ଭୁବନେଶ୍ୱର,୧୭।୧୧(ବ୍ୟୁରୋ): ରାଜ୍ୟରେ ବର୍ତ୍ତମାନ ୭୨ହଜାର ୫୮୭ଟି ଅଙ୍ଗନଓ୍ବାଡ଼ି ଓ ମିନି ଅଙ୍ଗନବାଡ଼ି କେନ୍ଦ୍ର ଚାଲୁଛି। ଏଥିମଧ୍ୟରେ ୪୦ହଜାର ୭୮୮ କେନ୍ଦ୍ର ନିଜସ୍ବ ଘରେ ଓ ୪ ହଜାର ୭୦୨ଟି ଭଡ଼ା ଘରେ ଚାଲୁଛି। ବର୍ତ୍ତମାନ ୧୦ହଜାର ୫୦୭ ଅଙ୍ଗନଓ୍ବାଡ଼ି କେନ୍ଦ୍ରର ନିର୍ମାଣ ଚାଲିଛି। ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ରାଜ୍ୟରେ ବର୍ତ୍ତମାନ ୨ହଜାର ୦୬୩ଟି ଅଙ୍ଗନଓ୍ବାଡ଼ି କେନ୍ଦ୍ର ଭାଙ୍ଗିରୁଜି ଯାଇଛି। ସେଥିମଧ୍ୟରୁ ୮୦୬ କେନ୍ଦ୍ର ଚଳିତ ଆର୍ଥିକ ବର୍ଷରେ ନିର୍ମାଣ ହେବ ବୋଲି ମହିଳା ଓ ଶିଶୁ ବିକାଶ ମନ୍ତ୍ରୀ ଏବଂ ମିଶନ ଶକ୍ତି ମନ୍ତ୍ରୀ ଟୁକୁନି ସାହୁ କହିଛନ୍ତି। ଶନିବାର ବିଧାନସଭାରେ ବିଧାୟକ ଭୂପିନ୍ଦର ସିଂହଙ୍କ ଏକ ପ୍ରଶ୍ନର ଉତ୍ତର ରଖି ମନ୍ତ୍ରୀ ଏହି ସୂଚନା ଦେଇଛନ୍ତି। ସେପଟେ ମନ୍ତ୍ରୀଙ୍କ ଏଭଳି ତଥ୍ୟ ସାମ୍ନାକୁ ଆସିବା ପରେ ଓଡ଼ିଶା ଅଭିଭାବକ ମହାସଂଘ ତୀବ୍ର ନିନ୍ଦା କରିଛି। ଶିଶୁଙ୍କ ମୁଣ୍ଡ ଉପରେ ବିପଦ ରହିଛି। ଦେଶର ଭବିଷ୍ୟତ ବିପଦପୂର୍ଣ୍ଣ ଘରେ ଶିକ୍ଷା ନେଉଛନ୍ତି ବୋଲି ସଂଘ କହିଛି। ତେଣୁ ତୁରନ୍ତ ବିପଦପୂର୍ଣ୍ଣ ଥିବା ସେହି ୨,୦୬୩ ଅଙ୍ଗନଓ୍ବାଡ଼ି କେନ୍ଦ୍ରକୁ ବନ୍ଦ କରାଯାଉ। ଯଦି ସମ୍ଭବ ହେଉଛି ତାହାକୁ ଅନ୍ୟ ଘରକୁ ସ୍ଥାନାନ୍ତର କରାଯାଉ ବୋଲି ସଂଘ ଦାବି କରିଛି। ସଂଘ ଅଧ୍ୟକ୍ଷ ବାସୁଦେବ ଭଟ୍ଟ କହିଛନ୍ତି, ଏହା ଏକ ଦୁଃଖଦ ଘଟଣା। ଛୋଟ ପିଲା ଏପରି ବିପଦସଙ୍କୁଳ ଘରେ ପାଠ ପଢ଼ିବା ବିପଦଜନକ। ସରକାର ଏଭଳି ତଥ୍ୟ ପ୍ରକାଶ କରିବା ପୂର୍ବରୁ ସେସବୁ କେନ୍ଦ୍ରକୁ ବନ୍ଦ କରିଦେବା ଉଚିତ ଥିଲା।
