୨୦୧୮ରେ ଶ୍ରୀଲଙ୍କା ଦ୍ୱାରା ଆୟୋଜିତ ତ୍ରିରାଷ୍ଟ୍ରୀୟ ଟି୨୦ ସିରିଜ୍ ନିଦାହାସ ଟ୍ରଫି ଫାଇନାଲରେ ବାଂଲାଦେଶ ଓ ଭାରତ ପରସ୍ପରକୁ ଭେଟିଥିଲେ। ବାଂଲାଦେଶ ପକ୍ଷରୁ ଧାର୍ଯ୍ୟ ୧୬୭ ରନ୍ର ଟାର୍ଗେଟକୁ ପିଛା କରି ଭାରତୀୟ ଦଳ ୧୮ ଓଭର ସୁଦ୍ଧା ୫ ଉଇକେଟ ହରାଇ ୧୩୩ ରନ୍ କରିଥିଲା। ଦଳକୁ ଜିତିବା ପାଇଁ ଦୁଇ ଓଭରରେ ୩୪ ରନ୍ ଦରକାର ଥାଏ। କିନ୍ତୁ ଶିଖର ଧାଓ୍ବନ (୧୦), ଅଧିନାୟକ ରୋହିତ ଶର୍ମା (୫୬), ଲୋକେଶ ରାହୁଲ (୨୪), ସୁରେଶ ରାଇନା (୦) ଓ ମନୀଷ ପାଣ୍ଡେ (୨୮) ପ୍ୟାଭିଲିଅନ ଫେରିସାରିଥିଲେ। ସେତେବେଳେ ବ୍ୟାଟିଂ କରୁଥିବା ବିଜୟ ଶଙ୍କର ସଂଘର୍ଷ କରୁଥିଲେ। କିନ୍ତୁ ଦିନେଶ କାର୍ତ୍ତିକ ୧୯ତମ ଓଭରରେ ପେସର ରୁବେଲ ହସନଙ୍କଠାରୁ ଦୁଇ ଲେଖାଏ ଛକା ଓ ଚୌକା ବଳରେ ୨୨ ରନ୍ ଆଦାୟ କରିଥିଲେ। ଅନ୍ତିମ ଓଭରର ପ୍ରଥମ ୪ ବଲରେ କାର୍ତ୍ତିକ ଓ ଶଙ୍କର ୭ ରନ୍ କରିଥିଲେ। ୫ମ ବଲରେ ଶଙ୍କର ଆଉଟ୍ ହୋଇଥିଲେ। ଫଳରେ ଅନ୍ତିମ ବଲରେ ଭାରତକୁ ଜିତିବା ପାଇଁ ଦରକାର ଥିଲା ୫ ରନ୍। ମାତ୍ର ପାର୍ଟ ଟାଇମ ବୋଲର ସୌମ୍ୟ ସରକାରଙ୍କୁ ଛକା ମାରି ଟିମ ଇଣ୍ଡିଆକୁ ମ୍ୟାଚ୍ ଜିତାଇ ଦେଇଥିଲେ କାର୍ତ୍ତିକ। ଏହି ମ୍ୟାଚ୍ର ହାଇଲାଇଟ୍କୁ ଏପର୍ଯ୍ୟନ୍ତ ୟୁଟ୍ୟୁବରେ ୧୩.୨ କୋଟି ୟୁଜର୍ସ ଦେଖିସାରିଲେଣି। ଏହି ଭିଡିଓକୁ ୟୁଟ୍ୟୁବରେ ସବୁଠୁ ଅଧିକ ଥର ଦେଖାଯାଇଥିବା କ୍ରିକେଟିଂ ମୁମେଣ୍ଟ।
