ନୂଆଦିଲ୍ଲୀ, ୨୨।୧ (ପି.ଟି.): ନୀତୀଶ ରାଣାଙ୍କ କ୍ୟାରିୟର ଶ୍ରେଷ୍ଠ ଶତକୀୟ ଇନିଂସ ବଳରେ ଏଠାରେ ଖେଳାଯାଇଥିବା ରଣ୍ଜୀ ଟ୍ରଫିର ଏକ ମ୍ୟାଚ୍ରେ ଦିଲ୍ଲୀ ୬ ଉଇକେଟ୍ରେ ଡିଫେଣ୍ଡିଂ ଚାମ୍ପିୟନ ବିଦର୍ଭକୁ ପରାସ୍ତ କରିଛି। ବିଦର୍ଭ ପକ୍ଷରୁ ଧାର୍ଯ୍ୟ ୩୪୭ ରନର ଏକ ଚ୍ୟାଲେଞ୍ଜିପୂର୍ଣ୍ଣ ଟାର୍ଗେଟ୍କୁ ପିଛ କରି ଘରୋଇ ଦିଲ୍ଲୀ ଅନ୍ତିମ ଦିବସରେ ବୁଧବାର ୪ ଉଇକେଟ୍ ହରାଇ ହାସଲ କରିନେଇଛି। ଆଇପିଏଲ୍ରେ ନିଜର ବିସ୍ଫୋରକ ବ୍ୟାଟିଂ ପାଇଁ ପରିଚିତ ବାମହାତୀ ବ୍ୟାଟ୍ସମ୍ୟାନ ରାଣା ୬୮ ବଲରୁ ୧୦୫ ରନ (୮ ଚୌକା, ୭ ଛକା) ଓ ଉଇକେଟ୍କିପର ଅନୁଜ ରାଓ୍ବତ ୧୮ ରନ କରି ଅପରାଜିତ ରହିଥିଲେ। ଅନ୍ୟମାନଙ୍କ ମଧ୍ୟରେ ଅଧିନାୟକ ଧ୍ରୁବ ସୋରୀ ୪୪, ହିତେନ ଦଲଲ ୮୨, କୁନାଲ ଚାଣ୍ଡେଲା ୭୫ ରନ କରିଥିଲେ। ମ୍ୟାଚ୍ ବିଜୟୀ ଇନିଂସ ଲାଗି ନୀତୀଶ ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ଦିଲ୍ଲୀର ଏହି ସ୍ମରଣୀୟ ରନ୍ ଚେଜ୍ ଯୋଗୁ ବିଦର୍ଭ ୩ ବର୍ଷ ପରେ ପ୍ରଥମ ଶ୍ରେଣୀ କ୍ରିକେଟ୍ରେ ପ୍ରଥମ ପରାଜୟର ସାମ୍ନା କରିଛି। ବିଜୟ ସହ ଦିଲ୍ଲୀ ୫ ମ୍ୟାଚ୍ରୁ ୧୬ ପଏଣ୍ଟ ପାଇ ଗ୍ରୁପ୍- ଏ ଓ ବି’ରେ ୮ମ ସ୍ଥାନରେ ରହିଛି। ଅପରପକ୍ଷରେ ବିଦର୍ଭ ୧୭ ପଏଣ୍ଟ ସହ ଏହି ଗ୍ରୁପ୍ର ୬ଷ୍ଠ ସ୍ଥାନ ଲାଭ କରିଛି।
ସଂକ୍ଷିପ୍ତ ସ୍କୋର-
ବିଦର୍ଭ ପ୍ରଥମ ଇନିଂସ- ୧୭୯/୧୦
ଦିଲ୍ଲୀ ପ୍ରଥମ ଇନିଂସ- ୧୬୩/୧୦
ବିଦର୍ଭ ୨ୟ ଇନିଂସ- ୩୩୦/୩ (ଘୋଷଣା)
ଦିଲ୍ଲୀ ୨ୟ ଇନିଂସ- ୩୪୮/୪
