ଓଡ଼ଗାଁ,୨୨ା୧(ସ୍ବ.ପ୍ର.): ନୟାଗଡ଼ ଜିଲା ଓଡ଼ଗାଁ ଓ ଶରଣକୁଳ ଥାନା ଅଞ୍ଚଳରେ ଦିନକୁ ବେଆଇନ ହମ୍ପ୍ସ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଦୁର୍ଘଟଣାର ଦ୍ୱାହି ଦେଇ ଲୋକେ ପ୍ରଶାସନର ବିନା ଅନୁମତିରେ ରାତାରାତି ହମ୍ପ୍ସ ନିର୍ମାଣ କରୁଛନ୍ତି। ନିକଟସ୍ଥ କୈବଲ୍ୟପୁର ଛକରେ କେତେକ ବ୍ୟବସାୟୀ ରାସ୍ତା ଉପରକୁ ମାଡି ଆସି ବ୍ୟବସାୟ କରୁଥିବାରୁ ସେଠାରେ ବିଭିନ୍ନ ସମୟରେ ଟ୍ରାଫିକ୍ ସମସ୍ୟା ସୃଷ୍ଟି ହେବା ସ୍ବାଭାବିକ। ଏପରିସ୍ଥଳେ ସେମାନେ ରାସ୍ତା ଅବରୋଧରୁ ନିବୃତ୍ତ ହେବା ବଦଳରେ ଓଡ଼ଗାଁ-ବାହାଡ଼ାଝୋଲା ରାସ୍ତା ଉପରେ ରାତାରାତି ସିିମେଣ୍ଟ କଂକ୍ରିଟରେ ୩ଟି ହମ୍ପ୍ସ ନିର୍ମାଣ କରି ଲୋକଙ୍କ ପାଇଁ ସମସ୍ୟା ସୃଷ୍ଟି କରିଛନ୍ତି। ସ୍ଥାନୀୟ ସିନେମା ହଲ ଛକରେ କେତେକ ବ୍ୟବସାୟୀ ନିଜ ଘର ଆଗରେ ଗ୍ୟାସ ସିଲିଣ୍ଡର ଓ ବେପାର ସାମଗ୍ରୀ ମହଜୁଦ କରିବା ସହିତ ରାସ୍ତା ପାର୍ଶ୍ୱ ଅବରୋଧ କରି ରଖୁଥିବାରୁ ଉକ୍ତ ରାସ୍ତାରେ ଯାନବାହନ ଚଳାଚଳ ନିମନ୍ତେ ଚାଳକମାନେ ଅସୁବିଧାର ସମ୍ମୁଖୀନ ହେଉଛନ୍ତି। ସୋମବାର ରାତିରେ ଉକ୍ତ ସ୍ଥାନରେ ମାତ୍ର ୨୦ ଫୁଟ ବ୍ୟବଧାନରେ ଦୁଇଟି କଂକ୍ରିଟ ହମ୍ପ୍ସ ନିର୍ମାଣ କରାଯିବା ସହିତ ଏହାକୁ ସୁରକ୍ଷା ନିମନ୍ତେ ରାସ୍ତା ଉପରେ ମାଙ୍କଡା ପଥର ରଖି ରାସ୍ତା ଅବରୋଧ କରାଯାଇଥିଲା। ଏ ସମ୍ପର୍କରେ ସୂଚନା ମିଳିବା ପରେ ଆମ ପ୍ରତିନିଧି ଘଟଣାସ୍ଥଳରେ ପହଞ୍ଚି ଫଟୋ ଉତ୍ତୋଳନ କରିଥିଲେ। ହେଲେ ସ୍ଥାନୀୟ ଲୋକେ ଫଟୋ ଉଠାଇବାକୁ ବିରୋଧ କରିବା ସହିତ ବିଭାଗୀୟ ଅଧିକାରୀଙ୍କୁ ଜଣାଇଥିବା କହିଥିଲେ। ଏ ନେଇ ପ୍ରତିନିଧି ପିଡବ୍ଲ୍ୟୁଡି ସହକାରୀ ଯନ୍ତ୍ରୀ ବସନ୍ତ କୁମାର ବେହେରା ଓ ଥାନା ଅଧିକାରୀ ବଂଶୀଧର ବେହେରାଙ୍କ ଦୃଷ୍ଟି ଆକର୍ଷଣ କରିଥିଲେ। ଉଭୟେ ଘଟଣାସ୍ଥଳରେ ପହଞ୍ଚତ୍ ବେଆଇନ ହମ୍ପ୍ସ ଭାଙ୍ଗିଦେବାକୁ ଲୋକଙ୍କୁ ତାଗିଦ କରିଆସିଥିବା ପ୍ରକାଶ କରିଛନ୍ତି। ସେହିପରି ରାସ୍ତା ଉପରେ ରନ୍ଧନ ଗ୍ୟାସ ସିଲିଣ୍ଡର ବେପାର ହେଉଥିବା ନେଇ ଅଗ୍ନିଶମ ଅଧିକାରୀ ପ୍ରତାପ ପ୍ରଧାନ ଓ ବ୍ଲକ ଯୋଗାଣ ଅଧିକାରୀ ସୁବ୍ରତ କୁମାର ମଲ୍ଲିକଙ୍କୁ ପଚାରିବାରୁ ଉଭୟ ସମ୍ପୃକ୍ତ ଦୋକାନୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ନିକଟସ୍ଥ ନନ୍ଦିଘୋର ଓ ଶରଣକୁଳରେ ମଦ୍ୟପ ଗାଡି ଚାଳକଙ୍କ ବେପରୁଆ ଗାଡି ଚାଳନାରୁ ଦୁର୍ଘଟଣା ଘଟି ଦୁଇଜଣ ପ୍ରାଣ ହରାଇଥିଲେ। ହେଲେ ସେଠାରେ ଗ୍ରାମବାସୀଙ୍କ ଜିଦ୍ ଆଗରେ ପ୍ରଶାସନ ଅସହାୟତା ପ୍ରକାଶ କରିବା ସହିତ ନନ୍ଦିଘୋରରେ ୩୦ ଓ ଶରଣକୁଳରେ ୬ଟି ସିମେଣ୍ଟ କଂକ୍ରିଟ ହମ୍ପ୍ସ ନିର୍ମାଣ କରାଯାଇଥିଲା। ଏହିସବୁ ବେଆଇନ ହମ୍ପ୍ସ ଯୋଗୁ ଉକ୍ତ ରାସ୍ତାରେ ଯାତାୟାତ କରୁଥିବା ରୋଗୀ, ବୃଦ୍ଧାବୃଦ୍ଧ ଓ ଗର୍ଭବତୀ ମହିଳାଙ୍କ ଦୁର୍ଦ୍ଦଶା ଅବର୍ଣ୍ଣନୀୟ। ଜିଲା ପ୍ରଶାସନ ଏ ନେଇ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି।
