ବ୍ରହ୍ମପୁର ଅଫିସ୍,୧୧ା୧୨-ବ୍ରହ୍ମପୁର କେନ୍ଦ୍ରୀୟ ବିଦ୍ୟାଳୟ ଛାତ୍ର ପି.ବିଶ୍ୱନାଥ ପାତ୍ର ତାଙ୍କର ଉଦ୍ଭାବନ ‘ସ୍ମାର୍ଟ ୱାଟର୍ ଡିସ୍ପେନସର୍’କୁ ନେଇ ଏବେ ଚର୍ଚ୍ଚାରେ ରହିଛନ୍ତି । ଜଳ ଅପଚୟ ରୋକିବାରେ ସହାୟକ ଏହି ପ୍ରକଳ୍ପକୁ ରୁଷିଆ ରାଷ୍ଟ୍ରପତି ଭ୍ଲାଡିମିର୍ ପୁଟିନ୍ ପ୍ରଶଂସା କରିଛନ୍ତି। ଏହା ପରଠୁ ବିଶ୍ୱନାଥଙ୍କ ପାଖକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ମଙ୍ଗଳବାର ଏ ନେଇ ‘ଧରିତ୍ରୀ’ରେ ‘ଜଳ ଅପଚୟ ରୋକିବ ସ୍ମାର୍ଟ ୱାଟର୍ ଡିସ୍ପେନସର୍, ବ୍ରହ୍ମପୁର ଛାତ୍ରଙ୍କ ପ୍ରକଳ୍ପକୁ ରୁଷିଆ ରାଷ୍ଟ୍ରପତିଙ୍କ ପ୍ରଶଂସା’ ଶୀର୍ଷକରେ ଏକ ଖବର ପ୍ରକାଶ ପାଇଥିଲା। ଅନ୍ୟପଟେ ମଙ୍ଗଳବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ବିଶ୍ୱନାଥଙ୍କୁ ପ୍ରଶଂସା କରିଛନ୍ତି। ଉଭୟ ଟୁଇଟର୍ ଏବଂ ଫେସ୍ବୁକ୍ରେ ମୁଖ୍ୟମନ୍ତ୍ରୀ ବିଶ୍ୱନାଥଙ୍କ ପାଇଁ ଶୁଭେଚ୍ଛା ବାର୍ତ୍ତା ଲେଖିଛନ୍ତି । ବିଶ୍ୱନାଥଙ୍କ ପ୍ରକଳ୍ପ କିଭଳି ରୁଷିଆ ରାଷ୍ଟ୍ରପତିଙ୍କୁ ପ୍ରଭାବିତ କରିଥିଲା, ସେନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଲ୍ଲେଖ କରିଛନ୍ତି। ସେହିଭଳି ବିଶ୍ୱନାଥଙ୍କୁ କେନ୍ଦ୍ରୀୟ ବିଦ୍ୟାଳୟର ଅଧ୍ୟକ୍ଷ ବିଘ୍ନେଶ୍ୱର ପଟ୍ଟନାୟକ ଏବଂ ଆସିଷ୍ଟାଣ୍ଟ କମିଶନର୍ ଜ୍ୟୋତି କୁମାରଙ୍କ ସମେତ ଅନ୍ୟ ଶିକ୍ଷୟିତ୍ରୀ ଶିକ୍ଷକମାନେ ମଧ୍ୟ ଶୁଭେଚ୍ଛା ଜଣାଇଛନ୍ତି ।
ସୂଚନାଯୋଗ୍ୟ, ‘ନୀତି’ ଆୟୋଗର ଅଟଲ୍ ଇନୋଭେଶନ୍ ମିଶନ୍(ଏଆଇଏମ୍)ରେ ଦେଶବ୍ୟାପୀ ଶ୍ରେଷ୍ଠ ୧୦୦ ପ୍ରକଳ୍ପରେ ସ୍ଥାନ ପାଇଥିଲା। ଏଥିରେ ବିଶ୍ୱନାଥଙ୍କ ‘ସ୍ମାର୍ଟ ୱାଟର୍ ଡିସ୍ପେନ୍ସର୍’ ପ୍ରକଳ୍ପ ସ୍ଥାନୀତ ହୋଇଥିଲା। ପରବର୍ତ୍ତୀ ସମୟରେ ଏହା ଦେଶର ଶ୍ରେଷ୍ଠ ୫୦ ପ୍ରକଳ୍ପରେ ରହିଥିଲା। ଏଣୁ ଭାରତ ତରଫରୁ ପ୍ରତିନିଧିତ୍ୱ କରିବାକୁ ସେ ସୁଯୋଗ ପାଇଥିଲେ। ନଭେମ୍ବର ୨୯ରୁ ଡିସେମ୍ବର ୫ତାରିଖ ପର୍ଯ୍ୟନ୍ତ ରୁଷ୍ର ସୋଚିଠାରେ ଭାରତ ଏବଂ ରୁଷ୍ର ବଛାବଛା ଛାତ୍ରୀଛାତ୍ରଙ୍କୁ ନେଇ ଆୟୋଜିତ ଅନ୍ତର୍ଜାତୀୟ କର୍ମଶାଳାରେ ବିଶ୍ୱନାଥ ଭାରତ ତରଫରୁ ସୁଯୋଗ ପାଇଥିଲେ। ଭାରତରୁ ୨୫ ଛାତ୍ରୀଛାତ୍ର ଏଥିରେ ଭାଗ ନେଇଥିଲେ। ତେବେ ବିଶ୍ୱନାଥଙ୍କ ପ୍ରକଳ୍ପ ରୁଷିଆ ରାଷ୍ଟ୍ରପତି ପୁଟିିନ୍ଙ୍କୁ ପ୍ରଭାବିତ କରିଥିଲା ।
