ବାଲେଶ୍ୱର ଅଫିସ, ୨୩।୨-ବାଲେଶ୍ୱର ପୌରାଞ୍ଚଳର ବିଭିନ୍ନ ୱାର୍ଡ଼ରେ ମୁଖ୍ୟ ରାସ୍ତାଗୁଡ଼ିକର ଦୁରବସ୍ଥା ପାଇଁ ସହରବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତୁରନ୍ତ ରାସ୍ତାଗୁଡ଼ିକର ମରାମତି ଏବଂ ନବୀକରଣ କରାଯିବା ପାଇଁ ଗୁରୁବାର ନଗର ଭାଜପା ପକ୍ଷରୁ ପୌରପାଳ ନିର୍ବାହୀ ଅଧିକାରୀ ଅମ୍ରିତ ସରକାରଙ୍କ ଜରିଆରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି। ମୁଖ୍ୟତଃ ୪୧ଟି ରାସ୍ତା କାର୍ଯ୍ୟର ଯୁଦ୍ଧକାଳୀନ ଭିତ୍ତିରେ କାର୍ଯ୍ୟାଦେଶ ବଣ୍ଟନ କରି କାର୍ଯ୍ୟ ଆରମ୍ଭ କରା ନ ଗଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି।
ସହରରେ ବେହାଲ ହୋଇପଡ଼ିଥିବା ରାସ୍ତାଗୁଡ଼ିକୁ ମରାମତି ପାଇଁ ସଦର ବିଧାୟକ ମଦନମୋହନ ଦତ୍ତଙ୍କ ପ୍ରୟାସ କ୍ରମେ ବାରମ୍ବାର ସରକାରୀ ସମୀକ୍ଷା କରି ୨୦୧୯-୨୦ ଆର୍ଥତ୍କ ବର୍ଷରେ ଉଭୟ କେନ୍ଦ୍ର ଓ ରାଜ୍ୟରୁ ଆସିଥିବା ଅର୍ଥରେ ମରାମତି କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ଜିଲାପାଳଙ୍କ ଦ୍ୱାରା ଟେଣ୍ଡର କାର୍ଯ୍ୟ ସମ୍ପାଦନ କରିଥିଲେ। ଗତ ଜାନୁୟାରୀ ୩ ତାରିଖରେ ପତ୍ର ସଂଖ୍ୟା ନଂ. ୩୦ରେ ୪୧ଟି ରାସ୍ତାର ମରାମତି ପାଇଁ ୪ କୋଟିରୁ ଊର୍ଦ୍ଧ୍ୱ ଟଙ୍କାର ଟେଣ୍ଡର ପୌରପାଳିକା ଦ୍ୱାରା ଆଗତ ହୋଇଥିଲା। ମାତ୍ର ଅଦ୍ୟାବଧି ଉକ୍ତ ଟେଣ୍ଡର ପାଇଁ କାର୍ଯ୍ୟାଦେଶ ବଣ୍ଟନ ନ କରି କର୍ତ୍ତୃପକ୍ଷ ବିଳମ୍ବ କରୁଥିବା ଅଭିଯୋଗ ହୋଇଛି। କାର୍ଯ୍ୟାଦେଶ ବଣ୍ଟନ କରିବା ସହ ତୁରନ୍ତ କାର୍ଯ୍ୟାରମ୍ଭ ପାଇଁ ଏକ ପ୍ରତିନିଧି ଦଳ ପୌରପାଳିକା ନିର୍ବାହୀ ଅଧିକାରୀଙ୍କୁ ଭେଟି ସମସ୍ତ ଟେଣ୍ଡର ପେପର ଖୋଲି ଅବିଳମ୍ବେ କାର୍ଯ୍ୟାଦେଶ ଦିଆଯିବା ସହ ଯୁଦ୍ଧକାଳୀନ ଭିତ୍ତିରେ ମ୍ୟୁନିସିପାଲିଟିର ରାସ୍ତାଘାଟ ନିର୍ମାଣ, ନାଳ ନର୍ଦ୍ଦମାର ମରାମତି, ସୁଇପରମାନଙ୍କର ସମସ୍ୟାର ସମାଧାନ, ଷ୍ଟ୍ରିଟ୍ଲାଇଟ୍ର ମରାମତି କରି ନିରବଚ୍ଛିନ ଆଲୋକ ପ୍ରଦାନ, ହରିଶ୍ଚନ୍ଦ୍ର ଯୋଜନାରେ ହିତାଧିକାରୀଙ୍କୁ ଅର୍ଥ ପୈଠ ବ୍ୟବସ୍ଥା, ଅନୁମୋଦିତ ହୋଇ ପଡ଼ିରହିଥିବା ମଧୁବାବୁ ଭତ୍ତା ତୁରନ୍ତ ପ୍ରଦାନ, ଭୂମିହୀନଙ୍କୁ ୪ ଡିସିମିଲ୍ରୁ କମ୍ ମିଳିଥିବା ଜାଗାକୁ ବୈଠକ କରି ପୁନର୍ବାର ଜମି ପ୍ରଦାନ କରାଯିବା ନେଇ ଆଲୋଚନା କରିଥିଲେ। ବିଧାୟକ ପ୍ରତିନିଧି ସୀତାକାନ୍ତ ସ୍ବାଇଁ, ସୁଜିତ ଦେବ, ଗୌରାଙ୍ଗ ଦାସ, ଗଙ୍ଗାଧର ରାଉତ, ଅନନ୍ତ ନାୟକ, ଯୋଗେନ ରଣା, ଦିପୁ ପିରି, ଲୋକନାଥ ଭୂୟଁ।, ଉପେନ୍ଦ୍ର ଶତପଥୀ, ବିବେକ ମହାନ୍ତି, ତରୁଣ ବର୍ଦ୍ଧନ, ମନ୍ମଥ ପାତ୍ର, ଧୀରଜ ମହାନ୍ତି, କୌସିକ ଚାନ୍ଦ, ପଙ୍କଜ ମହାନ୍ତି, ମହୁଆ ପ୍ରଧାନ, ସଂଯୁକ୍ତା ମହାପାତ୍ର, ସସ୍ମିତା ଦାଶ, ଶ୍ରୀୟା ଦାସ, ଅରୁପ ଜେନା, ଦିଲୀପ ମାଝି, ଭାଗ୍ୟରଞ୍ଜନ ନାୟକ, ରାକେଶ ପାଢୀ, ସଞ୍ଜୀବ ପ୍ରଧାନ, ଭାସ୍କର ମାଝି ଓ ଶୋଭାକର ସାହୁ ପ୍ରମୁଖ ଆଲୋଚନାରେ ସାମିଲ ଥିଲେ। ଆଗାମୀ ୧୫ଦିନ ମଧ୍ୟରେ ଉକ୍ତ ଦାବିଗୁଡ଼ିକ ପୂରଣ ନ ହେଲେ ମ୍ୟୁନିସିପାଲିଟି ଅଫିସ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଘେରାଉ କରାଯିବ ବୋଲି ଭାଜପା ନଗର ମଣ୍ଡଳ ସଭାପତି ଚିତ୍ତରଞ୍ଜନ ପଣ୍ଡା ଚେତାବନୀ ଦେଇଛନ୍ତି।
