ଭୁବନେଶ୍ୱର, ୯।୫(ବ୍ୟୁରୋ): କରୋନା ପାଇଁ ସାରା ଦେଶ ଏବେ ଲକ୍ଡାଉନ୍। ଦିନକୁ ଦିନ ସ୍ଥିତି ଜଟିଳ ହୋଇଚାଲିଥିବାବେଳେ ଇତିମଧ୍ୟରେ ଲକ୍ଡାଉନ୍ ଅବଧିକୁ ୩ଥର ବଢ଼ାଯାଇଛି। ଏପରି ସ୍ଥଳେ ପିଲାଙ୍କ ପାଠପଢ଼ା ଗୁରୁତର ବାଧାପ୍ରାପ୍ତ ହୋଇଛି। ନୂଆ ଶିକ୍ଷାବର୍ଷ କେବେ ଆରମ୍ଭ ହେବ ଓ ଆଗକୁ ସ୍କୁଲ ଖୋଲିଲେ ଏତେ ମାତ୍ରାରେ ପିଲା କିପରି ସ୍କୁଲ ଯିବେ ତାହାକୁ ନେଇ ବିକଳ୍ପ ବ୍ୟବସ୍ଥା କରାଯାଉଛି। ନ୍ୟାଶନାଲ୍ କାଉନସିଲ୍ ଅଫ୍ ଏଜୁକେଶନାଲ୍ ରିସର୍ଚ୍ଚ ଆଣ୍ଡ୍ ଟ୍ରେନିଂ(ଏନସିଇଆର୍ଟି) ସ୍କୁଲରେ ଅଡ୍-ଇଭିନ ବ୍ୟବସ୍ଥା ଲାଗୁ କରିବା ପାଇଁ ଯୋଜନା କରୁଛି। ଗୋଟିଏ ସପ୍ତାହରେ ଯୁଗ୍ମ ରୋଲ୍ ନମ୍ବର ଥିବା ଛାତ୍ରୀଛାତ୍ର ସ୍କୁଲ ଆସିବେ ଓ ପର ସପ୍ତାହରେ ଅଯୁଗ୍ମ ରୋଲ୍ ନମ୍ବର ଥିବା ଛାତ୍ରୀଛାତ୍ର ସ୍କୁଲ ଆସିବେ। ଏନେଇ ଖୁବ୍ ଶୀଘ୍ର ଗାଇଡ୍ଲାଇନ ପ୍ରସ୍ତୁତ କରାଯାଇ ମାନବ ସମ୍ବଳ ମନ୍ତ୍ରଣାଳୟକୁ ପଠାଯିବ। ସେଠାରୁ ଅନୁମତି ମିଳିବା ପରେ ସବୁ ରାଜ୍ୟକୁ ପଠାଯିବ। ଯଦି ରାଜ୍ୟ ସରକାର ଚାହିଁବେ ତେବେ ଏହାକୁ ସଂଶୋଧନ କରି ଲାଗୁ କରିପାରିବେ ବୋଲି ଏନ୍ସିଇଆର୍ଟି ନିର୍ଦ୍ଦେଶକ ହୃଷୀକେଶ ସେନାପତି କହିଛନ୍ତି। ସାମାଜିକ ଦୂରତ୍ୱ ଏହି ବ୍ୟବସ୍ଥାର ମୂଳ ଆଧାର ରହିବ। ଯେବେବି ସ୍କୁଲ ଖୋଲିବ ପ୍ରଥମେ ଏହି ବ୍ୟବସ୍ଥା ଲାଗୁ କରିବାକୁ ଯୋଜନା ରଖାଯାଇଛି।
ଏହାଛଡ଼ା ଟିଭି ଚ୍ୟାନେଲଗୁଡ଼ିରେ ପ୍ରସାରଣ ପାଇଁ ସରକାର ‘ଇଚ୍ କ୍ଲାସ୍, ୱାନ୍ ଚାନେଲ୍’ କାର୍ଯ୍ୟକ୍ରମ ପ୍ରସାରଣ କରିବାକୁ ଯୋଜନା କରୁଛନ୍ତି। ଏହି କାର୍ଯ୍ୟକ୍ରମ ପାଇଁ ଏନ୍ସିଇଆର୍ଟି ‘ବିଷୟବସ୍ତୁ ଓ ଲାଇଭ୍ ଇଣ୍ଟରଆକ୍ସନ’ ପାଠ୍ୟକ୍ରମ ମଧ୍ୟ ପ୍ରସ୍ତୁତ କରୁଛି। ଚୂଡ଼ାନ୍ତ ମାର୍ଗଦର୍ଶିକା ମାନବ ସମ୍ବଳ ବିକାଶ ମନ୍ତ୍ରଣାଳୟ ଅନୁମୋଦନ କରିବ ବୋଲି ନିର୍ଦ୍ଦେଶକ ସେନାପତି ସୂଚନା ଦେଇଛନ୍ତି। ସେ କହିଛନ୍ତି ଯେ, ଛାତ୍ରୀଛାତ୍ରଙ୍କ ଶିକ୍ଷା ଗ୍ରହଣରେ କୌଣସି ମତେ ସାଲିସ ନ କରାଯିବା ପାଇଁ ଏହିସବୁ ବ୍ୟବସ୍ଥା କରିବାକୁ ଯୋଜନା କରାଯାଉଛି। ଯୁଗ୍ମ ଅଯୁଗ୍ମ ବ୍ୟବସ୍ଥା ସହ ସପ୍ତାହ ଅଦଳ ବଦଳ ବ୍ୟବସ୍ଥା ଉପରେ ମଧ୍ୟ ବିଚାର କରାଯାଉଛି। ଘରେ ରହୁଥିବା ଦିନ ଛାତ୍ରୀଛାତ୍ରମାନେ କ’ଣ କରିବେ ତାହା ମଧ୍ୟ ଏହି ମାର୍ଗଦର୍ଶିକାରୁ ଜଣାପଡ଼ିବ ବୋଲି ସେନାପତି ପ୍ରକାଶ କରିଛନ୍ତି।
