ନାଉଗାଁ,୪ା୨(ସ୍ବ.ପ୍ର.): ଗୋଟିଏ ଦିନରେ ୫ଜଣ ଶିକ୍ଷକଙ୍କୁ ଛୁଟି ଦେଇ ଚର୍ଚ୍ଚାକୁ ଆସିଥିଲେ
ନାଉଗାଁ ବ୍ଲକ ଅଧୀନ ବଚ୍ଛାଳୋ ଉଚ୍ଚ ପ୍ରାଥମିକ ବିଦ୍ୟାଳୟ ପ୍ରଧାନଶିକ୍ଷୟିତ୍ରୀ ଆବାସ ଲେଙ୍କା। ସୋମବାର ପୁଣି ଥରେ ସେ ଚର୍ଚ୍ଚାକୁ ଆସିଛନ୍ତି। ଯାହାକି ସୋସିଆଲ୍ ମିଡିଆରେ ଭାଇରାଲ ହୋଇଛି। ଶ୍ରେଣୀଗୃହରେ ଶିକ୍ଷୟିତ୍ରୀ ବସି ମୋବାଇଲ ଦେଖୁଦେଖୁ ଅନ୍ୟ ଏକ ଚେୟାରରେ ଗୋଡ଼ ରଖି ଶୋଇଥିବା ଫଟୋ ଭାଇରାଲ ହୋଇଛି। ଯାହାକୁ ନେଇ ଅଭିଭାବକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଏହି ବିଦ୍ୟାଳୟରେ ପ୍ରଥମରୁ ୧୦ମ ଶ୍ରେଣୀ ପର୍ଯ୍ୟନ୍ତ ପିଲା ପଢ଼ୁଥିଲେ ବି ପ୍ରଧାନଶିକ୍ଷୟିତ୍ରୀଙ୍କ କିଛି ଦାୟିତ୍ୱ ନ ଥିବା ଭଳି ମନେ ହେଉଛି। ଆଗକୁ ୧୦ମ ଶ୍ରେଣୀ ପରୀକ୍ଷା। ଏଥିପାଇଁ ମଧ୍ୟ କିଛି ଚିନ୍ତା କରୁ ନ ଥିବା ଅଭିଯୋଗ ହୋଇଛି। ପ୍ରଧାନଶିକ୍ଷୟିତ୍ରୀଙ୍କ ଏଭଳି ଶୋଇବା ଘଟଣାକୁ ସାଧାରଣରେ ନିନ୍ଦା କରାଯାଇଛି। ଅନ୍ୟପକ୍ଷରେ ପ୍ରଧାନଶିକ୍ଷୟିତ୍ରୀଙ୍କ ଏହି ଫଟୋଟି ବ୍ଲକ ଶିକ୍ଷାଧିକାରୀଙ୍କ ନଜରକୁ ଅଣାଯାଇଥିଲେ ବି ସେ ଏହାକୁ ହାଲ୍କାଭାବେ ନେଇଛନ୍ତି। ଘଟଣା ସମ୍ପର୍କରେ ବ୍ଲକ ଶିକ୍ଷାଧିକାରୀ ମାଗୁଣି ଚରଣ ମହାନ୍ତିଙ୍କୁ ପଚାରିବାରେ ସେ କହିଛନ୍ତି, ପ୍ରଧାନଶିକ୍ଷୟିତ୍ରୀ କାହିଁିକି ଗୋଟିଏ ଦିନରେ ୫ ଜଣ ଶିକ୍ଷକଙ୍କୁ ଛୁଟି ଦେଇଥିଲେ ତାହାର ତଦନ୍ତ ପାଇଁ ଚିଠି କରାଯାଇଛି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପ୍ରଧାନଶିକ୍ଷୟିତ୍ରୀଙ୍କ ଶୋଇଥିବା ଫଟୋ ଭାଇରାଲ ସମ୍ପର୍କରେ ପଚାରିବାରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ପାରିବ ନାହିଁ ବୋଲି ପ୍ରକାଶ କରିଥିଲେ। ଏ ସମ୍ପର୍କରେ ପ୍ରଧାନଶିକ୍ଷୟିତ୍ରୀ ଲେଙ୍କାଙ୍କୁ ପଚାରିବାରେ ସେ କହିଥିଲେ, ମୋର ଆଖି ଖରାପ ଥିବାରୁ ଔଷଧ ପକାଇ କାନ୍ଥକୁ ଆଉଜିଥିଲି, ଶୋଇ ନ ଥିଲି। ଗୋଡ଼ ଭଲ ନ ଥିବାରୁ ଅନ୍ୟ ଏକ ଚେୟାରରେ ଗୋଡ଼ ରଖିଥିଲି।
ସୂଚନଯୋଗ୍ୟ, ୨୨ ଜାନୁୟାରୀରେ ସମ୍ପୃକ୍ତା ପ୍ରଧାନଶିକ୍ଷୟିତ୍ରୀ ୫ ଜଣ ଶିକ୍ଷକଙ୍କୁ ବିନା ଦରଖାସ୍ତାରେ ଛୁଟି ମଞ୍ଜୁର କରିଥିଲେ। ଯାହାକି ସରକାରଙ୍କ ନିୟମକୁ ଖୋଲା ଉଲଂଘନ କରାଯାଇଥିଲା। ଘଟଣାକୁ ୧୦ ଦିନ ବିତି ଯାଇଥିଲେ ମଧ୍ୟ ଏପର୍ଯ୍ୟନ୍ତ ଏହାର ତଦନ୍ତ କରାଯାଇ ନାହିଁ। ଉକ୍ତ ବିଦ୍ୟାଳୟରେ ବିଭିନ୍ନ ଘଟଣା ଘଟୁଥିଲେ ବି କାହିଁକି ତଦନ୍ତ କରାଯାଉ ନାହିଁ ବୋଲି ଅଭିଭାବକ ପ୍ରଶ୍ନ କରିଛନ୍ତି।
