ଯାଜପୁର ଅଫିସ,୧୦।୧୨: ଯାଜପୁର ଜିଲା ସୁକିନ୍ଦା ବ୍ଲକ ଖଣି ପ୍ରଭାବିତ ଅଞ୍ଚଳରେ ଜିଲା ଖଣିଜ ପ୍ରତିଷ୍ଠାନ(ଡିଏମ୍ଏଫ୍) ପାଣ୍ଠିରେ ନିର୍ମାଣାଧୀନ ମେଗା ଜଳ ଯୋଗାଣ ପ୍ରକଳ୍ପରେ ବ୍ୟାପକ ହେରାଫେରି ହେଉଛି। ଗତ ଜୁଲାଇରେ ଇଞ୍ଜିନିୟର୍ସ ଅଥରିଟି ପକ୍ଷରୁ ହୋଇଥିବା ତଦନ୍ତ ରିପୋର୍ଟରେ ଏହା ଜଳ ଜଳ ଦିଶୁଛି। ଇଞ୍ଜିନିୟର୍ସ ଅଥରିଟି ରିପୋର୍ଟକୁ ଅଣଦେଖା କରି ପୁଣି ନିମ୍ନମାନର କାର୍ଯ୍ୟ ହେବା ସହିତ ତ୍ରୁଟି ସୁଧାର ଦିଗରେ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ। ଅପରପକ୍ଷେ ଇଞ୍ଜିନିୟର୍ସ ଅଥରିଟି ରିପୋର୍ଟ ଭୁଲ ଥିଲା ବୋଲି ଅନ୍ୟ ଏକ ପରୀକ୍ଷାଗାରରେ ପରୀକ୍ଷା କରି ନିମ୍ନମାନର ନିର୍ମାଣ ସାମଗ୍ରୀକୁ ପୁଣି ବ୍ୟବହାର ଉପଯୋଗୀ ବୋଲି ଦର୍ଶାଯାଇଛି। ଯଦି ଇଞ୍ଜିନିୟର୍ସ ଅଥରିଟି ଭୁଲ ରିପୋର୍ଟ ଦେଇଥିଲା ତେବେ ତାହା ବିରୋଧରେ କୌଣସି ଆଇନଗତ ଚ୍ୟାଲେଞ୍ଜ କରିବାକୁ ଗ୍ରାମ୍ୟ ଜଳ ଯୋଗାଣ ଓ ପରିମଳ(ଆରଡବ୍ଲ୍ୟୁଏସ୍ଏସ୍) ବିଭାଗ କାହିଁକି ପଛଘୁଞ୍ଚା ଦେଉଛି ବୋଲି ପ୍ରଶ୍ନବାଚୀ ସୃଷ୍ଟି ହୋଇଥିଲା। ଏହି ମର୍ମରେ ଧରିତ୍ରୀରେ ୯ା୧୨ା୨୦୧୯ରେ ‘ସୁକିନ୍ଦା ମେଗା ଜଳଯୋଗାଣ ପ୍ରକଳ୍ପ: ନିମ୍ନମାନର କାର୍ଯ୍ୟକୁ ବିଭାଗୀୟ ଅନୁକମ୍ପା’ ଶୀର୍ଷକ ଖବର ପ୍ରକାଶ ପାଇବା ପରେ ସୋମବାର ବିଭାଗୀୟ ତପତ୍ରତା ପ୍ରକାଶ ପାଇଛି। ଆରଡବ୍ଲ୍ୟୁଏସ୍ଏସ୍ ଇଞ୍ଜିନିୟର-ଇନ୍-ଚିଫ୍ ବିଭାଗର ମିଡିଆ ସେଲ୍ ସୁପରିଟେଣ୍ଡିଂ ଇଞ୍ଜିନିୟର (ଏସ୍ଇ) ତୁରନ୍ତ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରି ସମସ୍ୟାର ସମାଧାନ କରିବା ସହିତ ୭ଦିନ ମଧ୍ୟରେ ସବିଶେଷ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
ଜିଲା ଖଣିଜ ପ୍ରତିଷ୍ଠାନ (ଡିଏମ୍ଏଫ୍) ପାଣ୍ଠିରୁ ସୁକିନ୍ଦା ମେଗା ଜଳଯୋଗାଣ ପ୍ରକଳ୍ପ ପାଇଁ ୭୯.୫୬ କୋଟି ଟଙ୍କା ମଞ୍ଜୁର ହୋଇଛି। ଖଣି ସଂଲଗ୍ନ ଅଞ୍ଚଳଠାରୁ ୧୦ କି.ମି. ପରିଧି ମଧ୍ୟରେ ଥିବା ଦୁଧୁଯୋରୀ, କୁହିକା, କାଙ୍କଡପାଳ, ରାସୋଁଳ, କାଳିଆପାଣି, ଚିଙ୍ଗୁଡିପାଳ, କଅଁସ, ପିମ୍ପୁଡିଆ ପ୍ରଭୃତି ପଞ୍ଚାୟତର ୫୪ ଗ୍ରାମର ଅଧିବାସୀ ଏଥିରେ ଉପକୃତ ହେବେ ବୋଲି ପରିକଳ୍ପନା କରାଯାଇଛି। ଖଣି ଅଞ୍ଚଳର ବିଭିନ୍ନ ସ୍ଥାନରେ ଭୂତଳ ଜଳରେ ଅଧିକ ମାତ୍ରାରେ ଆଇରନ ମାତ୍ରା ଥିବା ପୂର୍ବରୁ ସରକାରୀ ଭାବେ ପ୍ରମାଣିତ ହୋଇଛି। ଏଥିପାଇଁ ସମ୍ପୃକ୍ତ ଅଞ୍ଚଳରେ କିଡ୍ନୀ ରୋଗର ଭୟାବହତା ମଧ୍ୟ ଦେଖାଦେଇଛି। ଏହି ସ୍ଥିତିରେ ବ୍ରାହ୍ମଣୀ ନଦୀଗର୍ଭରୁ ପାଇପ ଯୋଗେ ଜଳଯୋଗାଣ ପ୍ରକଳ୍ପ ଖଣି ପ୍ରଭାବିତ ଲୋକଙ୍କ ପାଇଁ ଜୀବନଦାନ ସଦୃଶ ହେବ ବୋଲି ଆଶା କରାଯାଇଛି। କିନ୍ତୁ ସମ୍ପୃକ୍ତ ଠିକାସଂସ୍ଥା ଏନସିସି(ନାଗାର୍ଜୁନ କନଷ୍ଟ୍ରକ୍ସନ କମ୍ପାନୀ) ଲିଃ ଅଧିକ ଲାଭ ଆଶାରେ ଅତି ନିମ୍ନମାନର କାର୍ଯ୍ୟ କରୁଥିବା ଖୋଦ୍ ଇଞ୍ଜିନିୟର୍ସ ଅଥରିଟି ରିପୋର୍ଟରେ ଦର୍ଶାଯାଇଛି। ତେବେ ଏ ସଂକ୍ରାନ୍ତରେ ସୋମବାର ପ୍ରକାଶିତ ଖବର ପରେ ବିଭାଗୀୟ ତପତ୍ରତା ପ୍ରକାଶ ପାଇଛି। ପୂର୍ବରୁ ଶ୍ୟାମ ଷ୍ଟିଲ ସାମଗ୍ରୀ ନିମ୍ନମାନର ଏବଂ ବ୍ୟବହାର ଅନୁପଯୋଗୀ ବୋଲି ଦର୍ଶାଇ ପୁଣି ପରବର୍ତ୍ତୀ ସମୟରେ କାହାର ଚାପରେ ସେହି ଷ୍ଟିଲ ସାମଗ୍ରୀକୁ ବ୍ୟବହାର ଉପଯୋଗୀ ବୋଲି ବିଭାଗୀୟ ନିର୍ଦ୍ଦେଶ ହୋଇଛି। ଏଭଳିସ୍ଥିତିରେ ବର୍ତ୍ତମାନ ବିଭାଗୀୟ ତପତ୍ରତା କେତେଦୂର କାର୍ଯ୍ୟକାରୀ ହେଉଛି ତାହା ସାଧାରଣରେ ଆଶଙ୍କା ପ୍ରକାଶ ପାଇଛି। ମିଡିଆ ସେଲର ଏସଇ ତାଙ୍କ ପତ୍ରସଂଖ୍ୟା ୧୦୪୮୪/୯ା୧୨ା୨୦୧୯ରେ ପ୍ରକଳ୍ପର ଅନିୟମିତତା ସଂକ୍ରାନ୍ତରେ ଆବଶ୍ୟକ ପଦକ୍ଷେପ ଗ୍ରହଣ କରି ୭ ଦିନ ମଧ୍ୟରେ ସରକାରଙ୍କୁ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।
