୍କ ଜମାଖାତାକୁ ଟଙ୍କା ପଠାଯାଇ ନ ଥିବା ଅଭିଯୋଗ କରିଥିଲେ। ଏ ନେଇ ପୁନର୍ବାର ଆରଆଇ, ଅମିନ ଓ ପିଅନ ତଦନ୍ତ କରି ୧୫ ହଜାର ଯୋଗ୍ୟ ହିତାଧିକାରୀଙ୍କ ମଧ୍ୟରୁ ମାତ୍ର ୯ ହଜାର ହିତାଧିକାରୀ ତାଲିକା ସିଦ୍ଧାନ୍ତ ହୋଇଥିଲା। ତାଲିକା ସାର୍ବଜନୀନ ହେଉ ନ ଥିବାରୁ ହିତାଧିକାରୀମାନେ ଜାଣିପାରୁ ନ ଥିବାରୁ ସେମାନେ ମତ୍ସ୍ୟଜୀବୀ ସଂଘକୁ ଜଣାଇଥିଲେ। ଫଳରେ ସଂଘ ସଭାପତି ସଦାଶିବ ଜେନାଓ ସମ୍ପାଦକ ସୀମାଞ୍ଚଳ ବେହେରାଙ୍କ ନେତୃତ୍ୱରେ ତାଲିକା ସାର୍ବଜନୀନ କରିବା, ହିତାଧିକାରୀଙ୍କ ବ୍ୟାଙ୍କ ଜମାଖାତାକୁ ସଚଳ କରିବା, ତୁରନ୍ତ ପକ୍କାଘର ଯୋଗାଇ ଦିଆଯିବା ଆଦି ୭ଦଫା ଦାବି ନେଇ ତହସିଲ ଅଫିସ ସମ୍ମୁଖରେ ପ୍ରତିବାଦ ସଭା କରିଥିଲେ। ପରେ ସଂଘ ପକ୍ଷରୁ ଏକ ଦାବିପତ୍ର ବ୍ରହ୍ମଗିରି ତହସଲଦାର ନ ଥିବାରୁ ଅତିରିକ୍ତ ତହସିଲଦାର ହେମନ୍ତ ଭାରିମଲ୍ଲଙ୍କୁ ପ୍ରଦାନ କରାଯାଇଛି।
