ଲଣ୍ଡନ, ୩୧।୫(ପି.ଟି.)- ଆୟୋଜକ ତଥା ଫେଭରାଇଟ ଇଂଲଣ୍ଡ ବୃହତ୍ ବିଜୟ ସହ ଆନ୍ତର୍ଜାତିକ କ୍ରିକେଟ କାଉନସିଲ (ଆଇସିସି) ବିଶ୍ୱକପ୍ରେ ଅଭିଯାନ ଆରମ୍ଭ କରିଛି। ଇଅନ ମୋର୍ଗାନଙ୍କ ନେତୃତ୍ୱରେ ଇଂଲଣ୍ଡ ଉଦ୍ଘାଟନୀ ମ୍ୟାଚ୍ରେ ଶକ୍ତିଶାଳୀ ଦକ୍ଷିଣ ଆଫ୍ରିକାକୁ ବୃହତ୍ ୧୦୪ ରନରେ ପରାସ୍ତ କରିଛି। ଗୁରୁବାର ସ୍ଥାନୀୟ କନିଂଟନ ଓଭାଲ ଗ୍ରାଉଣ୍ଡରେ ଟସ୍ ଜିତି ଦକ୍ଷିଣ ଆଫ୍ରିକା ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ଇଂଲଣ୍ଡ ପ୍ରାରମ୍ଭିକ ଝଟ୍କା ସତ୍ତ୍ୱେ ନିର୍ଦ୍ଧାରିତ ୫୦ ଓଭରରେ ୮ ଉଇକେଟ ହରାଇ ୩୧୧ ରନ ସଂଗ୍ରହ କରିଥିଲା। ଜବାବରେ ଦକ୍ଷିଣ ଆଫ୍ରିକା ୩୯.୫ ଓଭରରେ ୨୦୭ ରନ କରି ଅଲଆଉଟ ହୋଇ ଆତ୍ମସମର୍ପଣ କରିଥିଲା। ୧୨ ରନ ବ୍ୟୟ କରି ୨ ଉଇକେଟ ନେବା ସହ ସର୍ବାଧିକ ୮୯ ରନ (୭୯ ବଲ, ୯ ଚୌକା) କରିଥିବା ଇଂଲଣ୍ଡ ଅଲରାଉଣ୍ଡର ବେନ୍ ଷ୍ଟୋକ୍ସ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ।
୩୧୨ ରନ ଚ୍ୟାଲେଞ୍ଜିଂ ଟାର୍ଗେଟର ପିଛା କରି ଦକ୍ଷିଣ ଆଫ୍ରିକା ନିୟମିତ ଅନ୍ତରରେ ଉଇକେଟ ହରାଇଥିଲା। ଓପନର ତଥା ଉଇକେଟକିପର ବ୍ୟାଟ୍ସମ୍ୟାନ କ୍ୱିଣ୍ଟନ ଡିକକ ୬୮ ରନ (୭୪ ବଲ, ୬ ଚୌକା, ୨ ଛକା) ଓ ରାସି ଭାନ ଡେର ଡୁସେନ ୫୦ ରନ(୬୧ ବଲ, ୪ ଚୌକା, ୧ ଛକା)ର ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିବା ବେଳେ ଅନ୍ୟମାନେ ବିଫଳ ହୋଇଥିଲେ। ଆଣ୍ଡିଲ ଫେଲୁକ୍ୱାୟୋ ୨୫ ବଲରୁ ୪ ଚୌକା ସହ ୨୪ ରନ ସଂଗ୍ରହ କରିଥିଲେ। ଅନ୍ୟମାନଙ୍କ ମଧ୍ୟରେ ହାସିମ ଅମାଲା ୧୩, ଏଡେନ ମାରାକ୍ରାମ ୧୧, ଅଧିନାୟକ ଫାଫ ଡୁପ୍ଲେସି ୫, ଜେପି ଡୁମିନି ୮, ଡ୍ବେନ ପ୍ରିଟୋରିୟସ୍ ୧, କାଗିସୋ ରାବାଡ଼ା ୧୧ ଓ ଇମ୍ରାନ ତାହିର ଖାତା ଖୋଲିବା ପୂର୍ବରୁ ଆଉଟ ହୋଇଥିଲେ। ଲୁନ୍ଗି ଏନ୍ଗିଡି ୬ ରନ କରି ଅପରାଜିତ ରହିଥିଲେ। ବୋଲିଂରେ ଇଂଲଣ୍ଡ ତରଫରୁ ଜୋଫ୍ରା ଆର୍ଚର ସର୍ବାଧିକ ୩, ଲିଅମ ପ୍ଲଙ୍କେଟ ଓ ବେନ୍ ଷ୍ଟୋକ୍ସ ୨ଟି ଲେଖାଏ, ଆଦିଲ ରସିଦ ଓ ମୋଇନ ଅଲି ଗୋଟିଏ କରି ଉଇକେଟ ହାସଲ କରିଥିଲେ।
ଟସ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଇଂଲଣ୍ଡ ଆରମ୍ଭରୁ ଝଟ୍କା ଖାଇଥିଲା। ପ୍ରଥମ ଓଭରର ଦ୍ୱିତୀୟ ବଲ୍ରେ ଓପନର ଜନୀ ବେୟାରଷ୍ଟୋ ଦକ୍ଷିଣ ଆଫ୍ରିକା ଅଭିଜ୍ଞ ସ୍ପିନର ଇମ୍ରାନ ତାହିରଙ୍କ ଶିକାର ହୋଇଥିଲେ। ବେୟାରଷ୍ଟୋଙ୍କୁ ବାଦ୍ ଦେଲେ ଇଂଲଣ୍ଡ ଟପ୍ ଅର୍ଡର ୪ ବ୍ୟାଟ୍ସମ୍ୟାନ ଅର୍ଦ୍ଧଶତକ ହାସଲ କରିଥିଲେ। ଓପନର ଜାସନ ରଏ, ଜୋ ରୁଟ, ଅଧିନାୟକ ଇଅନ ମୋର୍ଗାନ ଓ ବେନ୍ ଷ୍ଟୋକ୍ସ ଦମ୍ଦାର ବ୍ୟାଟିଂ କରି ଅର୍ଦ୍ଧଶତକ ହାସଲ କରିବା ସହ ଦଳକୁ ସମ୍ମାନଜନକ ସ୍କୋର ପ୍ରଦାନ କରିଥିଲେ। ଜାସନ ୫୩ ବଲରୁ ୮ ଚୌକା ସହ ୫୪, ରୁଟ୍ ୫୯ ବଲରୁ ୫ ଚୌକା ସହ ୫୧, ମୋର୍ଗାନ ୬୦ ବଲରୁ ୪ ଚୌକା ଓ ୩ ଛକା ସହ ୫୭ ରନ କରି ଆଉଟ୍ ହୋଇଥିଲେ। ଷ୍ଟୋକ୍ସ ୭୯ ବଲରୁ ୯ ଚୌକା ସହ ଦଳ ତରଫରୁ ସର୍ବାଧିକ ୮୯ ରନ ସଂଗ୍ରହ କରିଥିଲେ। ବଡ଼ ସ୍କୋର ହାସଲ କରିଥିଲେ ମଧ୍ୟ ଦଳ କିନ୍ତୁ ନିୟମିତ ବ୍ୟବଧାନରେ ଉଇକେଟ ହରାଇଥିଲା। ଅନ୍ୟମାନଙ୍କ ମଧ୍ୟରେ ଉଇକେଟକିପର ବ୍ୟାଟ୍ସମ୍ୟାନ ଜୋସ ବଟଲର ୧୮, ମୋଇନ ଅଲି ୩, କ୍ରିସ୍ ଓ୍ବକ୍ସ ୧୩ ରନ କରି ପ୍ୟାଭିଲିୟନ ଫେରିଥିବା ବେଳେ ଲିୟମ ପ୍ଲଙ୍କେଟ ୯ ଓ ଜୋଫ୍ରା ଆର୍ଚର ୭ ରନ କରି ଅପରାଜିତ ରହିଥିଲେ। ବୋଲିଂରେ ଦକ୍ଷିଣ ଆଫ୍ରିକା ତରଫରୁ ଲୁନ୍ଗି ଏନ୍ଗିଡି ସର୍ବାଧିକ ୩, ଇମ୍ରାନ ତାହିର ଓ କାଗିସୋ ରାବାଡ଼ା ୨ଟି ଲେଖାଏ, ଆଣ୍ଡିଲ ଫେଲୁକ୍ୱାୟୋ ଗୋଟିଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଇଂଲଣ୍ଡ ୫୦ ଓଭରରେ ୩୧୧/୮
(ଷ୍ଟୋକ୍ସ- ୮୯, ମୋର୍ଗାନ- ୫୭, ଜାସନ- ୫୪, ରୁଟ- ୫୧, ଏନ୍ଗିଡି- ୩/୬୬, ତାହିର- ୨/୬୧, ରାବାଡ଼ା- ୨/୬୬ )।
ଦକ୍ଷିଣ ଆଫ୍ରିକା ୩୯.୫ ଓଭରରେ ୨୦୭ ଅଲ୍ଆଉଟ୍
(ଡିକକ- ୬୮, ଡୁସେନ- ୫୦, ଫେଲୁକ୍ୱାୟୋ- ୨୪, ଆର୍ଚର- ୩/୨୭, ପ୍ଲଙ୍କେଟ- ୨/୩୭, ଷ୍ଟୋକ୍ସ- ୨/୧୨)।
