ଓ୍ବାଶିଂଟନ: ଲାଲ୍ ଗ୍ରହ ମଙ୍ଗଳରେ ଅମ୍ଳଜାନ ଅଛି। ଆମେରିକୀୟ ମହାକାଶ ଗବେଷଣା ସଂସ୍ଥା (ନାସା) ଏପରି ଦାବି କରିଛି। ମଙ୍ଗଳରେ ଜୀବନ ଖୋଜୁଥିବା ନାସାର ରୋଭର କ୍ୟୁରିଓସିଟି ସେଠାକାର ବାୟୁମଣ୍ଡଳରେ ଅମ୍ଳଜାନ ଥିବା ନେଇ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଛି। ଏପରି ସୂଚନା ବୈଜ୍ଞାନିକମାନଙ୍କ ମଙ୍ଗଳରେ ଜନବସତି ସ୍ଥାପନ ସମ୍ପର୍କିତ ଗବେଷଣାକୁ ଆଉ ଗୋଟିଏ ପାଦ ଆଗକୁ ନେଇଛି।
ମଙ୍ଗଳରେ ଜୀବନ ସମ୍ଭବ କି ? ଏପରି ପ୍ରଶ୍ନକୁ ନେଇ ଏବେ ସାରା ବିଶ୍ୱବାସୀଙ୍କ ମଧ୍ୟରେ ଲାଗି ରହିଛି ଉତ୍କଣ୍ଠା। ଏପରି ସ୍ଥିତିରେ ନାସା ପକ୍ଷରୁ ୨୦୧୧ ନଭେମ୍ବର ୨୬ରୁ ଆରମ୍ଭ ହୋଇଥିବା ମଙ୍ଗଳ ମିଶନ ଏକ ବଡ଼ ସଫଳତା। ବର୍ଷର ପ୍ରାରମ୍ଭରେ ନାସା ପକ୍ଷରୁ କୁହାଯାଇଥିଲା, ମଙ୍ଗଳର ବାତାବରଣର ଉପରସ୍ତରରେ ମିଥେନ ରହିଛି। ଜୀବନର ସଞ୍ଚାର ପାଇଁ ମିଥେନକୁ ଏକ ପ୍ରମୁଖ ଉପାଦାନ ଭାବେ ଗଣନା କରାଯାଏ। ଏବେ ମଙ୍ଗଳ ପୃଷ୍ଠରେ ଅମ୍ଳଜାନ ମିଳିବା ସୂକ୍ଷ୍ମ ଜୀବଙ୍କ ଉପସ୍ଥିତିକୁ ଅଣଦେଖା କରାଯାଇ ନ ପାରେ। ଏ ସମ୍ପର୍କରେ କ୍ୟୁରିଓସିଟି ଏବେ ଅଧିକ ଗବେଷଣା ଆରମ୍ଭ କରିଛି।
ସୂଚନାଯୋଗ୍ୟ, କ୍ୟୁରିଓସିଟିର କେମେଷ୍ଟ୍ରୀ ଲାବ୍ ଗେଲ କ୍ରେଟରରେ ଥିବା ଗ୍ୟାସ୍କୁ ପରୀକ୍ଷା କରିଥିଲା। ସେଠାରେ ୯୫% କାର୍ବନ ଡାଇଅକ୍ସାଇଡ, ୨.୬% ନାଇଟ୍ରୋଜେନ, ୧.୯ % ଅର୍ଗନ, ୦.୧୬% ଅକ୍ସିଜେନ, ୦.୦୬% କାର୍ବନ ମନୋକ୍ସାଇଡ ଥିବା ଜଣାପଡ଼ିଛି। ଏହି ଗ୍ୟାସ୍ର ଅନୁପାତ ସମୟକ୍ରମେ ବଦଳୁଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସେଠାରେ ଥିବା ଅମ୍ଳଜାନ ସବୁଠାରୁ ଅଧିକ ପରିମାଣରେ ବଦଳୁଛି। ବସନ୍ତ ଏବଂ ଗ୍ରୀଷ୍ମ ସମୟରେ ଏହା ୩୦% ଯାଏ ବୃଦ୍ଧି ପାଉଛି। ଶୀତ ସମୟରେ ଏହା ପୁଣି ହ୍ରାସ ପାଉଛି। ଏପରି ପରିବର୍ତ୍ତନ ପାଇଁ କେତେକ ଭୂବୈଜ୍ଞାନିକ ପ୍ରକ୍ରିୟା ଦାୟୀ ହୋଇଥାଇପାରେ ବୋଲି ଅନୁମାନ କରାଯାଉଛି। ଏହା ଉପରୁ ଶୀଘ୍ର ପରଦା ହଟିବ ଏବଂ ଏଥିଲାଗି ପ୍ରୟାସ ଜାରି ରହିଥିବା ନାସା ପକ୍ଷରୁ ସୂଚନା ଦିଆଯାଇଛି।
