ନୂଆଦିଲ୍ଲୀ,୮।୯: ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ଅପରାଜେୟ ସ୍ଥିତିରେ ଥିବା ଭାରତୀୟ ଦଳ ଅନେକ ପରିବର୍ତ୍ତନ ସହ ମାଞ୍ଚେଷ୍ଟର ଟେଷ୍ଟରେ ଓହ୍ଲାଇପାରେ। ଭେଟେରାନ ଭାରତୀୟ ପେସର ମହମ୍ମଦ ଶାମି ଏବେ ସମ୍ପୂର୍ଣ୍ଣ ଫିଟ୍। ଗୋଇଠି ଜନିତ ଆହତ ସମସ୍ୟାରୁ ମୁକୁଳି ସାରିଥିବାରୁ ସେ ଇଂଲଣ୍ଡ ବିପକ୍ଷ ଅନ୍ତିମ ଟେଷ୍ଟ ଲାଗି ଉପଲବ୍ଧ ରହିବେ। ଶାମି ଓ ବରିଷ୍ଠ ପେସର ଇଶାନ୍ତ ଶର୍ମାଙ୍କୁ ଓଭାଲ ଟେଷ୍ଟରୁ ବିଶ୍ରାମ ଦିଆଯାଇଥିଲା। ବୁଧବାର ଦଳର ଟ୍ରେନିଂ ସେସନରେ ଶାମି ଯୋଗ ଦେଇଥିବା ଜଣାପଡ଼ିଛି। ଶାମି ଏବେ ଫିଟ୍। ସେ ଫିଟ୍ ଅଛନ୍ତି ମାନେ ମ୍ୟାଚ୍ରେ ଖେଳିବେ ବୋଲି ବିସିସିଆଇର ଜଣେ ଅଧିକାରୀ କହିଛନ୍ତି।
୧୪ ବର୍ଷ ପରେ ଇଂଲଣ୍ଡରେ ଟେଷ୍ଟ ସିରିଜ୍ ଜିତିବାକୁ ସୁଯୋଗ ପାଇଥିବା ଟିମ୍ ଇଣ୍ଡିଆ ପାଇଁ ଦଳୀୟ ଏକାଦଶ ଚୟନ କରିବା କଷ୍ଟକର। କାରଣ ଭାରତୀୟ ବୋଲିଂର କର୍ଣ୍ଣଧାର କୁହାଯାଉଥିବା ଯଶ୍ରପୀତ ବୁମରା ଏପର୍ଯ୍ୟନ୍ତ ସିରିଜ୍ର ୭ଟି ଇନିଂସରେ ୧୫୧ ଓଭର ବୋଲିଂ କରି ସାରିଛନ୍ତି। ସେଥିରୁ ସେ ହାତେଇଛନ୍ତି ୧୮ ଉଇକେଟ। କିନ୍ତୁ କଥା ହେଲା ଆଗକୁ ଆଇପିଏଲ ଆସୁଛି ଓ ପରେ ଟି୨୦ ବିଶ୍ୱକପ୍ ଥିବାରୁ ବୁମରାଙ୍କୁ ଅନ୍ତିମ ମ୍ୟାଚ୍ରୁ ବିଶ୍ରାମ ଦିଆଯାଇପାରେ।
ଯଦି ବୁମରାଙ୍କୁ ବିଶ୍ରାମ ଦିଆଯାଏ, ତେବେ ତାଙ୍କ ସ୍ଥାନରେ ଶାମି ଖେଳିପାରନ୍ତି। ଏହାବାଦ୍ ପେସର ବିଭାଗରେ କୌଣସି ପରିବର୍ତ୍ତନ ଆଶା କରାଯାଉ ନାହିଁ। କାରଣ ମହମ୍ମଦ ସିରାଜ ଓ ଉମେଶ ଯାଦବ ଓଭାଲ ଟେଷ୍ଟରେ ୬ ଲେଖାଏ ଉଇକେଟ ନେଇଥିଲେ। ଅନ୍ୟପଟେ ଦୁଇଟି ଅର୍ଦ୍ଧଶତକ ସହ ୩ ଉଇକେଟ ନେଇଥିବା ଶାର୍ଦ୍ଦୁଳଙ୍କୁ ବାଦ୍ ଦିଆଯାଇ ପାରିବ ନାହିଁ। ବିଶେଷଜ୍ଞ ମତରେ ମାଞ୍ଚେଷ୍ଟର ପିଚ୍ ପେସରଙ୍କ ସହ ସ୍ପିନରଙ୍କୁ ମଧ୍ୟ ସୁହାଇବ। ଏହାର ଅର୍ଥ ସିରିଜ୍ରେ ଏପର୍ଯ୍ୟନ୍ତ ଖେଳି ନ ଥିବା ରବିଚନ୍ଦ୍ରନ ଅଶ୍ୱିନଙ୍କୁ ସୁଯୋଗ ମିଳିପାରେ। ତେବେ ରୋହିତ ଶର୍ମା ଓ ଚେତେଶ୍ୱର ପୂଜାରାଙ୍କ ଫିଟ୍ନେସ ସମ୍ପର୍କରେ କୌଣସି ସ୍ପଷ୍ଟ ସୂଚନା ମିଳିନାହିଁ। ରୋହିତ ଆଣ୍ଠୁରେ ଓ ପୂଜାରାଙ୍କ ଗୋଇଠିରେ ଆଘାତ ଲାଗିଥିଲା।
