ପାଟନା,୨୧।୧୨: ନାଗରିକତ୍ୱ ସଂଶୋଧନ ଆଇନ(ସିଏଏ)କୁ ନେଇ ଜାରି ରହିଥିବା ବିକ୍ଷୋଭ ଉତ୍ତରପ୍ରଦେଶ, ଗୁଜରାଟ, ଦିଲ୍ଲୀ, କର୍ନାଟକ, ଆସାମ ପରେ ଏବେ ବିହାରରେ ଏହାର ନିଆଁ ତେଜିବାରେ ଲାଗିଛି। ଏହାକୁ ନେଇ ବିହାରରେ ବିରୋଧ ପ୍ରଦର୍ଶନ ଜାରି ରହିଥିବା ବେଳେ ଶନିବାର ରାଜ୍ୟର ମୁଖ୍ୟ ବିରୋଧୀ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ପକ୍ଷରୁ ସହରରେ ବନ୍ଦ ଡାକରା ଦିଆଯାଇଛି। ସକାଳୁ ସହରର ବିଭିନ୍ନ ସ୍ଥାନରେ ଆର୍ଜେଡିର କର୍ମକର୍ତ୍ତାମାନେ ରାସ୍ତା ଉପରେ ବିକ୍ଷୋଭ ପ୍ରଦର୍ଶନ କରିବା ସହ ଟାୟାର ଜଳାଇ ରାସ୍ତାରୋକୋ କରିଥିଲେ। ଜହାନାବାଦରେ କର୍ମକର୍ତ୍ତାମାନେ କୋର୍ଟ ଷ୍ଟେଶନରେ ରେଲଓ୍ବେ ଟ୍ରାକ୍ରେ ନିଆଁ ଲଗାଇ ଟ୍ରେନ୍ ଚଳାଚଳକୁ ବନ୍ଦ କରିଥିବା ଜଣାପଡ଼ିଛି। ସେହିପରି ଭାଗଲପୁରରେ ପ୍ରାୟ ଦେଢ଼ଘଣ୍ଟା ଧରି ବିକ୍ଷୋଭ କରାଯିବା ସହ ସରକାର ବିରୋଧୀ ସ୍ଲୋଗାନ ଦେଇଥିଲେ କର୍ମକର୍ତ୍ତା। ଏଥିସହ ରାସ୍ତାରେ ଯାଉଥିବା ଯାନବାହନକୁ ମଧ୍ୟ ଭଙ୍ଗାରୁଜା କରିବା ସହ କେତେକ ଗାଡିରୁ ପ୍ରେସର କାଢ଼ି ଦେଇଥିଲେ। କେବଳ ସେତିକି ନୁହେଁ କର୍ମକର୍ତ୍ତାମାନେ ସହରରେ ଜବରଦସ୍ତି ଦୋକାନ ବଜାର ବନ୍ଦ କରାଇଥିବା ଦେଖିବାକୁ ମିଳିଛି। ଅପରପକ୍ଷେ ଆର୍ଜେଡି ନେତା ତେଜସ୍ବୀ ଯାଦବ ଏହି ବନ୍ଦ ଶାନ୍ତିପୂର୍ଣ୍ଣ ଭାବେ କରାଯିବ ବୋଲି କହୁଥିବା ବେଳେ କିନ୍ତୁ ତାଙ୍କ ସମର୍ଥକ ହିଂସାତ୍ମକ ପରିସ୍ଥିତି ସୃଷ୍ଟି କରିବା ସହ ଭଙ୍ଗାରୁଜା କରିଛନ୍ତି।
