ଜଳେଶ୍ୱର, ୩ । ୧୧(ଡି.ଏନ.ଏ.)-ଦକ୍ଷିଣ-ପୂର୍ବ ରେଳପଥର ୬୮୧୦୯ ନଂ. ଖଡ଼ଗପୁର-ଯାଜପୁର(କେଉଁଝର ରୋଡ଼) ମେମୁ ଲୋକାଲ ପାସେଞ୍ଜର ଟ୍ରେନ୍ର ପ୍ରତ୍ୟେକ ଦିନ ବିଳମ୍ବ ହେଉଥିବାରୁ ଯାତ୍ରୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସ୍ଥାନୀୟ ଅଧିବାସୀ ତଥା ଟ୍ରେନ ଯାତ୍ରୀମାନେ ଶନିବାର ଏକ ଦାବିପତ୍ର ରେଳମନ୍ତ୍ରୀ ପୀୟୁଷ ଗୋଏଲଙ୍କ ଉଦ୍ଦେଶ୍ୟରେ ଜଳେଶ୍ୱର ଷ୍ଟେଶନ ମ୍ୟାନେଜରଙ୍କୁ ପ୍ରଦାନ କରିଛନ୍ତି।
ଜଳେଶ୍ୱରରୁ ବାଲେଶ୍ୱର ଯିବା ପାଇଁ ସରକାରୀ ଚାକିରିଆ ତଥା ଅନ୍ୟ ଯାତ୍ରୀମାନେ ଅପରାହ୍ନରେ ଏକମାତ୍ର ଟ୍ରେନ୍ ୬୮୧୦୯ ନଂ ଖଡ଼ଗପୁର-ଯାଜପୁର (କେଉଁଝର ରୋଡ଼) ମେମୁ ଲୋକାଲ ପାସେଞ୍ଜର ଟ୍ରେନ ଉପରେ ନିର୍ଭର କରିଥାନ୍ତି। ପୂର୍ବରୁ ଏହି ଟ୍ରେନର ସମୟ ଅପରାହ୍ନ ୩ଟା ୫୫ମି.ରେ ଖଡ଼ଗପୁର ଷ୍ଟେଶନରୁ ଛାଡ଼ି ବାଲେଶ୍ୱରରେ ୬ଟା ୩୦ମି.ରେ ପହଞ୍ଚୁଥିଲା। କିନ୍ତୁ ନୂଆ ସମୟ ଅନୁଯାୟୀ ଖଡ଼ଗପୁରଠାରୁ ଅପରାହ୍ନ ୪ଟା ୫୦ରେ ଛାଡ଼ି ଜଳେଶ୍ୱରଠାରେ ଅପରାହ୍ନ ୬ଟା ୯ମି.ରେ ଓ ବାଲେଶ୍ୱରଠାରେ ୭ଟା ୫ରେ ପହଞ୍ଚତ୍ବା ପାଇଁ ସମୟ ଧାର୍ଯ୍ୟ ହୋଇଥିବା ବେଳେ ଏହି ଟ୍ରେନ୍ ପ୍ରତ୍ୟେକ ଦିନ ୧ ଘଣ୍ଟାରୁ ଊର୍ଦ୍ଧ୍ୱ ସମୟ ବିଳମ୍ବରେ ଚାଲିବା ଓ ରାତ୍ରୀ ୮ଟା୧୫ମି.ପରେ ବାଲେଶ୍ୱରରେ ପହଞ୍ଚୁଛି। ଫଳରେ ସାଧାରଣ ଯାତ୍ରୀ ତଥା ମହିଳା ଯାତ୍ରୀମାନେ ବହୁତ ଅସୁବିଧାରେ ପଡୁଛନ୍ତି। ଏହାଛଡ଼ା ଜଳେଶ୍ୱରରୁ ବାଲେଶ୍ୱର ଯିବା ପାଇଁ ପୂର୍ବାହ୍ନ ୧୦ଟା୪୦ମି.ରୁ ଅପରାହ୍ନ ୭ଟା୫ମି. ଯାଏ କୌଣସି ଟ୍ରେନ୍ ନ ଥିବାରୁ ବାଲେଶ୍ୱର ଯିବା ପାଇଁ ଲୋକମାନଙ୍କର ବହୁତ ଅସୁବିଧା ହେଉଛି। ତେଣୁ ଏହି ଅସୁବିଧାକୁ ନଜର ଦେଇ ଯାତ୍ରୀମାନଙ୍କ ସୁବିଧା ପାଇଁ ପୂର୍ବ ସମୟ ଅନୁଯାୟୀ ଟ୍ରେନ୍କୁ ଚଲାଇବା ତଥା ପୂର୍ବାହ୍ନ ଦିନ ୧୦ଟା ୪୦ମି.ରୁ ଅପରାହ୍ନ ୭ଟା୫ମି. ମଧ୍ୟରେ ଏକ ନୂଆ ଟ୍ରେନ୍ର ବ୍ୟବସ୍ଥା କରିବା ପାଇଁ ମନ୍ତ୍ରୀଙ୍କ ନିକଟରେ ଆବେଦନ କରାଯାଇଛି। ଦାବିପତ୍ର ଏକ ନକଲ ଦକ୍ଷିଣ-ପୂର୍ବ ରେଳପଥର ଜେନେରାଲ ମ୍ୟାନେଜର, ଡିଆରଏମ୍ ଖଡ଼ଗପୁର, ଡିଆରଏମ୍ ଖୋର୍ଦ୍ଦାରୋଡ଼, ବରିଷ୍ଠ ଡିଓଏମ ଖଡ଼ଗପୁର, ଷ୍ଟେଶନ ମ୍ୟାନେଜର ବାଲେଶ୍ୱର, ଷ୍ଟେଶନ ମ୍ୟାନେଜର ଜଳେଶ୍ୱରଙ୍କ ଅବଗତି ନିମନ୍ତେ ଦିଆଯାଇଛି।
