ନୂଆଦିଲ୍ଲୀ,୬।୬: ଦେଶରେ ସାଇବର ଠକେଇ ଘଟଣା ଦିନକୁ ଦିନ ବୃଦ୍ଧି ପାଉଥିବା ବେଳେ ଏହାକୁ ନେଇ ଚିନ୍ତା ପ୍ରକଟ ହେଉଛି। ଏହି ସମୟରେ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି । ଦେଶ ମଧ୍ୟରେ ସମାନ ଆଇଏମ୍ଇଆଇ ନମ୍ବରରେ ୧୩ ହଜାରରୁ ଉର୍ଦ୍ଧ୍ୱ ମୋବାଇଲ ଫୋନ ଚାଲୁଥିବା ଉତ୍ତର ପ୍ରଦେଶ ପୋଲିସର ଏକ ତଦନ୍ତରୁ ଜାଣିପାରିିଛି। ମୋବାଇଲ ଚୋରି ଘଟଣାକୁ ନେଇ ଉତ୍ତର ପ୍ରଦେଶର ମିରଟ ପୋଲିସ ଏକ ମୋବାଇଲ ଉପତ୍ାଦନକାରୀ କମ୍ପାନୀ ଓ ତା’ର ସର୍ଭିସ ସେଣ୍ଟର ନାଁରେ ମାମଲା ରୁଜୁ କରିଥିଲା। ଏହି ଘଟଣାଟିକୁ ପୋଲିସ ଯେତେ ହାଲୁକା ଭାବୁଥିଲା ତାହା ସେତେ ସହଜ ନଥିଲା। ଉକ୍ତ ମୋବାଇଲ ଫୋନକୁ ସାଇବର କ୍ରାଇମ ସେଲ୍ ପକ୍ଷରୁ ପରୀକ୍ଷା ସ୍ବରୂପ ଉକ୍ତ ମୋବାଇଲର ଆଇଏମ୍ଇଆଇ ନମ୍ବରକୁ ଟ୍ରାକ କରିଥିଲା। ପ୍ରାଥମିକ ପର୍ଯ୍ୟାୟରେ ପୋଲିସ ସେପରି କିଛି ତଥ୍ୟ ହାସଲ କରିପାରିନଥିଲା। ସେହିପରି ସମାନ ସମସ୍ୟା ଥିବା ବିଭାଗୀୟ କର୍ମଚାରୀଙ୍କ ଏକ ନିର୍ଦ୍ଦିଷ୍ଟ ନମ୍ବରକୁ ଟ୍ରାକିଂରେ ପକାଇଲା ବେଳେ ପୋଲିସ ଚକିତ ହୋଇଯାଇଥିଲା। ଉକ୍ତ ମୋବାଇଲ ଟ୍ରାକିଂରୁ ଜଣାପଡିଲା ଯେ, ଦେଶର ବିଭିନ୍ନ ପ୍ରାନ୍ତର ୧୩ ଶହରୁ ଉର୍ଦ୍ଧ୍ୱ ମୋବାଇଲ ଫୋନ ସମାନ ଆଇଏମ୍ଇଆଇ ନମ୍ବରରେ ସେବା ଯୋଗାଉଥିବା ବିଷୟରେ ମିରଟ ସିଟି ଏସ୍ପି ଅଖିଳେଶ ଏନ. ସିଂ ସ୍ପଷ୍ଟ କରିଛନ୍ତି। ବିଭିନ୍ନ ମୋବାଇଲ ଉପତ୍ାଦନକାରୀ କମ୍ପାନୀଙ୍କ ଖାମଖିଆଲ କାର୍ଯ୍ୟ ପାଇଁ ଏଭଳି ତ୍ରୁଟି ଦେଖାଯାଇଛି। ଯାହା ଫଳରେ ବିଭିନ୍ନ ଅପରାଧୀମାନେ ଏହାର ଫାଇଦା ଉଠାଉଛନ୍ତି। ଏହି ସବୁ କାରଣରୁ ଅପରାଧୀଙ୍କ ପାଖରେ ପୋଲିସ ପହଞ୍ଚିପାରୁନାହିଁ। ଚୋର ହୋଇଥବା ମୋବାଇଲ ଫୋନ ଓ ଠକେଇରେ ସମ୍ପୃକ୍ତ ମୋବାଇଲ କମ୍ପାନୀ ବିରୋଧରେ କଡା କାର୍ଯ୍ୟାନୁଷ୍ଟାନ ଗ୍ରହଣ ପାଇଁ ସରକାରଙ୍କୁ ଅବଗତ କରାଯାଇଥିବା ସୂଚନା ମିଳିଛି।
