ଭୁବନେଶ୍ୱର,୨୧।୨(ବ୍ୟୁରୋ): ବଡଗଡ ଥାନା ଅନ୍ତର୍ଗତ ବିଜେବିନଗରସ୍ଥିତ ଏକ ଆପାର୍ଟମେଣ୍ଟର ଚତୁର୍ଥ ମହଲାରୁ ଖସି ଅଷ୍ଟମଶ୍ରେଣୀ ଛାତ୍ରୀ କୃତ୍ତିକା ମିଶ୍ରଙ୍କ ରବିବାର ଅପରାହ୍ନରେ ମୃତ୍ୟୁ ଘଟିଥିଲା। ମୃତ୍ୟୁ ପୂର୍ବରୁ ଇନ୍ଷ୍ଟାଗ୍ରାମ ପୋଷ୍ଟ ଓ ମୁଣ୍ଡରେ ରହିଥିବା କିଛି ଲେଖାକୁ ନେଇ ପୂରା ଘଟଣା ରହସ୍ୟମୟ ହୋଇପଡିଥିଲା। ଇତିମଦ୍ୟରେ କୃତ୍ତିକାଙ୍କ ବ୍ୟବଚ୍ଛେଦ ରିପୋର୍ଟ ଆସିଛି। ଉକ୍ତ ରିପୋର୍ଟରେ ଏକ ଚାଞ୍ଚଲ୍ୟକର ତଥ୍ୟ ଆଉ ଏକ ରହସ୍ୟ ସୃଷ୍ଟି କରିଛି। ଆପାର୍ଟମେଣ୍ଟରୁ ଡେଇଁବା ପୂର୍ବରୁ କୃତ୍ତିକାଙ୍କ ଦେହରେ ବିଷାକ୍ତ ପ୍ରଦାର୍ଥ ରହିଥିଲା। ଯାହାକୁ ନେଇ ଏବେ ନାନା ପ୍ରଶ୍ନ ଉଠୁଛି। କୃତ୍ତିକା କ’ଣ ଆତ୍ମହତ୍ୟା କରିବା ପାଇଁ ଏକ ପ୍ରକାର ନିଷ୍ପତ୍ତି ନେଇଥିଲେ। ଯଦି ନେଇଥିଲେ ତେବେ ସେ ବିଷପିଇ ଆତ୍ମହତ୍ୟା ନ କରି କାହିଁକି ୪ ମହଲାରୁ ଡେଇଁ ମୃତ୍ୟୁକୁ ଆପଣାଇଥିଲେ? ନା କେହି ତାଙ୍କୁ ଯୋଜନାବଦ୍ଧ ଭାବେ ବିଷ ପିଆଇ ଆପାର୍ଟମେଣ୍ଟରୁ ତଳଖୁ ଠେଲି ଦେଇଛନ୍ତି? ଏଭଳି ଅନେକ ପ୍ରଶ୍ନକୁ ନେଇ ପୋଲିସ ନୂଆ କିଛି ଖୁଲାସା କରିବାକୁ ଲାଗିପଡିଛି। ତେବେ ବିଷ ସର୍ମ୍ପକରେ ଅଧିକ ଜାଣିବା ପାଇଁ ଭିସେରା ରିପୋର୍ଟକୁ ପୋଲିସ ଅପେକ୍ଷା କରିଛି। ତେଣୁ ପୋଲିସ ବିଭିନ୍ନ ଦିଗକୁ ନେଇ ପଚରାଉଚରା କରୁଛି। ପୋଲିସ କୃତ୍ତିକାଙ୍କ ସ୍କୁଲକୁ ଯାଇ ସାଙ୍ଗମାନଙ୍କୁ ପଚରାଉଚରା କରିବ ବୋଲି ଜଣାପଡିଛି।
ବଡ଼ କଥା ହେଲା ମୃତ୍ୟୁ ପୂର୍ବରୁ କୃତ୍ତିକା ଇନ୍ଷ୍ଟାଗ୍ରାମରେ ଯେଉଁ ପୋଷ୍ଟ କରିଥିଲେ ତାହା ମୃତ୍ୟୁ ପଛରେ ଅନେକ ଦିଗକୁ ଇସାରା କରୁଥିଲା। କୃତ୍ତିକା ସେଥିରେ ଲେଖିଥିଲେ ଯେ, ବାଏ ବାଏ ପିପୁଲ, ଅର୍ଥାତ ସମସ୍ତଙ୍କୁ ବିଦାୟ। ତାଙ୍କ ସହ ଚାର୍ଟ କରୁଥିବା ଜଣେ ସାଙ୍ଗ ପଚାରିଥିଲେ – କୁଆଡେ ଯାଉଛ? କୃତ୍ତିକା ଲେଖିଥଲେ-ନର୍କ ନ ହେଲେ ସ୍ବର୍ଗ। ପୁଣି ସାଙ୍ଗ ଜଣକ ପଚାରିଥିଲେ ମୋତେ ବି ସାଙ୍ଗରେ ନେଇଯାଆ। କୃତ୍ତିକା ଉତ୍ତର ଦେଇଥିଲେ-ତମକୁ ସାଙ୍ଗରେ ନେବି ନା ନାହିଁ କାଲି ତୁମେ ନିଶ୍ଚିତ ହୋଇଯିବ। ପରଦିନ ରବିବାର ଆସିଲା କୃତ୍ତିକାଙ୍କ ମୃତ୍ୟୁ ଖବର। ଅନ୍ୟପକ୍ଷରେ କୃତ୍ତିକାଙ୍କ ଇନ୍ଷ୍ଟାଗ୍ରାମ୍ ପୋଷ୍ଟକୁ ନେଇ ପୋଲିସ ଅଡୁଆରେ ପଡିଥିବାବେଳେ ଏବେ ପୋଷ୍ଟମର୍ଟମ ରିପୋର୍ଟ ମାମଲାକୁ ଅଧିକ ଜଟିଳ କରି ଦେଇଛି।
