ଛେଣ୍ଡିପଦା,୨୨।୧୧(ସ୍ବ.ପ୍ର.): ଅନୁଗୋଳ ଜିଲା ଛେଣ୍ଡିପଦା ତହସିଲ ଅନ୍ତର୍ଗତ ଜରପଡ଼ା ରାଜସ୍ବ ସର୍କଲ ଅଞ୍ଚଳରେ ସରକାରୀ ରାଜସ୍ବ ଫାଙ୍କି କିଛି ମାଫିଆ ବେଧଡ଼କ ଭାବେ ଚୋରାରେ ମୋରମ ଚାଲାଣ କରୁଛନ୍ତି। ଜାତୀୟ ରାଜପଥ ସଂପ୍ରସାରଣ କରୁଥିବା ଏକ ଠିକାସଂସ୍ଥା ପକ୍ଷରୁ ସରକାରୀ ତାଗିଦକୁ ଅମାନ୍ୟ କରିବା ସହିତ ରାଜସ୍ବ ଫାଙ୍କି ଅନୁଗୋଳ-ସମ୍ବଲପୁର ଜାତୀୟ ରାଜପଥର ସଂପ୍ରସାରଣ କାର୍ଯ୍ୟ ନିମନ୍ତେ ପ୍ରତ୍ୟେକ ଦିନ ଶହଶହ ଟ୍ରିପ୍ ମୋରମ ଚାଲାଣ କରାଯାଉଛି । କୌଣସି ଖବର ପାଇ ଛେଣ୍ଡିପଦା ତହସିଲଦାର ଗୁରୁବାର ବିଳମ୍ବିତ ରାତିରେ ଜରପଡ଼ା ପୋଲିସ ସହାୟତାରେ ଦୁର୍ଗାପୁର ନିକଟରେ ଥିବା ମୋରମ ଖଣି ଉପରେ ଚଢାଉ କରିବା ୩ଟି ହାଇୱା ଜବତ କରିଛନ୍ତି। ଉକ୍ତ ସ୍ଥାନରୁ କେତେ ପରିମାଣର ମୋରମ ଚାଲାଣ କରାଯାଇଛି ସେନେଇ ଜରପଡା ରାଜସ୍ବ ନିରୀକ୍ଷକଙ୍କ ତଦନ୍ତ ରିପୋର୍ଟ ଆସିବା ପରେ ଜରିମାନା ଆଦାୟ କରାଯିବ ବୋଲି ତହସିଲଦାର ପ୍ରକାଶ କରିଛନ୍ତି ।
ସୂଚନାଯୋଗ୍ୟ ଗତ ୧୬।୧୧।୨୦୧୯ ରିଖରେ ଶୁକ୍ରବାର ବେଆଇନ ମୋରମ ଚାଲାଣ ହେଉଥିବା ଖବର ପାଇ ଛେଣ୍ଡିପଦା ତହସିଲଦାର ଡାନିଏଲ ଏକ୍କା ଚଢାଉ କରି ହାଇୱା ଜବତ କରିବା ସହିତ ରାଜପଥ ସଂପ୍ରସାରଣ କରୁଥିବା ଠିକାସଂସ୍ଥାକୁ ଜରପଡ଼ା ରାଜସ୍ବ ନିରୀକ୍ଷକଙ୍କ ରିପୋର୍ଟକୁ ଆଧାର କରି ୫ ଲକ୍ଷ ଜରିମାନା କରାଯାଇଥିଲା। ରାଜସ୍ବ ଫାଙ୍କିବା ପାଇଁ ରାଜପଥ ଦୋହରୀକରଣ ସଂସ୍ଥା ଦିନରେ ମୋରମ ଚାଲାଣ ନ କରି ରାତିରେ କରୁଛି। ଅନ୍ୟପକ୍ଷରେ ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦିଆଯିବା ସହିତ ଆଗାମୀ ଦିନରେ ଚୋରା ବାଲି ଓ ମୋରମ ଖଣି ଉପରେ ଚଢ଼ାଉ କରାଯିବ ବୋଲି ତହସିଲଦାର କହିଛନ୍ତି।
