ନାନ୍ନିଂ(ଚାଇନା), ୨୬।୫(ଏଏଫ୍ପି)-ବିଶ୍ୱର ଶୀର୍ଷ ର଼୍ୟାଙ୍କିଙ୍ଗପ୍ରାପ୍ତ ପୁରୁଷ ସିଙ୍ଗଲ୍ସ ଖେଳାଳି କେଣ୍ଟୋ ମୋମୋଟାଙ୍କ ବିପକ୍ଷରେ ଶି ୟୁକିଙ୍କ ଚମକପ୍ରଦ ବିଜୟ ହାସଲ କରିଥିବା ବେଳେ ଚାଇନା ୧୧ତମ ସୁଦିରମାନ କପ୍ ଟାଇଟଲ ଜିତିଛି। କଦାପି ବିଶ୍ୱର ଦଳଗତ ବ୍ୟାଡ୍ମିଣ୍ଟନ ଟୁର୍ନାମେଣ୍ଟ ଜିତି ପାରି ନ ଥିବା ଜାପାନ ୦-୩ ବ୍ୟବଧାନରେ ଫାଇନାଲରେ ଚାଇନାଠାରୁ ପରାଜୟ ବରଣ କରିଛି। ପୁରୁଷ ଡବଲ୍ସ ଓ ମହିଳା ସିଙ୍ଗଲ୍ସ ବର୍ଗରେ ପରାଜୟ ପରେ ଜାପାନକୁ ମ୍ୟାଚ୍ରେ ତିଷ୍ଠି ରହିବା ଲାଗି ପୁରୁଷ ସିଙ୍ଗଲ୍ସରେ ନିଶ୍ଚିତ ବିଜୟ ଆବଶ୍ୟକତା ଥିଲା। ବିଶ୍ୱର ଶୀର୍ଷ ର଼୍ୟାଙ୍କଧାରୀ ମୋମୋଟା ଦ୍ୱିତୀୟ ର଼୍ୟାଙ୍କ ଶି ୟୁକିଙ୍କ ବିପକ୍ଷରେ ଗତ ୫ ମ୍ୟାଚ୍ରେ ୪ ଥର ଜିତା ପଟ ହାସଲ କରିଛନ୍ତି। ହେଲେ ୨୪ ବର୍ଷୀୟ ମୋମୋଟା ଏଥର ବିଫଳ ହୋଇଥିଲେ। ସେ ୨୧-୧୫, ୫-୨୧, ୧୧-୨୧ ଗେମ୍ରେ ପରାସ୍ତ ହୋଇଥିଲା। ବ୍ୟାଡ୍ମିଣ୍ଟନର କ୍ରୀଡ଼ା ମହାଶକ୍ତି ଚାଇନା ଗତ ଦୁଇ ବର୍ଷ ତଳେ ଫାଇନାଲରେ ଦକ୍ଷିଣ କୋରିଆଠାରୁ ପରାସ୍ତ ହୋଇଥିଲା।
