ନୂଆଦିଲ୍ଲୀ,୧୧।୭: ସାରା ବିଶ୍ୱ ଜୁଲାଇ ୧୧କୁ ବିଶ୍ୱ ଜନସଂଖ୍ୟା ଦିବସ ଭାବେ ପାଳନ କରୁଛି। ପ୍ରଥମେ ଏହା ୧୯୮୯ରେ ଜାତିସଂଘ ବିକାଶ କାର୍ଯ୍ୟକ୍ରମର ଗର୍ଭନିଂ କାଉନସିଲ୍ ଦ୍ୱାରା ଆରମ୍ଭ କରାଯାଇଥିଲା। କୁହାଯାଏ ଜୁଲାଇ ୧୧ ୧୯୮୭ରେ ବିଶ୍ୱର ଜନସଂଖ୍ୟା ୫ଶହ କୋଟି ହୋଇ ଯାଇଥିଲା। ଏହାପରେ ଲୋକଙ୍କ ମଧ୍ୟରେ ଜନସଂଖ୍ୟାକୁ ନେଇ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଏହି ଦିବସ ପାଳନ କରାଯାଉଛି। ତେବେ ବିଶ୍ୱ ପାଇଁ ମୁଣ୍ଡବ୍ୟଥାର କାରଣ ପାଲଟିଥିଲା ଜନସଂଖ୍ୟା ବୃଦ୍ଧି। ଜାତିସଂଘର ଏକ ରିପୋର୍ଟ ଅନୁଯାୟୀ କିଛି ଦେଶର ଜନସଂଖ୍ୟା ଏପରି ବୃଦ୍ଧି ପାଇଥିଲା ଯେ ଯାହା ଖୁବ୍ଶୀଘ୍ର ୧୦ ଅରବ ଅତିକ୍ରମ କରିବା ଅନୁମାନ କରାଯାଇଥିଲା। ଏବେ ବିଶ୍ୱର ଜନସଂଖ୍ୟା ୭.୭ ଅରବରୁ ଊର୍ଦ୍ଧ୍ୱ ହୋଇଥିବା ବେଳେ ୧୦ ଅରବ ପହଞ୍ଚିବାକୁ ବେଶି ସମୟ ଲାଗିବ ନାହିଁ ବୋଲି କୁହାଯାଉଛି। ଅନ୍ୟପଟେ ଭାରତ କଥା ଯଦି ବିଚାରକୁ ନିଆଯାଏ ତେବେ ୧୯୫୧ରେ ଭାରତର ଜନସଂଖ୍ୟା ୩୬ କୋଟି ଥିବା ବେଳେ ଏବେ ଏହା ୧୩୩ କୋଟିର ପହଞ୍ଚିଲାଣି। ୨୦୧୭ ବେଳକୁ ଏହା ଚାଇନାକୁ ପଛରେ ପକାଇ ବିଶ୍ୱର ସର୍ବାଧିକ ଜନସଂଖ୍ୟା ବିଶିଷ୍ଟ ଦେଶ ହେବ ବୋଲି କୁହାଯାଉଛି। ଆଉ ଏପରି ହେଲେ ଭାରତରେ ଆର୍ଥିକ ସମସ୍ୟାଠାରୁ ଆରମ୍ଭ କରି ବିଭିନ୍ନ ସମସ୍ୟା ଦେଖାଦେବ। ଯେମିତିକି ଖାଦ୍ୟ ସମସ୍ୟା ଓ ପାଣି ସମସ୍ୟା ଉତ୍କଟ ହେବ ବୋଲି ଅନୁମାନ କରାଯାଉଛି।
