ଭୁବନେଶ୍ୱର,୬ା୨(ବ୍ୟୁରୋ): ‘ମାଇଷ୍ଟିକ୍ କଳିଙ୍ଗ ଫେଷ୍ଟିଭାଲ-୨୦୨୦’ରେ ବିଶିଷ୍ଟ ସାହିତି୍ୟକ ତଥା କଥାକାର ପ୍ରଫେସର ମନୋଜ ଦାସ ଚଳିତବର୍ଷ ପାଇଁ ‘କଳିଙ୍ଗ ସାହିତ୍ୟ ସମ୍ମାନ’ ପାଇବେ। ଓଡ଼ିଶା ଡାଏରୀ ଫାଉଣ୍ଡେଶନ ଏବଂ ଓଡ଼ିଶା ଡାଏରୀ ମିଡିଆର ମିଳିତ ଉଦ୍ୟମରେ ଏହି କାର୍ଯ୍ୟକ୍ରମ ଫେବୃୟାରୀ ୮ ଓ ୯ ଦୁଇଦିନ ଧରି ସ୍ଥାନୀୟ ହୋଟେଲରେ ଆୟୋଜିତ ହେବ। ଏହି ଅବସରରେ ଦାସ ମହୋତ୍ସବର ମୁଖ୍ୟ ବିଷୟବସ୍ତୁ ‘ଦିବ୍ୟ ଆନନ୍ଦ: ଜ୍ଞାନ, ଉନ୍ମାଦ ଓ ରୂପାନ୍ତରଣ’(Divine Madness: Knowledge, Ecstasy and Transformation) ଶୀର୍ଷକ ବିଷୟ ଉପରେ ସମ୍ଭାଷଣ ପ୍ରଦାନ କରିବେ। ପଦ୍ମ ପୁରସ୍କାରପ୍ରାପ୍ତ ମନୋଜ ଦାସଙ୍କ ସମ୍ଭାଷଣ ଶୁଣିବା ସମସ୍ତ ପୁସ୍ତକ ତଥା କଳାପ୍ରେମୀଙ୍କ ପାଇଁ ଏକ ଅପୂର୍ବ ସୁଯୋଗ ବୋଲି ମାଇଷ୍ଟିକ୍ କଳିଙ୍ଗ ଫେଷ୍ଟିଭାଲ ପ୍ରତିଷ୍ଠାତା ତଥା ନିର୍ଦ୍ଦେଶକ ରଶ୍ମିରଞ୍ଜନ ପରିଡ଼ା କହିଛନ୍ତି। ଏହି ଅବସରରେ ଓଡ଼ିଆ ଭାଷା ଏବଂ ଭାରତୀୟ ଓ ବିଦେଶୀ ଭାଷାରେ କାଳଜୟୀ ସୃଷ୍ଟି ପାଇଁ ଦୁଇଟି ଭିନ୍ନ ଭିନ୍ନ ଅଲୌକିକ କଳିଙ୍ଗ ସାହିତ୍ୟ ସମ୍ମାନ ପ୍ରଦାନ କରାଯିବ। ପୁରସ୍କାର ବାବଦରେ ଏକ ଲକ୍ଷ ଟଙ୍କା, ମାନପତ୍ର ଓ ଖଦି ଉପଢୌକନ ପ୍ରଦାନ କରାଯିବ। ମହୋତ୍ସବରେ ରମାକାନ୍ତ ରଥ, ସୀତାକାନ୍ତ ମହାପାତ୍ର, ଡ. ବିଜୟାନନ୍ଦ ସିଂ, ଅଜିତ ଦାସ, ସୁବାସ ପାଣି, ଯତୀନ ନାୟକ, ପିୟୋଶୀ ବରୁଆ, ଅସିତ୍ ମହାନ୍ତି ପ୍ରମୁଖ ନିଜର ସ୍ବରଚିତ କବିତା ପାଠ କରିବେ।
ଚଳିତବର୍ଷ ଗ୍ରାମୀଣ ଓଡ଼ିଶାର ହଜିଯାଉଥିବା କିଛି ଲୋକଗୀତ ଏବଂ ବାଦ୍ୟକୁ ଫେଷ୍ଟିଭାଲରେ ପରିବେଷଣ କରାଯିବ। କେନ୍ଦେରା, ଧୁଡୁକି, ଖଞ୍ଜଣି ଆଦି ବଜାଇବା ସହ ଚକୁଳିଆ ପଣ୍ଡା ଏବଂ ପାଲା ଗାୟକଙ୍କ ପରି ଲୋକଗୀତ ପରିବେଷଣ କରୁଥିବା ପ୍ରାୟ ୨୦୦ରୁ ଊର୍ଦ୍ଧ୍ୱ ଶିଳ୍ପୀ ଏଥିରେ ଅଂଶଗ୍ରହଣ କରିବେ। ଦେଶ ତଥା ଦେଶ ବାହାରୁ ସାହିତି୍ୟକମାନେ ଯୋଗଦେବେ। ୧୦ରୁ ଊର୍ଦ୍ଧ୍ୱ ପୁସ୍ତକ ଏଠାରେ ଲୋକାର୍ପିତ ହେବ।
