ରଣପୁର,୧୪ା୫ (ସ୍ବ.ପ୍ର.)- ପୁରୀ ଶ୍ରୀମନ୍ଦିରରେ ଠାକୁରଙ୍କ ନୀତିକାନ୍ତି ସହ ସାମଞ୍ଜସ୍ୟ ରହୁଥିବା ରଣପୁର ଜଗନ୍ନାଥ ମନ୍ଦିରରେ ମଧ୍ୟ ବାରମାସରେ ତେରପର୍ବ ପାଳିତ ହୋଇଥାଏ। ତନ୍ମଧ୍ୟରୁ ଚନ୍ଦନ ଯାତ୍ରା ଅନ୍ୟତମ। ଠାକୁରଙ୍କ ଜଳକ୍ରୀଡାକୁ ଚନ୍ଦନ ଯାତ୍ରା କୁହାଯାଏ। ଅକ୍ଷୟ ତୃତୀୟାଠାରୁ ଆରମ୍ଭ ହୋଇଥିବା ଏହି ଯାତ୍ରା ୨୧ଦିନ ଧରି ଅନୁଷ୍ଠିତ ହୋଇଥାଏ। ମନ୍ଦିରରେ ଥିବା ଦୋଳଗୋବିନ୍ଦଙ୍କ ସହିତ ପଞ୍ଚୁ ମହାଦେବ ବଧି ପୋଖରୀରେ ଜଳକ୍ରୀଡା କରିଥାନ୍ତି। ବୈଶାଖ ମାସର ଅସହ୍ୟ ରୌଦ୍ରତାପ ଠାକୁରମାନଙ୍କୁ ପ୍ରଭାବିତ କରିଥାଏ । ଏଥିରୁ ରକ୍ଷା ପାଇବା ପାଇଁ ଠାକୁରମାନେ ଜଳ କ୍ରୀଡା କରିବାର ପରମ୍ପରା କେଉଁ ଆବାହମାନ କାଳରୁ ରହିଛି ା ଏହି ପରମ୍ପରାକୁ ଦୃଷ୍ଟିରେ ରଖି ପ୍ରତ୍ୟହ ଅପରାହ୍ନରେ ଠାକୁରମାନେ ଜଗନ୍ନାଥ ମନ୍ଦିରଠାରୁ ଶୋଭାଯାତ୍ରାରେ ଆସି ବଧିପୋଖରୀରେ ଚାପ ଖେଳିଥାନ୍ତି। ଚଳିତବର୍ଷ ବାତ୍ୟା ଫନୀ ଯୋଗୁ ଶ୍ରୀ ଜୀଉଙ୍କ ଶୋଭାଯାତ୍ରା ଓ ଚାପ ଖେଳ ଆଡମ୍ବର ସହକାରେ ହେଉନାହିଁ ବୋଲି ଭକ୍ତମାନେ ପ୍ରକାଶ କରିଛନ୍ତି। ବଧି ପୁଷ୍କରିଣୀ ମଝିରେ ଥିବା ଚାପଘରେ ଠାକୁରମାନେ ଚାପ ଖେଳିଥାନ୍ତି। ସେଠାରେ ନୀତିକାନ୍ତି କରାଯାଇ ଠାକୁରମାନଙ୍କୁ ଜଗତି ଉପରେ ବିଜେ କରାଯାଇ ଜଳ ଲାଗି କରାଯାଇଥାଏ। ପରେ ଠାକୁରମାନଙ୍କ ବେଶ କରାଯାଇ ଶୀତଳ ମଣୋହି ପଞ୍ଚ ଉପଚାରରେ ପୂଜା ପାଇଥାନ୍ତି। ପୁନଶ୍ଚ ଠାକୁରମାନେ ବିଭିନ୍ନ ବେଶ ହୋଇ ଡଙ୍ଗାରେ ଚାପକ୍ରୀଡା କରିଥାନ୍ତି। ଏହା ଦେଖିବା ପାଇଁ ରାତ୍ରରେ ଆଖପାଖ ଅଞ୍ଚଳରୁ ବହୁ ଭକ୍ତଙ୍କ ସମାଗମ ହୋଇଥାଏ ା ମଧ୍ୟରାତ୍ରରେ ଠାକୁରମାନେ ମନ୍ଦିରକୁ ଫେରିଯାଇଥାନ୍ତି।
