ଜଳେଶ୍ୱର,୨୩।୧(ସ୍ବ.ପ୍ର.)-ସରକାର ଶିକ୍ଷାର ମାନ ବଢ଼ାଇବା ପାଇଁ ବିଭିନ୍ନ ଯୋଜନା କରୁଥିବା ବେଳେ ବାସ୍ତବ କ୍ଷେତ୍ରରେ ତାହା ଦେଖିବାକୁ ମିଳୁନାହିଁ। ବାଲେଶ୍ୱର ଜିଲାର ଜଳେଶ୍ୱର ଗୋଷ୍ଠୀ ଶିକ୍ଷା ଅଧୀନ ଖୁଆଡ଼ ପଞ୍ଚାୟତ ନୂଆଗାଁ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବ ଯୋଗୁ ଗ୍ରାମବାସୀ ଓ ଅଭିଭାବକମାନେ ଅସନ୍ତୋଷ ପ୍ରକାଶ କରି ବୁଧବାର ଗେଟ୍ରେ ତାଲା ପକାଇଥିଲେ। ଏ ସମ୍ପର୍କରେ ଖବରପାଇ ଏବିଇଓ ଲଲାଟେନ୍ଦୁ ଜେନାଙ୍କ ନିର୍ଦ୍ଦେଶରେ ସିଆର୍ସିସି ରଞ୍ଜନ କୁମାର ବେହେରା ଘଟଣାସ୍ଥଳରେ ପହଞ୍ଚତ୍ ସମସ୍ୟା ସମ୍ପର୍କରେ ଅବଗତ ହୋଇଥିଲେ। ଅଦ୍ୟାବଧି ଶିକ୍ଷକଙ୍କ କ୍ୟାଡର ଲିଷ୍ଟ ପ୍ରକାଶ ପାଇ ନ ଥିବାରୁ ସେଠାରେ ପ୍ରଧାନ ଶିକ୍ଷକ ନିଯୁକ୍ତ ହୋଇପାରିନାହିଁ ଓ ପରିସ୍ଥିତିକୁ ଲକ୍ଷ୍ୟ କରି ଅବିଳମ୍ବେ ଶିକ୍ଷକ ନିଯୁକ୍ତ କରାଯିବାକୁ ପ୍ରତିଶ୍ରୁତି ଦେବା ପରେ ଫାଟକରୁ ତାଲା ଖୋଲାଯାଇଥିଲା।
ନୂଆଗାଁ ପ୍ରାଥମିକ ବିଦ୍ୟାଳୟରେ ୫ଟି ଶ୍ରେଣୀରେ ୮୦ଜଣ ଛାତ୍ରୀଛାତ୍ର ଅଧ୍ୟୟନ କରି ଆସୁଛନ୍ତି ା ୨ ବର୍ଷ ପୂର୍ବରୁ ପ୍ରଧାନ ଶିକ୍ଷକଙ୍କ ମୃତ୍ୟୁ ହୋଇଯାଇଥିବା ବେଳେ ଅଦ୍ୟାବଧି କାହାରିକୁ ନିଯୁକ୍ତି ମିଳିନାହିଁ। ଏବେ ୨ଜଣ ଶିକ୍ଷକ ଦ୍ୱାରା ୫ଟି ଶ୍ରେଣୀ ଚାଲିବା ସମ୍ଭବ ହୋଇପାରୁ ନ ଥିବାରୁ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ଗ୍ରାମବାସୀ ବିଇଓ, ଡିଇଓ ଓ ଜିଲାପାଳଙ୍କୁ ବାରମ୍ବାର ଆବେଦନ, ନିବେଦନ କରିଥିଲେ ସୁଦ୍ଧା ଅଦ୍ୟାବଧି ଶିକ୍ଷକ ନିଯୁକ୍ତ ହୋଇ ନ ଥିବାରୁ ବୁଧବାର ଫାଟକରେ ତାଲା ପକାଇ ଦେଇଥିଲେ। ଛାତ୍ରୀଛାତ୍ର ଓ ୨ଜଣ ଶିକ୍ଷକ ବିଦ୍ୟାଳୟ ଆସି ଗେଟ୍ରେ ତାଲା ପଡ଼ିଥିବା ଦେଖି ସ୍କୁଲ ବାହାରେ ପାଠ ପଢାଇଥିଲେ। ଗ୍ରାମର ପୂର୍ଣ୍ଣଚନ୍ଦ୍ର ସେଠୀ, ରଣଜିତ୍ ଜେନା, ସୁଶାନ୍ତ ବାରିକ, ସଂଜୟ ବାରିକ, ସପନ ଦେ ଓ ସୁଦର୍ଶନ ବେହେରାଙ୍କ ନେତୃତ୍ୱରେ ଏହି ଆନ୍ଦୋଳନ କରାଯାଇଥିଲା।
