କଟକ ଅଫିସ,୨୨ା୧:ଏଣିକି ରାତି ଅଧରେ ଏସ୍ସିବି ମେଡିକାଲକୁ ଆସୁଥିବା ରୋଗୀଙ୍କୁ ସମସ୍ତ ପ୍ରକାର ସରକାରୀ ସହାୟତା ଯୋଗାଇ ଦିଆଯିବ। ରୋଗୀଙ୍କୁ ୨୪ ଘଣ୍ଟିଆ ସହାୟତା ଯୋଗାଇବା ପାଇଁ ଦିନରାତି ଖୋଲା ରହିବ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କେୱାଇ)ର କାଉଣ୍ଟର। ରୋଗୀ ଯେଉଁ ଔଷଧ ଆବଶ୍ୟକ କରୁଥିବେ ତାହା ଏହି କାଉଣ୍ଟରରୁ ମଞ୍ଜୁର କରାଯିବ। ଯଦି ମେଡିକାଲରେ ଡାକ୍ତର ପରାମର୍ଶ କରିଥିବା ଔଷଧ ଓ ଉପକରଣ ଉପଲବ୍ଧ ନ ଥିବ ତେବେ ଉକ୍ତ କାଉଣ୍ଟର ଜରିଆରେ ଡାକ୍ତରଙ୍କ ଚିଠା ଅନୁଯାୟୀ ତାହାକୁ ଲୋକାଲ ପର୍ଚେଜ କରାଯିବ। ଲୋକାଲ ପର୍ଚେଜ ପାଇଁ ଜରୁରିକାଳୀନ ସ୍ଥିତିରେ କୌଣସି ଉଚ୍ଚସ୍ତରୀୟ ଅଧିକାରୀଙ୍କ ଆବଶ୍ୟକତା ପଡିବନି। ରୋଗୀଙ୍କୁ ଚିକିତ୍ସା କରୁଥିବା ଡାକ୍ତରଙ୍କ ଦସ୍ତଖତରେ ଏହିସବୁ ଔଷଧ ଓ ଉପକରଣ କ୍ରୟ କରାଯାଇପାରିବ ବୋଲି ଷ୍ଟୋର ମେଡିକାଲ ଅଫିସର ଡା. ସତ୍ୟଶ୍ରୀ ରାୟ ସୂଚନା ଦେଇଛନ୍ତି। ରୋଗୀ ଯେପରି ପକେଟରୁ ଗୋଟିଏ ଟଙ୍କା ଖର୍ଚ୍ଚ ନ କରନ୍ତି ସେଥିପ୍ରତି ମେଡିକାଲ କର୍ତ୍ତୃପକ୍ଷ ଧ୍ୟାନ ଦେବେ। ଏଥିନିମନ୍ତେ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ମେଡିକାଲର ପ୍ରତ୍ୟେକ ବିଭାଗର ମୁଖ୍ୟମାନଙ୍କଠାରୁ ସେମାନଙ୍କର ଦୈନନ୍ଦିନ ଆବଶ୍ୟକ କରୁଥିବା ଔଷଧ ଓ ଉପକରଣର ତାଲିକା ମଗାଯାଇଛି। ପ୍ରତ୍ୟେକ ବିଭାଗ ପକ୍ଷରୁ ଏକ ବାର୍ଷିକ ଆକଳନ ତାଲିକା ସରକାରଙ୍କୁ ପ୍ରଦାନ କରାଯାଇଛି। ଏହି ତାଲିକାକୁ ଦେଖିଲେ ଏଥିନିମନ୍ତେ ପାଖାପାଖି ୧ହଜାର କୋଟିର ଏକ ବଜେଟ୍ ପ୍ରସ୍ତୁତ ହୋଇଛି। ଆସନ୍ତା ୨୪ ତାରିଖରେ ରାଜ୍ୟ ସ୍ବାସ୍ଥ୍ୟ ସଚିବ ଏସ୍ସିବି ମେଡିକାଲ ଗସ୍ତରେ ଆସୁଛନ୍ତି। ଏ ନେଇ ସଚିବ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ କରିବେ ବୋଲି ଜଣାପଡ଼ିଛି।
ସୂଚନାଥାଉ କି, ଏସ୍ସିବି ମେଡିକାଲରେ ମାଗଣା ଚିକିତ୍ସାକୁ ନେଇ ଅନେକ ଦ୍ୱନ୍ଦ୍ୱ ରହିଛି। ବିଶେଷକରି ସରକାର ସମସ୍ତ ବ୍ୟବସ୍ଥାକୁ ମାଗଣା କରୁଥିବାବେଳେ ରୋଗୀ ସଂଖ୍ୟା ସେହି ହାରରେ ବୃଦ୍ଧି ପାଉଛି। ମାତ୍ର ଭିତ୍ତିଭୂମିରେ ପରିବର୍ତ୍ତନ ଅଣାଯାଉନାହିଁ। ଉଦାହରଣ ଭାବେ ମେଡିକାଲର ରେଡିଓଲୋଜି ବିଭାଗ ପକ୍ଷରୁ ସ୍ବାସ୍ଥ୍ୟ ସଚିବଙ୍କୁ ଦିଆଯାଇଥିବା ତାଲିକା ଅନୁଯାୟୀ, ଉକ୍ତ ବିଭାଗରେ ୧୦ଟି ଗୁରୁତ୍ୱପୂର୍ଣ୍ଣ ପଦବୀ ଖାଲି ପଡ଼ିଛି। ଗତ ୫ ବର୍ଷରେ ଏହି ବିଭାଗରେ ୫୩ ପ୍ରତିଶତ ରୋଗୀଙ୍କ ହାର ବୃଦ୍ଧି ପାଇଥିବା କୁହାଯାଇଛି। ଏଠାରେ ଏକ୍ସ-ରେ, ସ୍ପେଶାଲ ଇନ୍ଭେଷ୍ଟିଗେଶନ, ମମୋଗ୍ରାଫି, ୟୁସିଜି, ଡପ୍ଲର୍ ଓ ସିଟି ସ୍କାନ ଆଦି କରାଯାଉଥିବାବେଳେ ରେଡିଓଗ୍ରାଫର, ସିନିୟର ରେସିଡେଣ୍ଟ ଓ ସହକାରୀ ପ୍ରଫେସର ପଦବୀ ଖାଲି ପଡ଼ିଛି। ସେହିପରି ଗତ ୬ ବର୍ଷ ହେବ ରେଡିଓଲୋଜି ବିଭାଗ ଉପରେ ଶିଶୁଭବନ ଭାର ପଡୁଥିବା କୁହାଯାଇଛି। ଏହାବାଦ ଅନ୍ୟ କେତେକ ପ୍ରସଙ୍ଗକୁ ଦେଖିଲେ ମଧ୍ୟ ଏସ୍ସିବି ମେଡିକାଲ ବିବାଦ ମଧ୍ୟକୁ ଟାଣି ହୋଇ ଆସୁଛି। ରାଜ୍ୟରେ କିଡ୍ନୀ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଏଠାରେ କିଡ୍ନୀ ରୋଗୀଙ୍କ ଡାଏଲିସିସ୍ ପାଇଁ ଆବଶ୍ୟକ ଫ୍ଲୁଇଡ୍ ଦୀର୍ଘଦିନ ହେବ ମିଳି ନ ଥିବାରୁ ନିକଟରେ ରୋଗୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ମୋଟାମୋଟି ଭାବେ କହିବାକୁ ଗଲେ ସରକାର ଆବଶ୍ୟକ ପରିମାଣର ଔଷଧ ଯୋଗାଇପାରୁ ନ ଥିବାରୁ ରୋଗୀମାନେ ଅନେକ ସମୟରେ ହୀନସ୍ତା ଭୋଗୁଛନ୍ତି। ଏ ସମ୍ପର୍କରେ ମେଡିକାଲ ପ୍ରଶାସନିକ ଅଧିକାରୀ କଳ୍ପତରୁ ବେହେରା କୁହନ୍ତି, ସମସ୍ତ ବ୍ୟବସ୍ଥାକୁ ବ୍ୟବସ୍ଥିତ କରିବା ନିମନ୍ତେ ଯୋଜନା ପ୍ରସ୍ତୁତ ହୋଇଛି। ଭିତ୍ତିଭୂମି ସହିତ ମାନବସମ୍ବଳରେ ବିକାଶ କରାଯିବ। ସରକାର ଏହାକୁ ଗୁରୁତ୍ୱର ସହିତ ଗ୍ରହଣ କରିଛନ୍ତି।
