ଛତ୍ରପୁର,୮ା୧(ଡି.ଏନ.ଏ)-ଗଞ୍ଜାମ ଜିଲା ପାଇଁ ପ୍ରସ୍ତୁତ ସିଜେଡ୍ଏମ୍ପି (ଉପକୂଳ ଜୋନ୍ ପରିଚାଳନା ପ୍ଲାନ୍) ଡ୍ରାଫ୍ଟ ନେଇ ମଙ୍ଗଳବାର ଛତ୍ରପୁରସ୍ଥିତ ଜିଲାପାଳଙ୍କ ସମ୍ମିଳନୀ ଗୃହରେ ଜନଶୁଣାଣି ହୋଇଥିଲା ା ଏଥିରେ ଅତିରିକ୍ତ ଜିଲାପାଳ କବୀନ୍ଦ୍ର କୁମାର ସାହୁ ଅଧ୍ୟକ୍ଷତା କରିଥିଲେ। ପାଲୁର ସାଏବ କେନାଲ ଓ ଆଖପାଖ ଅଞ୍ଚଳରେ ଚାଲିଥିବା ବେଆଇନ୍ ଚିଙ୍ଗୁଡ଼ି ଚାଷ ଏବଂ ଚିଲିକାରୁ ବେଆଇନ୍ ଚିଙ୍ଗୁଡି ଘେରି ଉଚ୍ଛେଦ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୈଠକରେ ଅତିରିକ୍ତ ଜିଲାପାଳ ନିର୍ଦ୍ଦେଶ ଦେଇଛନ୍ତି। ୨୦୧୮ରେ ସରକାରୀ ଜମିରୁ ବେଆଇନ ଚିଙ୍ଗୁଡ଼ି ଘେରି ଉଚ୍ଛେଦ କରାଯାଇଥିଲା ା ୨୦୧୯ରେ ଜିଲାପାଳଙ୍କ ନିର୍ଦ୍ଦେଶକ୍ରମେ ଏହାର ସର୍ଭେ ହୋଇଥିଲା ା ତେବେ ଆଉ ବେଆଇନ୍ ଚିଙ୍ଗୁଡ଼ି ଘେରି କାହିଁକି ଉଚ୍ଛେଦ କରାଯାଇନି ବୋଲି ଅତିରିକ୍ତ ଜିଲାପାଳ ପ୍ରଶ୍ନ କରିଥିଲେ ା ଏ ସମ୍ପର୍କିତ ୩ଟି ମାମଲାରେ ହାଇକୋର୍ଟ ପକ୍ଷରୁ ସ୍ଥଗିତାଦେଶ ରହିଛି ା ସ୍ଥଗିତାଦେଶ ଉଠାଇବା ପାଇଁ ହାଇକୋର୍ଟରେ ପ୍ରାର୍ଥନା ପିଟିଶନ ଦାଖଲ କରିବାକୁ ଅତିରିକ୍ତ ଜିଲାପାଳ କହିଥିଲେ ା ସିଜେଡ୍ଏମପି ଡ୍ରାଫ୍ଟକୁ ମଞ୍ଜୁରୀ ମିଳିଥିଲା। ଏହାକୁ ରାଜ୍ୟ ସରକାରଙ୍କୁ ପଠାଯିବ ା ଏହି ନିୟମ ଅନୁସାରେ ସମୁଦ୍ର କୂଳରୁ ୨୦୦ ମିଟର ଓ ଜୁଆରିଆ ନଦୀଠାରୁ ୫୦ ମିଟର ମଧ୍ୟରେ କୌଣସି ନୂଆ ନିର୍ମାଣ କାର୍ଯ୍ୟ ହେବନି ା ଏଥିରେ ଖିଲାପ କଲେ ଆଇନ୍ ଅନୁଯାୟୀ ଦଣ୍ଡିତ ହେବେ ବୋଲି କୁହାଯାଇଥିଲା। ବୈଠକରେ ଛତ୍ରପୁର ଉପଜିଲାପାଳ ପ୍ରିୟ ରଞ୍ଜନ ପୃଷ୍ଟି, ବ୍ରହ୍ମପୁର ଡିଏଫଓ ଅମ୍ଳାନ ନାୟକ, ଛତ୍ରପୁର ବିଡିଓ ଅମ୍ବିକା ପ୍ରସାଦ ଦାଶ, ତହସିଲଦାର ନୀଳମାଧବ ଭୋଇ, କନିଷି ଓ ଗଞ୍ଜାମ ତହସିଲଦାର, ଜିଲା ମତ୍ସ୍ୟ ଅଧିକାରୀ, ବିଭିନ୍ନ ବିଭାଗର ଅଧିକାରୀ, ନୂଆ ବକ୍ସପଲ୍ଲୀ ଗାଁର କେ. ପୁରୁଷୋତ୍ତମ, ଗୋଖରକୁଦାର ବି. ସିମାଦ୍ରୀଙ୍କ ସମେତ କମିଟିର ସଦସ୍ୟ ଉପସ୍ଥିତ ଥିଲେ ା
