ନୂଆଦିଲ୍ଲୀ,୧୬।୧୨: ନାଗରିକତା ସଂଶୋଧନ ଆଇନ ବିରୋଧରେ ଜାମିଆ ମିଲିଆ ଇସ୍ଲାମିଆରେ ରବିବାର ହୋଇଥିବା ହିଂସା ଓ କ୍ୟାମ୍ପସ୍ରେ ପୋଲିସ ପ୍ରବେଶ ନେଇ ବିଶ୍ୱବିଦ୍ୟାଳୟର କୁଳପତି ସୋମବାର ଏକ ଖବରଦାତା ସମ୍ମିଳନୀ କରିଛନ୍ତି। କୁଳପତି ନଜମା ଅଖତର କହିଛନ୍ତି, ବିନା ଅନୁମତିରେ ପୋଲିସ ବିଶ୍ୱବିଦ୍ୟାଳୟ କ୍ୟାମ୍ପସ୍ରେ ପ୍ରବେଶ କରିଥିଲା। ଏହାପରେ ଛାତ୍ରୀଛାତ୍ରମାନଙ୍କୁ ସେ ଭୟଭୀତ କରାଇବା ସହ ମାରପିଟ୍ କରିଥିଲେ। ଯାହା ଅତ୍ୟନ୍ତ ଦୁଃଖଦାୟକ। ଏଥିସହ ଜାମିଆରେ ଯେଉଁ ୨ଛାତ୍ରଙ୍କ ମୃତ୍ୟୁ ହେବା ନେଇ ଗୁଜବ ଉଠିଛି ତାକୁ ସେ ଖଣ୍ଡନ କରିଛନ୍ତି। ସେ କହିଛନ୍ତି, ଏଠାରେ କୌଣସି ଛାତ୍ରଙ୍କ ମୃତ୍ୟୁ ହୋଇନାହିଁ। କିନ୍ତୁ ପ୍ରଦର୍ଶନ ସମୟରେ ୨୦୦ ଛାତ୍ରୀଛାତ୍ର ଆହତ ହୋଇଥିବା ବେଳେ ବିଶ୍ୱବିଦ୍ୟାଳୟର ବହୁ କ୍ଷତି ହୋଇଛି। ବିଶ୍ୱବିଦ୍ୟାଳୟରେ ବାହାର ଛାତ୍ର ପ୍ରବେଶ କରିବାରୁ ହିଂସା ଉପୁଜିଥିବା ନଜମା ସ୍ବୀକାର କରିଛନ୍ତି। ତେବେ ବିନା ଅନୁମତିରେ ପୋଲିସ ପ୍ରବେଶ ନେଇ ସେ ଏକ ଏଫ୍ଆଇଆର୍ ଦେବା ସହ ଏହି ଘଟଣାର ଉଚ୍ଚସ୍ତରୀୟ ଯାଞ୍ଚ ପାଇଁ ଦାବି କରିଛନ୍ତି।
