ନୂଆଦିଲ୍ଲୀ,୨।୨: ଆଦର୍ଶ ଆଚରଣ ବିଧି ଉଲ୍ଲଂଘନ ଅଭିଯୋଗ କରି ନିର୍ବାଚନ କମିଶନଙ୍କ ଦ୍ୱାରସ୍ଥ ହୋଇଛି ଆମ ଆଦମୀ ପାର୍ଟି(ଏଏପି)। ଦିଲ୍ଲୀ ବିଧାନସଭା ନିର୍ବାଚନ ପାଖେଇ ଆସୁଥିବା ବେଳେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ତଥା ଭାରତୀୟ ଜନତା ପାର୍ଟି(ଭାଜପା) ନେତା ଯୋଗୀ ଆଦିତ୍ୟନାଥଙ୍କ ବିରୋଧରେ ଆଦର୍ଶ ଆଚରଣ ବିଧି ଉଲ୍ଲଂଘନ ଅଭିଯୋଗ କରିଛି ଏଏପି। ଏଏପି କହିଛି ଦିଲ୍ଲୀ ବିଧାନସଭା ନିର୍ବାଚନ ପର୍ଯ୍ୟନ୍ତ ଯୋଗୀଙ୍କୁ ବାସନ୍ଦ କରାଯାଉ ଓ ତାଙ୍କ ନାଁରେ ଏଫ୍ଆଇଆର୍ ଦିଆଯାଉ। ଅନ୍ୟପକ୍ଷେ ଏଏପି ନେତା ସଞ୍ଜୟ ସିଂ କହିଛନ୍ତି, ଯୋଗୀ ଆଦିତ୍ୟନାଥ କହିଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲଙ୍କର ପାକିସ୍ତାନ ସହ ସମ୍ପର୍କ ରହିଛି। ଯୋଗୀ ଏହା ପ୍ରମାଣ କରି ଦେଖାନ୍ତୁ। ତେବେ ଯୋଗୀଙ୍କର ଏହି କଥାକୁ ନେଇ ତାଙ୍କୁ ଗିରଫ କରାଯାଉ ଓ ଜେଲ ପଠାଯାଉ ବୋଲି ସଞ୍ଜୟ ଦାବି କରିଛନ୍ତି। ନିର୍ବାଚନ କମିଶନ ଏହାପରେ କହିଁକି ଚୁପ୍ ବସିଛନ୍ତି ବୋଲି ସେ ପ୍ରଶ୍ନ କରିଛନ୍ତି। ଦିଲ୍ଲୀରେ ଯୋଗୀଙ୍କ ନିର୍ବାଚନ ପ୍ରଚାରକୁ ବ୍ୟାନ କରାଯାଉ ବୋଲି ମଧ୍ୟ ସଞ୍ଜୟ କହିଛନ୍ତି।
