ମୁମ୍ବାଇ,୧୮।୫- କାରବିୟାନ ପ୍ରିମିୟର ଲିଗ୍ (ସିପିଏଲ)ରେ ଖେଳିବା ପାଇଁ ଉପଲବ୍ଧ ଥିବା ଦର୍ଶାଇବା ଭାରତୀୟ ଅଲରାଉଣ୍ଡର ଇର୍ଫାନ ପଠାନଙ୍କୁ ବିଚିତ୍ର ସମସ୍ୟାର ସମ୍ମୁଖୀନ ହେବାକୁ ପଡ଼ିଛି। ବିଦେଶ ଲିଗ୍ରେ ଖେଳିବା ଲାଗି ବ୍ୟାକୁଳ ହେଉଥିବା ପଠାନ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ନିୟମ ଭଙ୍ଗ କରିଛନ୍ତି। ସେ ଏପର୍ଯ୍ୟନ୍ତ ଅନ୍ତର୍ଜାତୀୟ ଓ ପ୍ରଥମ ଶ୍ରେଣୀ କ୍ରିକେଟରୁ ଅବସର ନେଇ ନାହାନ୍ତି। ଏହାସତ୍ତ୍ୱେ ସିପିଏଲ ପାଇଁ ନାମ ପଠାଇ ଇର୍ଫାନ ଅଢ଼ୁଆରେ ପଡ଼ିଛନ୍ତି। ବିସିସିଆଇର ନିୟମ ଅନୁଯାୟୀ ଜଣେ ଖେଳାଳି ସମସ୍ତ ପ୍ରକାର ଅନ୍ତର୍ଜାତୀୟ ଓ ଘରୋଇ କ୍ରିକେଟରୁ ଅସବର ନେବା ପରେ ହିଁ ବିଦେଶୀ ଲିଗ୍ ଖେଳିପାରିବ। ପଠାନଙ୍କୁ ଗତ ଦୁଇ ବର୍ଷ ହେଲା କୌଣସି ଆଇପିଏଲ ଫ୍ରାଞ୍ଚାଇଜ କିଣୁ ନାହାନ୍ତି। ପୂର୍ବରୁ ବରୋଦା କ୍ରିକେଟର ବିସିସିଆଇର ଜଣେ ସିନିୟର ଅଫିସିଆଲଙ୍କ ସହ ପରାମର୍ଶ କରିଥିଲେ। ଏଥିରୁ ଜଣାପଡ଼ୁଛି, ଇର୍ଫାନ ଭୁଲ ପରାମର୍ଶର ଶୀକାର ହୋଇଛନ୍ତି। ଏବେ ପ୍ରଶ୍ନ ହେଉଛି, ପଠାନଙ୍କୁ ସିପିଏଲ ଡ୍ରାଫ୍ଟ ପାଇଁ ନାମ ପଠାଇବାକୁ କିଏ ପରାମର୍ଶ ଦେଇଥିଲା। ଏହାର ଉତ୍ତର ବିନୋଦ ରାଇ କିମ୍ବା ଡାଇନା ଇଡୁଲଜି ଦେଇପାରିବେ। ଉଲ୍ଲେଖଥାଉ କି, ସିପିଏଲ ଆଗାମୀ ସଂସ୍କରଣ ପାଇଁ ୫୩୬ କ୍ରିକେଟର ଉପଲବ୍ଧ ଥିବା ଦର୍ଶାଇଛନ୍ତି। ଏଥିରେ ପଠାନ କେବଳ ଏକମାତ୍ର ଭାରତୀୟ।
