କୋକ୍ରାଝର,୮ା୨(ପି.ଟି.): ଜନସାଧାରଣଙ୍କ ସମର୍ଥନରେ ସ୍ବାକ୍ଷରିତ ହୋଇଥିବା ବୋଡୋ ଚୁକ୍ତି ଆସାମରେ ଶାନ୍ତିର ନୂଆ ସକାଳ ଆଣିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଠାରେ ଏକ ଜନସଭାକୁ ସମ୍ବୋଧିତ କରି କହିଛନ୍ତି। ଜାନୁୟାରୀ ୨୭ରେ ତ୍ରିପାକ୍ଷିକ ବୋଡୋ ଶାନ୍ତି ଚୁକ୍ତି ସ୍ବାକ୍ଷର ହୋଇଥିଲା। ଏହା ଉଗ୍ରପନ୍ଥୀ ପ୍ରଭାବିତ ରାଜ୍ୟରେ ଦୀର୍ଘମିଆଦୀ ଶାନ୍ତି ଆଣିବ ବୋଲି ଆଶା କରାଯାଉଛି। ଉତ୍ତରପୂର୍ବାଞ୍ଚଳରେ ଶାନ୍ତି ଓ ବିକାଶ ଲାଗି ଏକାଠି କାମ କରିବାର ସମୟ ଆସିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ବୋଡୋ ଉଗ୍ରପନ୍ଥୀମାନଙ୍କ ଦ୍ୱାରା ଅନୁପ୍ରାଣିତ ହୋଇ ମୁଖ୍ୟ ସ୍ରୋତକୁ ଫେରିବା ଲାଗି ଉତ୍ତରପୂର୍ବାଞ୍ଚଳର ଉଗ୍ରପନ୍ଥୀ, ଜମ୍ମୁ-କଶ୍ମୀରର ଆତଙ୍କବାଦୀ ଓ ଦେଶର ଅନ୍ୟ ଭାଗରେ ସକ୍ରିୟ ଥିବା ମାଓବାଦୀମାନଙ୍କୁ ପ୍ରଧାନମନ୍ତ୍ରୀ ଆହ୍ବାନ ଦେଇଛନ୍ତି। ଅସ୍ତ୍ରଶସ୍ତ୍ର ତ୍ୟାଗକରି ସେମାନେ ଜୀବନକୁ ଉପଭୋଗ କରିବାକୁ ମୋଦି ପରାମର୍ଶ ଦେଇଛନ୍ତି।
ନୂଆ ନାଗରିକତ୍ୱ ଆଇନର କାର୍ଯ୍ୟକାରିତାକୁ ନେଇ ଉତ୍ତରପୂର୍ବାଞ୍ଚଳରେ ଦେଖାଦେଇଥିବା ଉତ୍ତେଜନାକୁ ଶାନ୍ତ କରିବାକୁ ପ୍ରଧାନମନ୍ତ୍ରୀ ପ୍ରୟାସ କରିଥିଲେ। ସେ କହିଥିଲେ, ସିଏଏ କାର୍ଯ୍ୟକାରୀ ହେବା ପରେ ଅନ୍ୟ ଦେଶରୁ ଲକ୍ଷ ଲକ୍ଷ ସଂଖ୍ୟାରେ ଲୋକ ଆସି ସେଠାରେ ରହିବେ ବୋଲି ବିଭ୍ରାନ୍ତିକର ଖବର ପ୍ରଚାର କରାଯାଉଛି। ସେପରି କିଛି ହେବ ନାହିଁ। ପୂର୍ବରୁ ଦୁଇଥର ବୋଡୋ ଚୁକ୍ତି ସ୍ବାକ୍ଷର ହୋଇଥିଲେ ହେଁ ସ୍ଥାୟୀ ଶାନ୍ତି ଆସିପାରି ନ ଥିଲା। ବର୍ତ୍ତମାନର ଚୁକ୍ତିନାମା ସମାଜର ସବୁ ବର୍ଗ ଓ ସମ୍ପ୍ରଦାୟ ପାଇଁ ବିଜୟ। ଏଥିରେ କାହାର କ୍ଷତି ହେବାର ନାହିଁ ବୋଲି ପ୍ରଧାନମନ୍ତ୍ରୀ କହିଛନ୍ତି।
ଗତ ୨୭ରେ ସରକାର ନ୍ୟାଶନାଲ ଡେମୋକ୍ରାଟିକ୍ ଫ୍ରଣ୍ଟ ଅଫ ବୋଡୋଲାଣ୍ଡ (ଏନ୍ଡିଏଫ୍ବି)ର ସବୁ ଗୋଷ୍ଠୀ, ଅଲ୍ ବୋଡୋ ଷ୍ଟୁଡେଣ୍ଟସ୍ ୟୁନିୟନ (ଏବିଏସ୍ୟୁ) ଏବଂ ୟୁନାଇଟେଡ ବୋଡୋ ପିପୁଲ୍ସ ଅର୍ଗାନାଇଜେଶନ (ୟୁବିପିଓ) ସହ ଶାନ୍ତି ଚୁକ୍ତି ସ୍ବାକ୍ଷର କରିଥିଲେ। ସରକାର ସେମାନଙ୍କୁ ରାଜନୈତିକ ଓ ଅର୍ଥନୈତିକ ସହାୟତା ଯୋଗାଇଦେବାକୁ ପ୍ରତିଶ୍ରୁତି ଦେଇଛନ୍ତି। ତେବେ ସ୍ବତନ୍ତ୍ର ରାଜ୍ୟ କିମ୍ବା କେନ୍ଦ୍ରଶାସିତ ଅଞ୍ଚଳ ଲାଗି ସେମାନଙ୍କ ଦାବିକୁ ସରକାର ଗ୍ରହଣ କରିନାହାନ୍ତି। ଉଚ୍ଚ କ୍ଷମତାସମ୍ପନ୍ନ କମିଟି ରିପୋର୍ଟ ଦାଖଲ କରିବା ପରେ ଆସାମ ଚୁକ୍ତିନାମାର ଧାରା ୬କୁ ତୁରନ୍ତ କାର୍ଯ୍ୟକାରୀ କରାଯିବ ବୋଲି ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି। ଆସାମ ଜନସାଧାରଣଙ୍କ ସଂସ୍କୃତି, ସାମାଜିକ, ଭାଷାଗତ ପରିଚିତି ଏବଂ ଐତିହ୍ୟର ସୁରକ୍ଷା, ସଂରକ୍ଷଣ ଓ ପ୍ରସାର ଦିଗରେ ଏହି ଧାରା ସାମ୍ବିଧାନିକ, ବୈଧାନିକ ତଥା ପ୍ରଶାସନିକ ସୁରକ୍ଷା ଯୋଗାଇଦେବ। ଏକଦା କେବଳ ଗ୍ରହଣ କରୁଥିବା ରାଜ୍ୟ ଭାବେ ବିବେଚିତ ହେଉଥିବା ଉତ୍ତରପୂର୍ବାଞ୍ଚଳ ଏବେ ବିକାଶର ଇଞ୍ଜିନ ହୋଇଛି ବୋଲି ମୋଦି କହିଥିଲେ। ତ୍ରୟୋଦଶ ଅର୍ଥ କମିଶନଙ୍କ ସମୟରେ ଏହି ଅଞ୍ଚଳକୁ ୯୦ ହଜାର କୋଟି ଟଙ୍କା ଅନୁଦାନ ମିଳିଥିବାବେଳେ ତାଙ୍କ ସରକାରରେ ଚତୁର୍ଦ୍ଦଶ ଅର୍ଥ କମିଶନରେ ଏହା ୩ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇଛି।
