ଭୁବନେଶ୍ୱର,୨୭।୪(ବ୍ୟୁରୋ): କରୋନା(କୋଭିଡ-୧୯) ଲକ୍ଡାଉନ ଯୋଗୁ ଅନ୍ୟ ରାଜ୍ୟରେ ଫସି ରହିଥିବା ଶ୍ରମିକମାନେ ଅତିଷ୍ଠ ହୋଇପଡ଼ିଲେଣି। ରିଲିଫ କ୍ୟାମ୍ପରେ ସେମାନଙ୍କୁ ଉପଯୁକ୍ତ ଖାଦ୍ୟ ଓ ଚିକିତ୍ସା ସୁବିଧା ମିଳୁ ନାହିଁ। ମାନସିକସ୍ତରରେ ମଧ୍ୟ ଅନେକେ ଭାଙ୍ଗି ପଡ଼ିଛନ୍ତି। ଲକ୍ଡାଉନ କେବେ ଖୋଲିବ, କାମଧନ୍ଦା ମିଳିବ କି ନାହିଁ, ଏହି ଚିନ୍ତାରେ ଘାରି ହୋଇ ଶ୍ରମିକମାନେ ଘର ମୁହାଁ ହେଉଛନ୍ତି। ସେମାନଙ୍କୁ ରୋକିବା ରାଜ୍ୟ ସରକାରଙ୍କ ପକ୍ଷେ କଷ୍ଟକର ହୋଇ ପଡୁଛି। ଏହି କ୍ରମରେ ୩୮ଜଣ ମତ୍ସ୍ୟଜୀବୀ ଏକ ଡଙ୍ଗାରେ ଚେନ୍ନାଇରୁ ୫ଦିନ ସମୁଦ୍ର ପଥ ଦେଇ ଶନିବାର ଗଞ୍ଜାମ ଜିଲାରେ ପହଞ୍ଚତ୍ଛନ୍ତି। ଲକ୍ଡାଉନ ଥିବାବେଳେ କେଉଁ ପରିସ୍ଥିତିରେ ଶ୍ରମିକମାନେ ଏତେଦୂର ସମୁଦ୍ର ବାଟଦେଇ ଆସିଲେ ସେ ନେଇ ତଦନ୍ତ କରିବାକୁ ରବିବାର ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ନିର୍ଦ୍ଦେଶ ଦେଇଛନ୍ତି। ଉକ୍ତ ଡଙ୍ଗାକୁ ଜବତ କରାଯିବା ସହ ଜଳ ପଥରେ ଆଉ କିଏ ଆସୁଛନ୍ତି କି ନାହିଁ ତାହା ଉପରେ ନଜର ରଖାଯାଇଥିବା ମନ୍ତ୍ରୀ ସୂଚନା ଦେଇଛନ୍ତି।
ଏଠରେ ସୂଚନା ଯୋଗ୍ୟ ଯେ, ୩୮ ମତ୍ସ୍ୟଜୀବୀଙ୍କ ମଧ୍ୟରୁ ୨୯ଜଣ ଓଡ଼ିଶାର ହୋଇଥିବାବେଳେ ୯ଜଣ ଆନ୍ଧ୍ରପ୍ରଦେଶର ବୋଲି ଜଣାପଡ଼ିଛି। ସେମାନେ ଚେନ୍ନାଇରେ ମାଛ ବ୍ୟବସାୟୀ ଭାବେ କାର୍ଯ୍ୟ କରୁଥିଲେ। ୫ଦିନ ଜଳପଥରେ ଯାତ୍ରା କରିବା ପରେ ସେମାନେ ଶନିବାର ଗଞ୍ଜାମ ଜିଲାର ଚିକିଟି ନିକଟରେ ପହଞ୍ଚତ୍ଥିଲେ। ସେହି ମତ୍ସ୍ୟଜୀବୀଙ୍କୁ ଏବେ କ୍ୱାରାଣ୍ଟାଇନରେ ରଖାଯାଇଛି। ସେମାନଙ୍କଠାରେ କରୋନା ଲକ୍ଷଣ ରହିଛି କି ନାହିଁ ସେ ନେଇ ସ୍ବାବ ନମୁନା ପରୀକ୍ଷା କରିବାକୁ ଜିଲା ପ୍ରଶାସନକୁ ପଠାଯାଇଛି।
