ଯାଜପୁରରୋଡ,୩୦ା୬(ନି.ପ୍ର.)- ଯାଜପୁରରୋଡସ୍ଥିତ ବ୍ୟାସନଗର ସ୍ବୟଂଶାସିତ ମହାବିଦ୍ୟାଳୟ ରାଜ୍ୟରେ ଏକ ସ୍ବତନ୍ତ୍ର ସ୍ଥାନ ଅଧିକାର କରିଛି। ବିଗତ ଦିନରେ ଏହି ମହାବିଦ୍ୟାଳୟ ଗୁଣାତ୍ମକ ଶିକ୍ଷା ଓ ପରୀକ୍ଷା ପରିଚାଳନାରେ ଉତ୍କଳ ବିଶ୍ୱବିଦ୍ୟାଳୟରେ ସୁନାମ ଅର୍ଜନ କରିଥିଲା। ଏହି ମହାବିଦ୍ୟାଳୟ ୧୯୬୬ରେ ପ୍ରତିଷ୍ଠା ହୋଇଥିଲା। ଯାଜପୁର ଜିଲା ସମେତ ଅନ୍ୟ ଜିଲାର ଛାତ୍ରୀଛାତ୍ର ଏହି ମହାବିଦ୍ୟାଳୟକୁ ଆସିଥାନ୍ତି। ଏଠାରୁ ଶିକ୍ଷା ସାରି ବହୁ ଛାତ୍ରୀଛାତ୍ର ରାଜ୍ୟ ଓ ଦେଶର ବିଭିନ୍ନ ଉଚ୍ଚ ପଦବୀରେ ଅବସ୍ଥାପିତ ହୋଇଛନ୍ତି। ହେଲେ ଗତ ୪ ବର୍ଷ ହେଲା ମହାବିଦ୍ୟାଳୟ କର୍ତ୍ତୃପକ୍ଷଙ୍କ ପରିଚାଳନା କ୍ଷେତ୍ରରେ ମନମାନୀ ଯୋଗୁ ମହାବିଦ୍ୟାଳୟରେ ଗୁଣାତ୍ମକ ଶିକ୍ଷା ଓ ଶାସନଗତ ବିଶୃଙ୍ଖଳା ଦେଖାଦେଇଛି। ଏହି ମହାବିଦ୍ୟାଳୟରେ ୮୦ ଜଣ ଅଧ୍ୟାପିକା ଅଧ୍ୟାପକଙ୍କ ଆବଶ୍ୟକ ଥିବାବେଳେ ୪୪ ଜଣ ରହିଛନ୍ତି ଓ ୩୬ ପଦବୀ ଖାଲିପଡିଛି। ଇତିହାସ ବିଭାଗରେ ୬ ଅଧ୍ୟାପକ ମଧ୍ୟରୁ ୬ଟି ପଦବୀ ଖାଲିପଡିଛି। ବାଣିଜ୍ୟ ବିଭାଗରେ ୩, ଉଦ୍ଭିଦ ବିଜ୍ଞାନରେ ୨, ପ୍ରାଣୀ ବିଜ୍ଞାନରେ ୩, ଇଂଲିଶ ବିଭାଗରେ ୬, ଓଡ଼ିଆ ବିଭାଗରେ ୩, ଶିକ୍ଷା ବିଭାଗରେ ୧, ମନସ୍ତତ୍ତ୍ୱ ବିଜ୍ଞାନ ବିଭାଗରେ ୧, ଅର୍ଥଶାସ୍ତ୍ରରେ ୨, ରାଜନୀତି ବିଜ୍ଞାନ ବିଭାଗରେ ୧, ପଦାର୍ଥ ବିଜ୍ଞାନରେ ୨, ରସାୟନ ବିଜ୍ଞାନରେ ୧ ପଦବୀ ଖାଲିପଡ଼ିଛି। ସେହିପରି ଗଣିତ ବିଭାଗରେ ୨, ତର୍କ ଓ ଦର୍ଶନଶାସ୍ତ୍ରରେ ୩ ପଦବୀ ଖାଲିପଡିଛି। ଫଳରେ ଛାତ୍ରୀଛାତ୍ର ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଅନ୍ୟପକ୍ଷରେ ଏହି ମହାବିଦ୍ୟାଳୟକୁ ୪ ବର୍ଷ ଧରି ବିଶ୍ୱବିଦ୍ୟାଳୟ ଅନୁଦାନ ପାଣ୍ଠି ମିଳିନାହିଁ। ପୂର୍ବତନ ଅଧ୍ୟକ୍ଷମାନେ ଅନୁଦାନ ପାଣ୍ଠି ଅର୍ଥ ବିନିଯୋଗ ପ୍ରମାଣପତ୍ର ଦେଇ ନ ଥିବାରୁ ଏପରି ଅବସ୍ଥା ସୃଷ୍ଟି ହୋଇଥିବା ଅଭିଯୋଗ ହୋଇଛି। ମହାବିଦ୍ୟାଳୟର ବିକାଶ ବାଧାପ୍ରାପ୍ତ ହେବା ସହ ଶ୍ରେଣୀଗୃହର ଅଭାବ ଦେଖାଦେଇଛି। ୨୦୧୯ ସୁଦ୍ଧା ସ୍ବୟଂଶାସିତ ମାନ୍ୟତା ଶେଷ ହୋଇଯାଇଥିବାରୁ ପୁନଃ ମାନ୍ୟତା ପାଇବା ପାଇଁ ଆନୁଷଙ୍ଗିକ କାଗଜପତ୍ର ଯୁଦ୍ଧକାଳୀନ ଭିତ୍ତିରେ ଚାଲୁରହିଛି ବୋଲି ଅଧ୍ୟକ୍ଷ ସୂଚନା ଦେଇଛନ୍ତି। ଏ ସମ୍ପର୍କରେ ପୁରାତନ ଛାତ୍ରସଂଘ ସଭାପତି ବିଦ୍ୟାଧର ମହାନ୍ତି କୁହନ୍ତି, ପୂର୍ବତନ ଅଧ୍ୟକ୍ଷଙ୍କ ସମୟରେ ବିଶ୍ୱବିଦ୍ୟାଳୟ ଅନୁଦାନ ପାଣ୍ଠିର ପ୍ରମାଣପତ୍ର ଠିକ୍ ସମୟରେ ଦାଖଲ ନ ହେବାରୁ ମହାବିଦ୍ୟାଳୟ ବିକାଶ ବାଧାପ୍ରାପ୍ତ ହୋଇଛି। ଏହି ଅନୁଦାନ ପାଣ୍ଠିର ତଦନ୍ତ କରାଯାଉ। କଲେଜର ଅଧ୍ୟକ୍ଷ ମେଜର ଆବୁ ତାହେଙ୍କୁ ପଚାରିବାରୁ, ଅଧ୍ୟାପକ ପଦବୀ ଖାଲି ଥିବା ଘଟଣା ଉଚ୍ଚଶିକ୍ଷା ବିଭାଗକୁ ଅବଗତ କରାଯାଇଛି। ବିଶ୍ୱବିଦ୍ୟାଳୟ ଅନୁଦାନ ପାଣ୍ଠିର ପ୍ରମାଣପତ୍ର ଦାଖଲ ପାଇଁ କାର୍ଯ୍ୟ ଚାଲୁରହିଛି ବୋଲି କହିଥିଲେ। ତୁରନ୍ତ ପଦବୀଗୁଡିକୁ ପୂରଣ କରିବା ପାଇଁ ପୁରାତନ ଛାତ୍ରସଂଘ ଓ କଲେଜର ଛାତ୍ରୀଛାତ୍ରଙ୍କ ପକ୍ଷରୁ ଦାବି କରାଯାଉଛି।
