କୋକସରା, ୭।୨ (ଡି.ଏନ୍.ଏ.)- କଳାହାଣ୍ଡି ଜିଲା କୋକସରା ବ୍ଲକ ଲଡ଼ୁଗଁା ପଁଚେତ୍ ସୁପାଡ଼ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଲୟ ଏହେଦେ ନାନା ସମସିଆ ଘରରେ ରହିଛେ। ପୁରନା କୁଠି ଯାକ ଭଂଗା ଦଦ୍ରା ହେଇ ବିପଦ୍ ଅବସ୍ତାରେ ରହିଛେ। ଇଆଡ଼େ ପଢ଼ାକୁଠି ଅଭାବୁ ୮ଟା ଶ୍ରେଣୀର ୧୧୯ ଛାତ୍ରୀଛାତ୍ର ୨ଟା କୁଠିଥି ବସି ପାଠ୍ ପଢ଼ୁଛନ୍। ଏନ୍ତାଥି ପାଠ୍ପଢ଼ାରେ ଖେଲ୍ଢ଼େପ ହେଉଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ୧୯୫୮ ସାଲେ ଥାପିତ ସୁପାଡ଼ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଲୟରେ ଏହେଦେ ୧ମରୁ ୮ମ ଶ୍ରେଣୀ ତକ୍ ଛାତ୍ରୀଛାତ୍ର ପାଠ୍ପଢ଼ବାର ବେବସ୍ତା ରହିଛେ। ସ୍କୁଲରେ ୧ମରୁ ୮ମ ଶ୍ରେଣୀ ତକ୍ ମୋଟ ୧୧୯ ଛାତ୍ରୀଛାତ୍ର ପାଠ୍ ପଢ଼ୁଛନ୍। ହେଲେ ସ୍କୁଲରେ ଥିବାର ପୁରନା କୁଠି ଯାକ ମରାମତି ଅଭାବୁ ଭଂଗା ଦଦ୍ରା ହେଇ ବିପଦ୍ ଅବସ୍ତାରେ ରହିଛେ। ଏନ୍ତାଥି ଛାତ୍ରୀଛାତ୍ରକଁର ସୁରକ୍ଷା ଦୁରୁଷ୍ଟିରୁ ୨ଟା କୁଠିଥି ବସେଇ ପାଠ୍ ପଢ଼ାଯାଉଥିବାର ସ୍କୁଲର ପ୍ରଧାନ ଶିକ୍ଷକ ପ୍ରହଲ୍ଲାଦ ଠାକୁର କହିଛନ୍। ସେନ୍ତା ସ୍କୁଲ ପରିସରରେ ୨ଟା ନଲ୍ଚୁଅଁା ରହିଛେ। ଗୁଟେ ନଲ୍ଚୁଅଁାକେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ବେଭାର କରୁଥିଲାବେଲେ ଆର ଗୁଟେରୁ ମଏଲା ପାଏନ୍ ବାହାରୁଛେ। ଏନ୍ତାଥି ଛାତ୍ରୀଛାତ୍ର ଘରୁ ପିଇଲା ପାଏନ୍ ଧରିକରି ଆସୁଛନ୍। ସ୍କୁଲରେ ଶୌଚାଲୟ ବେବସ୍ତା ବି ଠିକ୍ ନଁାଇଁନ। ଯେନ୍ଥିରଲାଗି ଛାତ୍ରୀଛାତ୍ର ଅନେକ ସମିଆରେ ହଇରାନ ହରକତ ହେଉଛନ୍। ଇଆଡ଼େ ପଢ଼ାକୁଠି ଅଭାବୁ ୨ଟା କୁଠିଥି ୮ଟା ଶ୍ରେଣୀର ଛାତ୍ରୀଛାତ୍ର ଯଁାକିକୁଁଚି ହେଇ ବସୁଛନ୍। ଗୁଟେ କୁଠିଥି ୩ଟାରୁ ୪ଟା ଶ୍ରେଣୀର ଛାତ୍ରୀଛାତ୍ର ବସବାର ଲାଗି ପାଠ୍ପଢ଼ା ଠିକ୍ଭାବେ ନାଇଁ ହେଇପାରବାର। ସେନ୍ତା ସ୍କୁଲରେ ରଁଧାଘର ଅଭାବୁ ଗୁଟେ ଭଂଗା କୁଠିଥି ରଁଧାବଢ଼ା କରବାର ସଂଗେ ନୂତନ କୁଠା ବାରନ୍ଡାରେ ଛାତ୍ରୀଛାତ୍ରକୁଁ ଖାଏବାକେ ଦିଆଯାଉଛେ। ଇଆଡ଼େ କୁଠାମାନକର ଅବସ୍ତା ଦେଖି ଅଭିଭାବକମାନେ ବି ନିଜର ପିଲାଛୁଆକୁ ସ୍କୁଲ ଛାଡ଼ବାକେ ଡରୁଛନ୍। ଇ ବାବ୍ଦେ ବିଭାଗୀୟ କତୁରପକ୍ଷକୁଁ ନୂତନ କୁଠା ତିଆରି ଲାଗି ଗଁାବାସୀ ବାରବାର ଦାବି କରି ନିରାଶ ହେଇଥିବାର ଅଭିଯୋଗ କରିଛନ୍। ଇ ବାବ୍ଦେ ସିଆର୍ସିସି ଜୟଶଙ୍କର ପାଠେକୁଁ ପଚ୍ରାଲାରୁ ବିପଦ୍ ଅବସ୍ତାରେ ଥିବାର କୁଠିମାନ୍କେ ଛୁଆକୁ ବସେଇ ପଢ଼ାବାକେ ମନା କରାଯାଇଛେ। ନୂତନ କୁଠା ତିଆରି ଲାଗି ପଞ୍ଚାୟତି ରାଜ ବିଭାଗକେ କୁହାଯାଇଛେ ବଲି ସେ କହିଥିଲେ। ସେନ୍ତା ଇ ବାବ୍ଦେ ଲଡୁଗଁା ସରପଁଚ୍ କହ୍ନେଇ ଚରଣ ଦାସକୁଁ ପଚ୍ରାଲାରୁ ଅନୁଦାନ ଆଏଲେ ନୂତନ କୁଠା ତିଆରି କରାଯିବା ବଲି କହିଥିଲେ।
