ପୁରୀ ଅଫିସ,୨୯।୨: ନାଗରିକତ୍ୱ ସଂଶୋଧିତ ଆଇନ (ସିଏଏ)କୁ ନେଇ ଜଳୁଛି ଦିଲ୍ଲୀ। ସପକ୍ଷ ଏବଂ ବିପକ୍ଷବାଦୀଙ୍କ ମଧ୍ୟରେ ସଂଘର୍ଷ ଫଳରେ ୪୦ରୁ ଊର୍ଦ୍ଧ୍ୱ ଲୋକଙ୍କ ଜୀବନ ଯାଇଛି। ବିଭିନ୍ନ ସ୍ଥାନରେ ସିଏଏ ସମର୍ଥକ ଏବଂ ବିରୋଧୀ ମୁହଁ।ମୁହିଁ ହେଉଛନ୍ତି। ତେବେ ଏଭଳି ସ୍ଥଳେ ସିଏଏ ସମର୍ଥନରେ ୪୫୦ କିମି ତ୍ରିରଙ୍ଗା ପଦଯାତ୍ରା କରିଛନ୍ତି ଜଣେ ଯୁବକ। ଝାରସୁଗୁଡ଼ା ଜିଲା ବ୍ରଜରାଜନଗରରୁ ତ୍ରିରଙ୍ଗା ପଦଯାତ୍ରାରେ ବାହାରିଥିବା ଯୁବକ ରବି କୁମାର ସୋନି ଶୁକ୍ରବାର ପୁରୀରେ ପହଞ୍ଚତ୍ଛନ୍ତି। ପୂର୍ବାହ୍ନରେ ସେ ଏଠାରେ ପହଞ୍ଚିବା ପରେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ଦର୍ଶନ କରି ତାଙ୍କ ପଦଯାତ୍ରା ଶେଷ କରିଛନ୍ତି। ଓଡ଼ିଶା ୟୁଥ୍ ଏଗ୍ନେଷ୍ଟ କରପ୍ସନର ସଂଯୋଜକ ଥିବା ରବିକୁମାର ଗତ ୧ ତାରିଖରୁ ବ୍ରଜରାଜନଗରର ମା’ ରାମଚଣ୍ଡୀ ଶକ୍ତିପୀଠରୁ ଏହି ପଦଯାତ୍ରା ଆରମ୍ଭ କରିଥିଲେ। ସିଏଏକୁ ସମର୍ଥନ, ଭ୍ରଷ୍ଟାଚାରକୁ ବିରୋଧ ଏବଂ ତୃତୀୟ ଲିଙ୍ଗଙ୍କୁ ଆରକ୍ଷଣ ଦାବି କରି ସେ ଏହି ପଦଯାତ୍ରାରେ ବାହାରିଥିଲେ। ୨୮ ଦିନରେ ୪୫୦ କିମି ଯାତ୍ରା କରି ପୁରୀରେ ପହଞ୍ଚତ୍ଛନ୍ତି। ଏହି ସମୟରେ ସେ ୭ଟି ଜିଲା (ଝାରସୁଗୁଡା, ସମ୍ବଲପୁର, ଅନୁଗୋଳ, ଢେଙ୍କାନାଳ, କଟକ, ଖୋର୍ଦ୍ଧା ଓ ପୁରୀ)କୁ ଅତିକ୍ରମ କରିବା ସହ ବିଭିନ୍ନ ସ୍ଥାନରେ ଲୋକଙ୍କୁ ସଚେତନ କରିବା ସହ ସେମାନଙ୍କଠାରୁ ଦସ୍ତଖତ ସଂଗ୍ରହ କରିଛନ୍ତି। ପ୍ରାୟ ୪୫୦ ଲୋକଙ୍କଠାରୁ ସେ ଦସ୍ତଖତ ସଂଗ୍ରହ କରିପାରିଛନ୍ତି। ଏହି ଦସ୍ତଖତର ଜେରକ୍ସ କପିକୁ ସେ ମୁଖ୍ୟମନ୍ତ୍ରୀ, ରାଜ୍ୟପାଳ ଏବଂ ଭାଜପା ସଭାପତିଙ୍କୁ ପ୍ରଦାନ କରିବେ ବୋଲି କହିଛନ୍ତି ରବିକୁମାର। ଏହି ଯାତ୍ରା ସମ୍ପର୍କରେ ସେ କହିଛନ୍ତି, ଜଣେ ସାଥୀ ସାହେବ କୁମାର ମାଝି ବାଇକ୍ ଧରି ତାଙ୍କ ସହିତ ଆସିଥିଲେ। ସେ ଦିନକୁ ପ୍ରାୟ ୨୨ କିମି ଚାଲିଥାନ୍ତି। ରାତିରେ ଧର୍ମଶାଳା କିମ୍ବା ମନ୍ଦିରରେ ରହିଥାନ୍ତି। ଏମିତି କି ଦୁଇରାତି ତାଙ୍କୁ ଗଛ ତଳେ ରହିବାକୁ ପଡିଥିଲା ବୋଲି କହିଛନ୍ତି ରବିକୁମାର।
