ସିଡ୍ନୀ,୨୦।୬: ଅଷ୍ଟ୍ରେଲିଆର ଏକ କୋର୍ଟ ଶୁକ୍ରାଣୁ ଦାନ କରିଥିବା ବ୍ୟକ୍ତିଙ୍କୁ ଜଣେ ୧୨ ବର୍ଷୀୟା କନ୍ୟାଙ୍କ ପ୍ରକୃତ ପିତା ହେବାର ଅଧିକାର ପ୍ରଦାନ କରିଛନ୍ତି। ପିଲାଟିର ଭବିଷ୍ୟତ ନିଷ୍ପତ୍ତି ମଧ୍ୟ ଏହି ପିତା ନେଇପାରିବେ ବୋଲି କୋର୍ଟ କହିଛନ୍ତି। ସୂଚନାଯୋଗ୍ୟ, ନିଜ ଶୁକ୍ରାଣୁ ଦାନ କରି ପିତାର ଅଧିକାର ହାସଲ କରିବାକୁ ଉକ୍ତ ବ୍ୟକ୍ତିଙ୍କୁ ଦୀର୍ଘ ୫ ବର୍ଷ କାଳ ଅଦାଲତ ଯିବାକୁ ପଡିଛି। ସୂଚତନାଯୋଗ୍ୟ, ୨୦୦୬ରେ ରବର୍ଟ(୪୯) ନାମକ ଉକ୍ତ ବ୍ୟକ୍ତି ବିଶ୍ୱାସର ସହ ନିଜର ଏକ ସମଲିଙ୍ଗି ବନ୍ଧୁଙ୍କୁ ଶୁକ୍ରାଣୁ ଦାନ କରିଥିଲେ। ସେ ବିଶ୍ୱାସ ରଖିଥିଲେ କି ଜନ୍ମିତ ସନ୍ତାନର ଜୀବନରେ ତାଙ୍କର ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ରହିବ। ଏମିତିକି ଝିଅଟିର ଜନ୍ମ ପ୍ରମାଣପତ୍ରରେ ମଧ୍ୟ ରବର୍ଟଙ୍କ ନାଁ ରହିଛି। ହେଲେ ଝିଅଟି ଜନ୍ମ ହେବାର କିଛି ବର୍ଷ ପରେ ଅର୍ଥାତ୍ ୨୦୧୫ରେ ତାଙ୍କର ମା’ ତାଙ୍କୁ ନେଇ ନିଜ ସମଲିଙ୍ଗି ବାନ୍ଧବୀଙ୍କ ସହ ନ୍ୟୁଜିଲାଣ୍ଡ ଯିବାପାଇଁ ବାହାରିଥିଲେ। ଏତିକି ବେଳେ ପିତା ହେବାର ଅଧିକାର ଜାହିର କରି ରବର୍ଟ ଝିଅଟିର ମା’ଙ୍କ ନିଷ୍ପତ୍ତି ବିରୋଧରେ କୋର୍ଟରେ ଆବେଦନ କରିଥିଲେ। ହେଲେ କୋର୍ଟ ଏହାର ଶୁଣାଣି କରି ପିଲାଟି ଉପରେ କେବଳ ମା’ର ଅଧିକାର ଅଛି ବୋଲି କହିଥିଲେ। ହେଲେ ପୁଣି ଥରେ ଏହି ଶୁଣାଣି ବିରୋଧରେ ରବର୍ଟ ହାଇକୋର୍ଟରେ ଆବେଦନ କରିଥିଲେ। ହାଇକୋର୍ଟ ଏହାର ଶୁଣାଣି କରି ଏବେ ରାୟ ଦେଇଛନ୍ତି କି ଶୁକ୍ରାଣୁ ଦାନ କରିଥିବା ରବର୍ଟଙ୍କର ଉକ୍ତ ଝିଅଟି ଉପରେ ପିତା ହେବାର ସମ୍ପୂର୍ଣ୍ଣ ଅଧିକାର ରହିଛି।
