ସମ୍ପାଦକୀୟ/ ଶିଶୁଙ୍କ ଶୋ’ରେ ବୟସ୍କ

ଭାରତରେ ଘରୋଇ ଟେଲିଭିଜନ ଚ୍ୟାନେଲ ଟେଲିଭିଜନ ରେଟିଂ ପଏଣ୍ଟ (ଟିଆର୍‌ପି)କୁ ବଢ଼ାଇବା ଲକ୍ଷ୍ୟରେ ବିଭିନ୍ନ ସମୟରେ ସମାଚାର, ପ୍ରସଙ୍ଗଭିତ୍ତିକ ମତଠାରୁ ଆରମ୍ଭକରି ମନୋରଞ୍ଜନଧର୍ମୀ କାର୍ଯ୍ୟକ୍ରମ ପ୍ରସାରଣ ବେଳେ ଅତିରଞ୍ଜିତ ସ୍ତରକୁ ଚାଲିଯାଇଥାଆନ୍ତି। ସମାଚାର ପ୍ରସାରଣ ବେଳେ ସମ୍ବେଦନଶୀଳ ଖବରକୁ ଏଭଳି ବନେଇଚୁନେଇ ଦର୍ଶକଙ୍କ ଆଗରେ ବାଢ଼ିଦିଆଯାଏ ଯେ, ମନେହୁଏ ଯେମିତି ଉପସ୍ଥାପିକା ବା ଉପସ୍ଥାପକ ଘଟଣାକୁ ପ୍ରତ୍ୟକ୍ଷ ଭାବେ ଦେଖୁଛନ୍ତି। ଏହାଦ୍ୱାରା ଖବର ତା’ର ମୌଳିକତା ହରାଇ ବସିଥାଏ। ସେହିଭଳି ପ୍ରସଙ୍ଗଭିତ୍ତିକ ବିତର୍କ କାର୍ଯ୍ୟକ୍ରମର ସିଧା ପ୍ରସାରଣ ବେଳେ ନ୍ୟୁଜ୍‌ରୁମ୍‌ ଅନେକ ସମୟରେ କୋର୍ଟରୁମ୍‌ରେ ପରିଣତ ହୋଇଯାଉଥିବା ଦେଖିବାକୁ ମିଳୁଛି। ଯିଏ ଯେତେବଡ଼ ପାଟିକରି ନିଜ ମତ ରଖିପାରିଲେ, ସେ ସେତେ ବିଦ୍ୱାନ୍‌ ଦେଖେଇ ହୋଇଥାଆନ୍ତି। ସମ୍ପୃକ୍ତ ଚ୍ୟାନେଲଗୁଡ଼ିକ ଏସବୁୁ କାର୍ଯ୍ୟକ୍ରମକୁ ଅଗ୍ରାଧିକାର ଦେବା ପଛରେ ଟିଆର୍‌ପି ବୃଦ୍ଧି ମୁଖ୍ୟ ଲକ୍ଷ୍ୟ ହୋଇଥାଏ ବୋଲି କୁହାଯାଉଛି। ଅନୁରୂପ ଭାବେ ମନୋରଞ୍ଜନଧର୍ମୀ କାର୍ଯ୍ୟକ୍ରମ କଥା ଆଲୋଚନା କଲେ ଘରୋଇ ଟେଲିଭିଜନ ଚ୍ୟାନେଲଗୁଡ଼ିକ ଅଶିଷ୍ଟତାର ସବୁ ସୀମାସରହଦ ଅତିକ୍ରମ କଲାଭଳି ଦୃଶ୍ୟମାନ ହେଉଛି। କେତେକ କାର୍ଯ୍ୟକ୍ରମ ଏଭଳି ପ୍ରସାରଣ କରାଯାଉଛି ଯେ ପରିବାରର ସବୁ ସଦସ୍ୟ ଏକସଙ୍ଗେ ବସି ତାହାକୁ ଦେଖିବା ଅସମ୍ଭବ ମନେହେଉଛି। ଏବେ ଆଉ ଏକ ସମ୍ବେଦନଶୀଳ କ୍ଷେତ୍ର ପ୍ରତି ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଙ୍ଗୁଳି ନିର୍ଦ୍ଦେଶ କରିଥିବା ନଜରକୁ ଆସିଛି। ଶିଶୁମାନଙ୍କ ନୃତ୍ୟଭିତ୍ତିକ ରିୟଲିଟି ଶୋ’ରେ ଅଶ୍ଳୀଳ ଓ ହିଂସା ବଢ଼ାଇବା ଭଳି ଦୃଶ୍ୟ ଦେଖିବାକୁ ମିଳିବା ପରେ ମନ୍ତ୍ରଣାଳୟ ପକ୍ଷରୁ ଘରୋଇ ଚ୍ୟାନେଲ ଉପରେ ରୋକ ଲଗାଯାଇଛି। ଦେଖାଯାଉଛି ବୟସ୍କଙ୍କ ସକାଶେ ଉଦ୍ଦିଷ୍ଟ ଗୀତ ଓ ନାଚରେ ଶିଶୁମାନେ ରିୟଲିଟି ଶୋ’ରେ ଭାଗ ନେବା ବେଳେ ବଡ଼ମାନଙ୍କ ଭଳି ଅଙ୍ଗଭଙ୍ଗୀ ପ୍ରଦର୍ଶନ କରୁଛନ୍ତି। ଫଳରେ ସେମାନଙ୍କ କୋମଳ ମନରେ ଏସବୁ ଖରାପ ପ୍ରଭାବ ପକାଇବା ସ୍ବାଭାବିକ। ଘରୋଇ ଚ୍ୟାନେଲଗୁଡ଼ିକ ଏଥିପ୍ରତି ଦୃଷ୍ଟି ଦେବା ଲାଗି ମନ୍ତ୍ରଣାଳୟ ପକ୍ଷରୁ ଆଡ୍‌ଭାଇଜରି ବା ନିର୍ଦ୍ଦେଶନାମା ଜାରି ହେବା ସ୍ବାଗତଯୋଗ୍ୟ ପଦକ୍ଷେପ।
କେବୁଲ୍‌ ଟେଲିଭିଜନ ନେଟ୍‌ଓ୍ବର୍କସ (ରେଗୁଲେଶନ) ଆଇନ ଅନୁଯାୟୀ ଶିଶୁମାନଙ୍କ ପାଇଁ ଉଦ୍ଦିଷ୍ଟ କାର୍ଯ୍ୟକ୍ରମରେ ସେମାନଙ୍କୁ କଳଙ୍କିତ ବା ନିନ୍ଦା ଆଣିବା ଭଳି ଦୃଶ୍ୟ ପ୍ରସାରଣ କରାଯିବା ଉଚିତ ନୁହେଁ। କାର୍ଯ୍ୟକ୍ରମରେ ଖରାପ ଭାଷା ବ୍ୟବହାର ଓ ହିଂସାତ୍ମକ ଦୃଶ୍ୟମାନ ଯେଭଳି ପ୍ରସାରଣ ନ ହେବ ସେଥିପ୍ରତି ଟେଲିଭିଜନ ଚ୍ୟାନେଲଗୁଡ଼ିକ ସଚେତନ ହେବେ। ହେଲେ ଟିଆର୍‌ପିକୁ ଆଖିରେ ରଖି ଏବେ ଅଧିକାଂଶ ମନୋରଞ୍ଜନଧର୍ମୀ ଚ୍ୟାନେଲ ପିଲାଙ୍କୁ ଦୃଷ୍ଟି ଦେଇ ସ୍ବାଭାବିକ ଭାବେ ଉକ୍ତ ଆଇନକୁ ଭଙ୍ଗ କରୁଛନ୍ତି। ସାଧାରଣରେ ଶିଶୁମାନଙ୍କ କାର୍ଯ୍ୟକ୍ରମ ସହ ସିଧାସଳଖ ଭାବେ ମାତାପିତା ଓ ଅଭିଭାବକମାନେ ଅସଂଖ୍ୟ ଭାବେ ଜଡ଼ିତ ଥିବାରୁ ଟେଲିଭିଜନ ଦର୍ଶକଙ୍କ ସଂଖ୍ୟା ବୃଦ୍ଧି ପାଇଥାଏ। ଅଧିକ ଦର୍ଶକ ହେଲେ ବିଜ୍ଞାପନ ଦର ସେହି ଅନୁଯାୟୀ ବଢ଼ିଥାଏ। ତେଣୁ ଶିଶୁମାନଙ୍କ କାର୍ଯ୍ୟକ୍ରମକୁ ଅଧିକ ଲୋକପ୍ରିୟ କରାଇବା ଲାଗି ପ୍ରସାରଣ ନିୟମକୁ ନ ମାନି ଅନେକ ଚ୍ୟାନେଲ ଅତି ନିମ୍ନ ସ୍ତରକୁ ଚାଲିଯାଉଛନ୍ତି। ଏପରିକି ରିୟଲିଟି ଶୋ’ରେ ଗୀତ କିମ୍ବା ନାଚ କାର୍ଯ୍ୟକ୍ରମ ଲାଗି ଅଡିଶନ ଦେବାକୁ ଯାଇଥିବା ପିଲାଙ୍କୁ ରାତି ଅଧଯାଏ ଅଟକାଇ ରଖାଯାଇଥାଏ। କେତେକ ଚ୍ୟାନେଲ ସକାଳ ସମୟରେ ଅଡିଶନ ଆରମ୍ଭ ହେବ ବୋଲି ବିଜ୍ଞାପନ ଦେଉଥିବା ବେଳେ କାର୍ଯ୍ୟକ୍ରମ ଆରମ୍ଭ କଲା ବେଳକୁ ଅପରାହ୍ନ ଗଡ଼ିଯାଇଥାଏ। ମାତାପିତା ନିଜ ପିଲାକୁ ସେଲିବ୍ରିଟି ସ୍ତରରେ ଦେଖିବାର ଲକ୍ଷ୍ୟ ରଖି ଅଡିଶନ ହେଉଥିବା ସ୍ଥାନରେ ଅନେକ ଘଣ୍ଟା ଅପେକ୍ଷାରେ ରହିଥାଆନ୍ତି। ଏମିତି ଦେଖାଗଲାଣି କେତେକ କମ୍ପାନୀ ନିଜ ପ୍ରଡକ୍ଟ ବିକ୍ରି କରିବାକୁ ଯାଇ ଘରୋଇ ଚ୍ୟାନେଲରେ ଶିଶୁ କାର୍ଯ୍ୟକ୍ରମ ପାଇଁ ପ୍ରାୟୋଜକ ପାଲଟି ଯାଉଛନ୍ତି। ସେଭଳି ସ୍ଥଳେ ଶିଶୁଙ୍କ ପ୍ରତିଭା ତଉଲିବାର ମାପଦଣ୍ଡ କେଉଁ ଆଡ଼କୁ ଚାଲିଯାଉଛି ଭୁକ୍ତଭୋଗୀ ଅନୁଭବ କରିପାରୁଥିବେ।
ଶିଶୁମାନଙ୍କୁ ଉତ୍ତମ ନାଗରିକ ଭାବେ ଗଢ଼ିତୋଳିବା ଲାଗି ବୟସ୍କମାନଙ୍କ ଭୂମିକା ସର୍ବାଗ୍ରେ ରହିବା କଥା। ଟେଲିଭିଜନ ଏକ ବଳିଷ୍ଠ ଗଣମାଧ୍ୟମ ହୋଇଥିବାରୁ ଏଥିରେ ଅଶ୍ଳୀଳତାକୁ ପ୍ରଶ୍ରୟ ଦିଆଯିବା ଉଚିତ ନୁହେଁ। ପ୍ରଗତିଶୀଳ ହେବା ଲାଗି ଶୃଙ୍ଖଳିତ ଭାବେ ସମାଜକୁ ଗଢ଼ାଯିବା ଦରକାର। ଶିଶୁମାନଙ୍କ କାର୍ଯ୍ୟକ୍ରମ କଥା ବିଚାର କଲେ ସେଥିରେ ଶିକ୍ଷା, ମନୋରଞ୍ଜନ ସହ ନୂତନ ଚିନ୍ତାଧାରା ସ୍ଥାନ ପାଇଲେ ସେମାନଙ୍କ ପାଇଁ ଏକ ସୁସ୍ଥ ବାତାବରଣ ସୃଷ୍ଟି କରାଯାଇପାରିବ। ବିକୃତ ଚରିତ୍ର ପୋଷଣ କଲେ ଶିଶୁମାନଙ୍କ ଉପରେ କୁପ୍ରଭାବ ପଡ଼ିବ। ସେଥିପାଇଁ କେବଳ ଗଣମାଧ୍ୟମ ବିଶେଷକରି ଟେଲିଭିଜନ ଚ୍ୟାନେଲ ନୁହେଁ, ମାତାପିତା ମଧ୍ୟ ଏଭଳି ବଦ୍‌କାର୍ଯ୍ୟରେ ସ୍ବଇଚ୍ଛାରେ ସମ୍ପୃକ୍ତ ହୋଇଯିବା ଦୁଃଖଦାୟକ।


Enter your email to get our daily news in your inbox.

All Right Reserved By Dharitri.Com

ଏଇ ଭାରତରେ

ଖରାଦିନ ଆରମ୍ଭରୁ ବେଙ୍ଗାଲୁରୁ ଜଳ ସଙ୍କଟ ଏବେ ଚିନ୍ତାର ବିଷୟ ହୋଇଛି। ପରିସ୍ଥିତି ଏମିତି ଯେ ସେଠାରେ ଲୋକେ ସହର ଛାଡ଼ିବାକୁ ବାଧ୍ୟ ହେଉଛନ୍ତି। ଏହି...

ଅଦୃଶ୍ୟ ଶତ୍ରୁ

ମାୟାଧର ନାୟକ   ସତ୍ୟ, ତ୍ରେତୟା, ଦ୍ୱାପର, କଳିକାଳରେ ଯେତେ ଯୁଦ୍ଧ ହୋଇଯାଇଛି- ଶତ୍ରୁକୁ ଜାଣି ହେଉଥିଲା- କିନ୍ତୁ ଏ ମହାକଳିକାଳରେ ଅଜଣା ରୋଗ ଓ...

ଚୋରକୁ ବୁଦ୍ଧି

ଅଲେଖ ଚନ୍ଦ୍ର ମିଶ୍ର   ‘ଚୋରକୁ ବୁଦ୍ଧି ଶିଖେଇବା’ ଆପ୍ତବାଣୀଟି ଯେଉଁ ପୃଷ୍ଠଭୂମି ଉପରେ ଆଧାରିତ ତାହା ଥିଲା ଏକ ବାସ୍ତବଧର୍ମୀ କାହାଣୀ, ଯାହାର ମର୍ମ...

ଅପ୍ରକାଶ୍ୟ ଋଣ ସମସ୍ୟା

ଗତ କିଛି ବର୍ଷ ମଧ୍ୟରେ କୋଭିଡ୍‌-୧୯ ମହାମାରୀଠାରୁ ଆରମ୍ଭକରି ଉନ୍ନତ-ଅର୍ଥ ବ୍ୟବସ୍ଥାର ସୁଧ ହାର ବୃଦ୍ଧି ଭଳି ଘଟଣା ଭିନ୍ନ ସ୍ଥିତି ସୃଷ୍ଟି କରିଛି। ଏଥିରେ...

ଏଇ ଭାରତରେ

ଦେଶ ଗଠନରେ ଯୁବ ପ୍ରଶାସକଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଅନୁଭବ କରିଛନ୍ତି ୨୦୧୧ ବ୍ୟାଚ୍‌ ଭାରତୀୟ ରାଜସ୍ବ ସେବା(ଆଇଆର୍‌ଏସ୍‌) ଅଧିକାରୀ ରବି କପୁର। ସେ...

ରାମ ରାଜ୍ୟ ସମ୍ଭବ କି

ବୈକୁଣ୍ଠନାଥ ମିଶ୍ର   ଆଜିକାଲି ‘ଜୟ ଶ୍ରୀରାମ’ ଉଚ୍ଚାରଣ କରି ବନ୍ଧୁଙ୍କୁ ପ୍ରଥମ ସାକ୍ଷାତରେ ସମ୍ଭାଷିତ କରିବାର ଅଭିନବ ପରମ୍ପରା ସର୍ବତ୍ର ପରିଦୃଷ୍ଟ। ବନ୍ଧୁଙ୍କୁ ସମ୍ଭାଷଣ...

ମତଦାତାଙ୍କ ବୁଦ୍ଧି ବିମୂଢ଼ତା

ଡ.ଛାୟାକାନ୍ତ ଷଡ଼ଙ୍ଗୀ   ସମ୍ପ୍ରତି ଭାରତ ତଥା ବିଭିନ୍ନ ପ୍ରଦେଶରେ ରାଜନୀତିର ବିଚିତ୍ର ଗତି ଦେଖି ମତଦାତାମାନେ ଉଇଲିଅମ ଜେମ୍‌ସଙ୍କ ଭଳି ସମସ୍ୟାର ସମ୍ମୁଖୀନ ହେଲେଣି।...

ବୁଝିହେଉଛି

ଆମ୍‌ ଆଦ୍‌ମୀ ପାର୍ଟି (ଆପ୍‌) ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ୍‌ କେଜ୍‌ରିଓ୍ବାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରି ଆସନ୍ତା ୨୮ ତାରିଖ ପର୍ଯ୍ୟନ୍ତ...

Advertisement

ଧରିତ୍ରୀ କାର୍ଟୁନ

Archives
Model This Week

ପିଲାଙ୍କ ଧରିତ୍ରୀ

Why Dharitri