କଟକ ଅଫିସ,୨୮ା୧୨-
ଡ୍ରିମ୍ସ ଗ୍ରାଉଣ୍ଡରେ ଚାଲିଥିବା ଉତ୍ତରାଖଣ୍ଡ ବିପକ୍ଷ ରଣ୍ଜୀ ଟ୍ରଫି କ୍ରିକେଟ ମ୍ୟାଚ୍ରେ ଘରୋଇ ଓଡ଼ିଶା ଦଳ ବିଜୟ ଦ୍ୱାରରେ ପହଞ୍ଚିଛି। ପ୍ରଥମ ଇନିଂସରେ ଓଡ଼ିଶା ୧୩୬ରନ ଅଗ୍ରଣୀ ହାସଲ କରିବା ପରେ ଉତ୍ତରାଖଣ୍ଡ ଦ୍ୱିତୀୟ ଇନିଂସ ଆରମ୍ଭ କରି ୪ ଉଇକେଟ ହରାଇ ୫୪ରନ କରିଛି। ଉତ୍ତରାଖଣ୍ଡ ୮୨ରନ ପଛରେ ଥିବା ବେଳେ ଓଡ଼ିଶାକୁ ବିଜୟ ପାଇଁ ୬ ଉଇକେଟ ଆବଶ୍ୟକ ରହିଛି। ଓଡ଼ିଶା ପକ୍ଷରୁ ଶାନ୍ତନୁ ମିଶ୍ର ୧୧୦ରନ୍ର ଇନିଂସ ଖେଳି ଦଳକୁ ଅଗ୍ରଣୀ କରିବାରେ ସହାୟକ ହୋଇଛନ୍ତି। ୧୩ଟି ପ୍ରଥମଶ୍ରେଣୀ ମ୍ୟାଚ୍ ଖେଳିବା ପରେ ଶାନ୍ତନୁ କ୍ୟାରିୟରର ପ୍ରଥମ ଶତକ ହାସଲ କରିଛନ୍ତି।
ଉତ୍ତରାଖଣ୍ଡର ପ୍ରଥମ ଇନିଂସ ୧୧୭ରନରେ ସୀମିତ ରହିବା ପରେ ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ପ୍ରଥମ ଇନିଂସ ବ୍ୟାଟିଂ ଜାରି ରଖିଥିବା ଓଡ଼ିଶା ୬ ଉଇକେଟ ହରାଇ ୧୪୫ କରିଥିଲା। ଶାନ୍ତନୁ ୫୪ରନରେ ଓ ଦେବବ୍ରତ ପ୍ରଧାନ ୨ରନରେ ଅପରାଜିତ ଥିଲେ। ଦେବବ୍ରତ ୧୪ରନ କରିବା ପରେ ପ୍ୟାଭିଲିୟନ ଫେରିଥିଲେ। ସନ୍ନି ରାଣାଙ୍କ ବଲରେ ଉଇକେଟ କିପର ସୌରଭ ରାୱତଙ୍କ ହାତରେ ଧରାପଡ଼ିଥିଲେ ଦେବବ୍ରତ। ପରେ ସୂର୍ଯ୍ୟକାନ୍ତ ପ୍ରଧାନ ଓ ରାଜେଶ ମହାନ୍ତି ଦ୍ରୁତ ବ୍ୟାଟିଂ କରିଥିଲେ। ବଡ଼ ଶଟ୍ ଖେଳିବାକୁ ଯାଇ ସୂର୍ଯ୍ୟକାନ୍ତ ୧୧ ଓ ରାଜେଶ ୧୭ରନରେ ଆଉଟ ହୋଇଥିଲେ। ଇତି ମଧ୍ୟରେ ୨୨୯ବଲରୁ ଶାନ୍ତନୁ କ୍ୟାରିୟରର ପ୍ରଥମ ତଥା ସ୍ମରଣୀୟ ଶତକ ହାସଲ କରିଥିଲେ। ୧୧୦ରନ କରି ଶାନ୍ତନୁ ଅନ୍ତିମ ବ୍ୟାଟ୍ସମ୍ୟାନ ଭାବେ ଆଉଟ ହୋଇଥିଲେ। ବସନ୍ତ ମହାନ୍ତି ୬ରନରେ ଅପରାଜିତ ଥିଲେ। ଉତ୍ତରାଖଣ୍ଡ ପକ୍ଷରୁ ପ୍ରଦୀପ ଚାମୋଲି, ସନ୍ନି ରାଣା ୩ଟି ଲେଖାଏ ଓ ଧନରାଜ ଶର୍ମା ୨ଟି ଉଇକେଟ ଅକ୍ତିଆର କରିଛନ୍ତି। ଦ୍ୱିତୀୟ ଇନିଂସ୍ ବ୍ୟାଟିଂ କରିଥିବା ଉତ୍ତରାଖଣ୍ଡ ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଓଡ଼ିଶା ପେସ୍ ବୋଲରମାନେ ପୁର୍ନବାର ଚମତ୍କାର ପ୍ରଦର୍ଶନ କରିଛନ୍ତି। ୩ରନରେ ଉତ୍ତରାଖଣ୍ଡ ୨ଟି ଉଇକେଟ ହରାଇଥିଲା। ଓପନର ତନ୍ମୟ ଶ୍ରୀବାସ୍ତବ ୨ରନରେ ଓ ଅଭନିଶ ସୁଧା ଖାତା ଖୋଲିବା ପୂର୍ବରୁ ବସନ୍ତଙ୍କ ଶିକାର ହୋଇଥିଲେ। ଅଧିନାୟକ ଉନ୍ମୁକ୍ତ ଚାନ୍ଦ ୧୩ରନରେ ରାଜେଶଙ୍କ ବଲରେ ଉଇକେଟ ହାତରେ ଧରାପଡ଼ିଥିଲେ। ପରେ ସୌରଭ ରାୱତ ୧୫ରନରେ ସୂର୍ଯ୍ୟକାନ୍ତଙ୍କ ଦ୍ୱାରା ଆଉଟ ହୋଇଥିଲେ। ୫୪ରନରେ ଉତ୍ତରାଖଣ୍ଡ ୪ଟି ଉଇକେଟ ହରାଇଥିଲା। ଦୀକ୍ଷାଂଶୁ ନେଗି ୨୩ରନରେ ଓ କର୍ନ କୌଶଲ କୌଣସି ରନ ନ କରି ଅପରାଜିତ ଅଛନ୍ତି। ଓଡ଼ିଶା ପକ୍ଷରୁ ବସନ୍ତଙ୍କୁ ୨ଟି, ରାଜେଶ ଓ ସୂର୍ଯ୍ୟକାନ୍ତଙ୍କୁ ଗୋଟିଏ ଲେଖାଏ ଉଇକେଟ ମିଳିଛି।
ସଂକ୍ଷିପ୍ତ ସ୍କୋର
ଉତ୍ତରାଖଣ୍ଡ ପ୍ରଥମ ଇନିଂସ: ୧୧୭। ଓଡ଼ିଶା ପ୍ରଥମ ଇନିଂସ: ୨୫୩/ଅଲଆଉଟ(ଶାନ୍ତନୁ ମିଶ୍ର-୧୧୦, ବିପ୍ଳବ ସାମନ୍ତରାୟ-୩୭, ପ୍ରଦୀପ ଚାମୋଲି-୩/୪୮, ସନ୍ନି ରାଣା-୩/୪୫)। ଉତ୍ତରାଖଣ୍ଡ ଦ୍ୱିତୀୟ ଇନିଂସ: ୫୪/୪(ଦୀକ୍ଷାଂଶୁ ନେଗି-୨୩*, ବସନ୍ତ ମହାନ୍ତି-୨/୧୮, ରାଜେଶ ମହାନ୍ତି-୧/୧୯, ସୂର୍ଯ୍ୟକାନ୍ତ ପ୍ରଧାନ-୧/୧୫)।
