ଗଣିଆ,୨୧ା୧(ଡି.ଏନ.ଏ.): ଗଣିଆ ମହାବୀର ସାଂସ୍କୃତିକ ପରିଷଦ ଆନୁକୂଲ୍ୟରେ ଗଣିଆ ମିନି ଷ୍ଟାଡିୟମରେ ସୋମବାର ରାଜ୍ୟସ୍ତରୀୟ ଗଣିଆ କପ ଫୁଟବଲ ଟୁର୍ନାମେଣ୍ଟ ୨୦୨୦ ଉଦ୍ଘାଟିତ ହୋଇଯାଇଛି। ରାଜ୍ୟ କୃଷିମନ୍ତ୍ରୀ ଡ. ଅରୁଣ କୁମାର ସାହୁ ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଉଦ୍ଘାଟନ କରିଥିଲେ। ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ଗଣିଆ ପଞ୍ଚାୟତ ସମିତି ଅଧ୍ୟକ୍ଷ ଶେଷଦେବ ସ୍ବାଇଁ, ଜିଲା ପରିଷଦ ସଭ୍ୟ ମହେଶ୍ୱର ମହାରଣା ସମ୍ମାନିତ ଅତିଥି ଭାବେ ଯୋଗଦାନ କରିଥିଲେ। ଉଦ୍ଘାଟନୀ ମ୍ୟାଚ ମା’ ଭୁଆଶୁଣୀ କ୍ଲବ, ବିଡ଼ାନାସୀ, କଟକ ଓ ଉକତ୍ଳ ସ୍ପୋର୍ଟିଂ କ୍ଲବ, ଜଟଣୀ ମଧ୍ୟରେ ଅନୁଷ୍ଠିତ ହୋଇଥିଲା । ନିର୍ଦ୍ଧାରିତ ସମୟ ଶେଷ ସୁଦ୍ଧା ଉଭୟ ଦଳ ଗୋଟିଏ ଲେଖାଏ ଗୋଲ ସ୍କୋର କରିବାରୁ ଖେଳ ଅମୀମାଂସିତ ରହିଥିଲା। ପରେ ପେନାଲ୍ଟି ଶୁଟ୍ଆଉଟରେ ଜଟଣୀ ୫ ଗୋଲ କରିଥିବାବେଳେ କଟକ ଦଳ ୬ ଗୋଲ କରି ବିଜୟୀ ହୋଇଥିଲା। ୱାଲିପୁର ଗ୍ରାମର ନିତ୍ୟାନନ୍ଦ ରାଉତ ଶ୍ରେଷ୍ଠ ଦର୍ଶକ ବିବେଚିତ ହୋଇଥିଲେ। ରେଫରି ଭାବେ ରାଉରକେଲାର ପ୍ରଶାନ୍ତ କୁମାର ପାଲ, ଭୁବନେଶ୍ୱରର ଦୁର୍ଗା ଆଚାର୍ଯ୍ୟ, କଟକର ପ୍ରଦୀପ୍ତ କୁମାର ଦାଶ ଓ ବ୍ରହ୍ମପୁରର ସୁଜିତ କୁମାର ପାତ୍ର ଖେଳ ପରିଚାଳନା କରିଥିଲେ । ଆୟୋଜକ ମହାବୀର ସାଂସ୍କୃତିକ ପରିଷଦର ସଭାପତି ଦେବାନନ୍ଦ ମିଶ୍ର, ସମ୍ପାଦକ ବିଶ୍ୱରଞ୍ଜନ ସେଠୀଙ୍କ ସମେତ ସମସ୍ତ ସଭ୍ୟ ପରିଚାଳନାରେ ସହଯୋଗ କରିଥିଲେ। ମଙ୍ଗଳବାର ୟୁନାଇଟେଡ ଫୁଟବଲ କ୍ଲବ, ବଲାଙ୍ଗୀର ଓ ପତାକା କ୍ଲବ, ଅନୁଗୋଳ ମଧ୍ୟରେ ଖେଳ ଅନୁଷ୍ଠିତ ହେବ ବୋଲି କମିଟି ତରଫରୁ ସୂଚନା ମିଳିଛି ।
