ନୁର-ସୁଲତାନ(କାଜାଖସ୍ଥାନ),୧୫।୯(ପି.ଟି.)- ଏଠାରେ ଚାଲିଥିବା ରେସଲିଂ ବିଶ୍ୱ ଚାମ୍ପିୟନଶିପ୍ରେ ଭାରତୀୟ ରେସଲର ମାନେ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି। ରବିବାର ଭାରତୀୟ ଗ୍ରୀକୋ- ରୋମାନ ରେସଲରଙ୍କ ନୈରାଶ୍ୟଜନକ ପ୍ରଦର୍ଶନ ଜାରି ରହିଛି। ଫଳରେ ଭାରତୀୟ ରେସଲରଙ୍କ ଅଲିମ୍ପିକ୍ସ ଯୋଗ୍ୟତା ହାସଲ ନେଇ ଆଶଙ୍କା ସୃଷ୍ଟି ହୋଇଛି। ୬୭ କେ.ଜି. ବର୍ଗରେ ମନୀଷ, ୮୭ କେ.ଜି. ବର୍ଗରେ ସୁନିଲ କୁମାର ଓ ୯୭ କେ.ଜି. ବର୍ଗରେ ରବି ବିଦାୟ ନେଇଛନ୍ତି। ପ୍ରଥମ ଦିବସରେ ୪ଜଣ ରେସଲର ପ୍ରତିଯୋଗିତାରେ ଅବତୀର୍ଣ୍ଣ ହୋଇଥିଲେ। ୩ ଜଣ ଗୋଟିଏ ହେଲେ ବି ବାଉଟ ଜିତିପାରି ନ ଥିଲେ ଓ ଗୋଟିଏ ପଏଣ୍ଟ ମଧ୍ୟ ସ୍କୋର କରି ପାରି ନ ଥିଲେ। ତେବେ ରବି ଚାଇନିଜ ତାଇପେଇର ଚେଙ୍ଗ ହାଓ ଚେନ୍ଙ୍କୁ ହରାଇ ଗୋଟିଏ ବାଉଟ ଜିତିବାକୁ ସକ୍ଷମ ହୋଇଥିଲେ। ସେ ୫-୦ରେ ବିଜୟୀ ହୋଇଥିଲେ। ତେବେ ପରବର୍ତ୍ତୀ ବାଉଟ୍ରେ ରବି ଚେକ ଗଣରାଜ୍ୟର ଅର୍ଥର ଓମାରୋଭଙ୍କଠାରୁ ୭-୦ରେ ପରାସ୍ତ ହୋଇ ବିଦାୟ ନେଇଛନ୍ତି।
