ବ୍ରହ୍ମପୁର ଅଫିସ୍,୨୫ା୯-ସଂଶୋଧିତ ମୋଟରଯାନ ଆଇନ-୨୦୧୯ରେ ଜରିମାନା ଅର୍ଥ ଅଧିକ ଥିବା ଯୋଗୁ ଗାଡ଼ି ଚାଳକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ଜରିମାନାରୁ ବର୍ତ୍ତିବା ପାଇଁ ଲୋକମାନେ ଗାଡ଼ି ପ୍ରଦୂଷଣ ପ୍ରମାଣପତ୍ରଠାରୁ ଆରମ୍ଭ କରି ବୀମା ନବୀକରଣ କରାଉଛନ୍ତି। ସେହିଭଳି ଚାଳକମାନେ ଡ୍ରାଇଭିଂ ଲାଇସେନ୍ସ କରୁଛନ୍ତି। ଏସବୁ ପାଇଁ ପରିବହନ କାର୍ଯ୍ୟାଳୟରେ ଭିଡ଼ ଦେଖିବାକୁ ମିଳୁଛି। ଛତ୍ରପୁରରେ ଥିବା ପରିବହନ କାର୍ଯ୍ୟାଳୟ ଉପରୁ ବୋଝ କମାଇବା ପାଇଁ ଖଲ୍ଲିକୋଟ ସ୍ବୟଂ ଶାସିତ ମହାବିଦ୍ୟାଳୟରେ କ୍ୟାମ୍ପ ଅଫିସ୍ ଖୋଲାଯାଇଛି। ସୋମବାରରୁ ଆରମ୍ଭ ହୋଇଥିବା କ୍ୟାମ୍ପ ଅଫିସ୍ ବୁଧବାର ପର୍ଯ୍ୟନ୍ତ ଚାଲିବ। ଏଠାରେ ଲୋକଙ୍କ ପ୍ରବଳ ଭିଡ଼ ଦେଖିବାକୁ ମିଳୁଛି। ବିଶେଷକରି ପ୍ରଦୂଷଣ ସାର୍ଟିଫିକେଟ୍ କରିବା ପାଇଁ ଲମ୍ବା ଲାଇନ୍ ଲାଗୁଛି। ମାତ୍ର ତିନୋଟି ମେଶିନ୍ ଥିବା ବେଳେ ଆବେଦନକାରୀଙ୍କ ସଂଖ୍ୟା ଢ଼େର୍ ଅଧିକ ରହୁଛି।
ସୋମବାର ପ୍ରଥମ ଦିନରେ କେବଳ ଛାତ୍ରୀଛାତ୍ରଙ୍କ ପାଇଁ ଅଫିସ୍ କାର୍ଯ୍ୟ କରିଥିଲା। ହେଲେ ଗୋଟିଏ ଦିନରେ ଆବେଦନ ସଂଖ୍ୟା ଆଶାତୀତ ଅଧିକ ଥିବା ଯୋଗୁ ସମସ୍ୟା ସୃଷ୍ଟି ହୋଇଥିଲା। ମଙ୍ଗଳବାର ଦ୍ୱିତୀୟ ଦିନ ସର୍ବସାଧାରଣଙ୍କ ପାଇଁ ଖୋଲା ଯାଇଥିଲା। କିନ୍ତୁ ଆବେଦନକାରୀଙ୍କ ମଧ୍ୟରେ ଛାତ୍ରୀଛାତ୍ର ରହିଥିଲେ। ବାୟୁ ଓ ଶବ୍ଦ ପ୍ରଦୂଷଣ ନିୟମ ଖିଲାପ କଲେ ୧୦ହଜାର ଟଙ୍କା ଜରିମାନା ରହିଛି। କିନ୍ତୁ ଭିଡ଼ ଯୋଗୁ ଠିକ୍ ଭାବେ ପ୍ରଦୂଷଣ ଯାଞ୍ଚ କରାଯାଉ ନ ଥିଲା। ତରବରିଆ ଭାବେ ପ୍ରମାଣପତ୍ର ପ୍ରଦାନ କରାଯାଉଥିବା ଦେଖିବାକୁ ମିଳିଥିଲା। ଅନ୍ୟପଟେ ଲର୍ନିଂ ଲାଇସେନ୍ସ ପ୍ରଦାନ କେନ୍ଦ୍ରରେ ଛାତ୍ରୀଛାତ୍ରଙ୍କ ଭିଡ଼ ଦେଖାଦେଇଛି। ନିଜ କ୍ୟାମ୍ପସ୍ରେ ସୁବିଧା ମିଳୁଥିବା ଯୋଗୁ ସେମାନେ ଖୁସି ପ୍ରକାଶ କରିଥିଲେ।
କେବଳ ଖଲ୍ଲିକୋଟ କଲେଜରେ ଏହି କ୍ୟାମ୍ପ ଖୋଲାଯିବାରୁ ଅନ୍ୟାନ୍ୟ କଲେଜରେ ଅସନ୍ତୋଷ ପ୍ରକାଶ ପାଇଛି। ବିନାୟକ ଆଚାର୍ଯ୍ୟ ମହାବିଦ୍ୟାଳୟ ଛାତ୍ର ନେତା ଦେବାନନ୍ଦ ପଣ୍ଡା ଏହାକୁ ନାପସନ୍ଦ କରିଛନ୍ତି। ଖଲ୍ଲିକୋଟ ବିଶ୍ୱବିଦ୍ୟାଳୟ ଅଧୀନରେ ଥିବା ପ୍ରତ୍ୟେକ ମହାବିଦ୍ୟାଳୟର ଛାତ୍ରୀଛାତ୍ରଙ୍କ ପାଇଁ ଏଭଳି ବ୍ୟବସ୍ଥା କରିବାକୁ ସେ ଦାବି କରିଛନ୍ତି। ବିନାୟକ ଆଚାର୍ଯ୍ୟ ମହାବିଦ୍ୟାଳୟ ଛାତ୍ରୀଛାତ୍ର ଏବେ ଡ୍ରାଇଭିଂ ଲାଇସେନ୍ସ କରିବାକୁ ଛତ୍ରପୁର ପରିବହନ କାର୍ଯ୍ୟାଳୟକୁ ଯାଉଛନ୍ତି। ଫଳରେ ଗୋଟିଏ ଦିନ ପୂରା ନଷ୍ଟ ହେଉଛି। ଖଲ୍ଲିକୋଟ ସ୍ବୟଂଶାସିତ ମହାବିଦ୍ୟାଳୟ ଛାତ୍ରୀଛାତ୍ରଙ୍କ ପାଇଁ ଯେମିତି କ୍ୟାମ୍ପ ଅଫିସ୍ ଖୋଲାଯାଇଛି, ବିନାୟକ ଆଚାର୍ଯ୍ୟ ମହାବିଦ୍ୟାଳୟ ଛାତ୍ରୀଛାତ୍ରଙ୍କ ପାଇଁ ମଧ୍ୟ ସେଭଳି କ୍ୟାମ୍ପ ଅଫିସ୍ ଖୋଲାଯାଉ ବୋଲି ସେ ଦାବି କରିଛନ୍ତି।
