ନୂଆଦିଲ୍ଲୀ, ୧୪ା୯ (ପି.ଟି.)-ଶେଷରେ ଛତିଶଗଡ଼, କର୍ନାଟକ ଏବଂ ମଧ୍ୟ ପ୍ରଦେଶ ରାଜ୍ୟ କ୍ରିକେଟ ଆସୋସିଏଶନ ପ୍ରଶାସକ କମିଟି (ସିଓଏ)ର ନିର୍ଦ୍ଦେଶ ଅନୁସାରେ ସେମାନଙ୍କ ସମ୍ବିଧାନ ସଂଶୋଧନ କରିବା ଲାଗି ନିଷ୍ପତ୍ତି ନେଇଛନ୍ତି। ଫଳରେ କେବଳ ୪ଟି ରାଜ୍ୟ ବାକି ରହିଲେ, ଯେଉଁମାନେ ଏପର୍ଯ୍ୟନ୍ତ ଲୋଧା କମିଟିର ସୁପାରିସ ଅନୁସାରେ ସମ୍ବିଧାନ ସଂଶୋଧନ କରିନାହାନ୍ତି। ଅକ୍ଟୋବର ୨୨ରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ନିର୍ବାଚନ କରାଯିବା ଲାଗି ସ୍ଥିର ହୋଇଥିବାରୁ ଏହା ପୂର୍ବରୁ ନୂଆ ସମ୍ବିଧାନ ଅନୁସାରେ ରାଜ୍ୟ ଆସୋସିଏଶନଗୁଡ଼ିକର ନିର୍ବାଚନ ହେବା ଜରୁରୀ। ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ପ୍ରଶାସକ କମିଟି ଏଥିଲାଗି ସେପ୍ଟେମ୍ବର ୨୮ ସମୟସୀମା ଧାର୍ଯ୍ୟ କରିଛନ୍ତି। ଲୋଧା କମିଟି ସୁପାରିସ ଉପରେ ବହୁ ରାଜ୍ୟ ଆସୋସିଏଶନ ବିଭିନ୍ନ ପ୍ରସଙ୍ଗ ଉପରେ ପ୍ରଶ୍ନ ଉଠାଇଥିଲେ ଏବଂ ସେ ସବୁର ଜବାବ ଚାହିଁଥିଲେ। ତାହାର ଉତ୍ତର ମଧ୍ୟ ଦିଆଯାଇଥିଲା। ସିଓଏ ମୁଖ୍ୟ ବିନୋଦ ରୟ କହିଛନ୍ତି, ଶୁକ୍ରବାର କର୍ନାଟକ, ଛତିଶଗଡ଼ ଏବଂ ମଧ୍ୟପ୍ରଦେଶ ଆମ ନିକଟକୁ ଆସି ଆଲୋଚନା କରିଛନ୍ତି। ସେମାନେ ନୂଆ ସମ୍ବିଧାନ ଗଠନ ସହ ନିର୍ବାଚନ କରାଇବାକୁ ରାଜି ହୋଇଛନ୍ତି। ଫଳରେ ଲୋଧା କମିଟି ସୁପାରିସକୁ ପାଳନ କରିବା ଲାଗି ଏପର୍ଯ୍ୟନ୍ତ ରାଜି ନ ଥିବା ରାଜ୍ୟ ଆସୋସିଏଶନ ସଂଖ୍ୟା ଏବେ ୪କୁ ଖସିଆସିଛି। ଏହି ରାଜ୍ୟଗୁଡ଼ିକ ହେଲେ ହରିୟାଣା, ତାମିଲନାଡୁ, ଉତ୍ତରାଖଣ୍ଡ ଓ ଅରୁଣାଚଳ ପ୍ରଦେଶ।
