ଏରସମା,୨୯ା୧୨(ସ୍ବ.ପ୍ର.): ଏରସମା ବ୍ଲକ ଅନ୍ତର୍ଗତ ପଦ୍ମପୁର ପଞ୍ଚାୟତସ୍ଥିତ ଶିଆଳି ସମୁଦ୍ର ବେଳାଭୂମିରେ ଏବେ ଶତାଧିକ ପର୍ଯ୍ୟଟକଙ୍କ ଭିଡ ଦେଖିବାକୁ ମିଳୁଛି। ଶିଆଳି ସମୁଦ୍ର ବେଳାଭୂମି ଓଡ଼ିଶା ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇବା ପରେ ବିଭିନ୍ନ ସ୍ଥାନରୁ ପର୍ଯ୍ୟଟଙ୍କ ସୁଅ ଛୁଟୁଛି। ହେଲେ ଏଠାକାର ପରିବେଶ ଏବେ ପର୍ଯ୍ୟଟକଙ୍କ ପାଇଁ ସମସ୍ୟା ସୃଷ୍ଟି କରିଛି। ବେଳାଭୂମିରେ କଇଁଛଙ୍କ ମୃତଦେହ ପଡ଼ି ରହିଥିବାରୁ ଦୁର୍ଗନ୍ଧରେ ପରିବେଶ ପ୍ରଦୂଷିତ ହେବାରେ ଲାଗିଛି। ଯଦ୍ଦ୍ବାରା ଅନେକ ପର୍ଯ୍ୟଟକ ଆସି ଦୁର୍ଗନ୍ଧରେ ବସି ନ ପାରି ଫେରି ଯାଉଛନ୍ତି। ଲଞ୍ଚ ଓ ଟ୍ରଲର ମାଡରେ ମୃତ୍ୟୁ ବରଣ କରିଥିବା କଇଁଛଙ୍କ ଶବକୁ ଏହି ବେଳଭୂମିରେ ପକାଇ ଦିଆଯାଉଛି। ହେଲେ ସଫେଇ କରାଯାଉନାହିଁ। ଫଳରେ କଇଁଛଙ୍କ ପଚାଶବ କାଉ କୁକୁରଙ୍କ ଖାଦ୍ୟ ପାଲଟିଛି। ପଚା ଗନ୍ଧ ପ୍ରଭାବରେ ପର୍ଯ୍ୟଟକ ସମୁଦ୍ର କୂଳରେ ବେଶି ସମୟ ପରିଭ୍ରମଣ କରି ପାରୁ ନାହାନ୍ତି। ପ୍ରଶାସନ ପକ୍ଷରୁ ମଧ୍ୟ ଏ ଦିଗରେ କୌଣସି ପଦକ୍ଷେପ ନିଆଯାଉନାହିଁ। ଯାହାକୁ ନେଇ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେଣୁ ଶୀଘ୍ର ଏହି ବେଳାଭୂମି ସଫେଇ କରିବାକୁ ଦାବି ହୋଇଛି। ଏ ସମ୍ପର୍କରେ ବିଡିଓ କୈଳାସ ଚନ୍ଦ୍ର ବେହେରାଙ୍କୁ ପଚାରିବାରେ ଏ ଦିଗରେ ଦୃଷ୍ଟିଦେଇ ଶୀଘ୍ର ପଦକ୍ଷେପ ନେବେ ବୋଲି କହିଛନ୍ତି। ତେବେ ଆଗକୁ ଦେଖିବାକୁ ଅପେକ୍ଷା କେବେ ଏହା କାର୍ଯ୍ୟକାରୀ ହେଉଛି।
ସୂଚନାଯୋଗ୍ୟ, ପୂର୍ବରୁ ଶିଆଳି ସମୁଦ୍ର ବେଳାଭୂମି ସବୁଜ ଜଙ୍ଗଲରେ ପରିପୂର୍ଣ୍ଣ ହୋଇ ରହିଥିଲା। ଗୋଟିଏ ପଟରେ ବଙ୍ଗୋପ ସାଗରର ନୀଳ ଜଳ ରାଶି ଅପର ପଟରେ ଝାଉଁ ଜଙ୍ଗଲର ସମୁଜିମା ଦିଶୁଥିଲା। ଏଥିସହିତ ପ୍ରସସ୍ତ ବେଳାଭୂମିର ବାଲୁକାରାଶି ବଣଭୋଜିସ୍ଥଳୀ ଭାବରେ ଆଦୃତ ଲାଭ କରିଛି। ମାତ୍ର କିଛି ବର୍ଷଧରି ଲୁଣା ଜୁଆର ମାଡରେ ବଡ଼ ଝାଉଁ ଗଛ ସବୁ ଉପୁଡି ପଡି ଜଙ୍ଗଲ ଅବକ୍ଷୟ ହୋଇଯାଇଛି। ଜାଳେଣି କାଠ ପାଇଁ ଲୋକେ ଗଛ କାଟି ନେଉଛନ୍ତି। ଚୋରା କାଠ ବ୍ୟବସାୟୀ ମଧ୍ୟ ଗଛ କାଟି ନେଉଛନ୍ତି। ତା ସ୍ଥାନରେ ଏବେ ନୂତନ ଝାଉଁ ଚାରାରୋପଣ କରାଯାଇଥିଲେ ମଧ୍ୟ ଗଛଗୁଡିକ ଛୋଟ ହୋଇଥିବରୁ ଭୋଜି କରିବା ପାଇଁ ପର୍ଯ୍ୟଟକ ଅସୁବିଧାର ସମ୍ମୁଖୀନ ହେଉଛନ୍ତି।
