ଭଦ୍ରକ ଅଫିସ, ୧୫।୧୨- ଭଦ୍ରକ ଜିଲାରେ ଫୁଡ୍ ଓ ଟେକ୍ସଟାଇଲ ପାର୍କ ଭଳି ସରକାରୀ ଶିଳ୍ପ ପ୍ରକଳ୍ପ ବିବାଦୀୟ ପରିସ୍ଥିତି ଯୋଗୁ କାର୍ଯ୍ୟକାରୀ ହୋଇପାରୁ ନାହିଁ। ଧାମରା ବନ୍ଦରକୁ ବାଦ୍ ଦେଲେ ଜିଲାରେ ଅନ୍ୟ କୌଣସି ଶିଳ୍ପ ସଂସ୍ଥା ହୋଇପାରି ନାହିଁ। ରାଜନୈତିକ ଇଚ୍ଛାଶକ୍ତି ଅଭାବରୁ ଜିଲାରେ ନୂତନ ଜିଲା ଚିକିତ୍ସାଳୟ, ଜିଲାସ୍ତରୀୟ ଷ୍ଟାଡିୟମ, ଇଣ୍ଡୋର ଷ୍ଟାଡିୟମ୍ ଭଳି ପ୍ରକଳ୍ପ କେବଳ କାଗଜ କଲମରେ ଅଟକି ରହିଛି। ସେହିପରି ଜନଆନ୍ଦୋଳନ ମୁଣ୍ଡ ଟେକିବା ସତ୍ତ୍ୱେ ମେଡିକାଲ କଲେଜ, କୃଷି ବିଶ୍ୱବିଦ୍ୟାଳୟ ପ୍ରତିଷ୍ଠା, ଭଦ୍ରକ ମହାବିଦ୍ୟାଳୟକୁ ବିଶ୍ୱବିଦ୍ୟାଳୟ ଘୋଷଣା, ନର୍ସିଂ ସ୍କୁଲ ପ୍ରତିଷ୍ଠା ଭଳି ଦାବିକୁ ମଧ୍ୟ ଅଣଦେଖା କରାଯାଉଛି।
ଉଲ୍ଲେଖନୀୟ ଯେ, ଭଦ୍ରକ ଜିଲାରେ ଭଣ୍ଡାରିପୋଖରୀ ବ୍ଲକ ଧାମନଗର ଛକଠାରେ ଚିନିକଳ ନିର୍ମାଣ ଲାଗି ୧୯୯୫ରେ ୨୧୭ ଏକର ୭୧ ଡିସିମିଲ ଜାଗା ଅଧିଗ୍ରହଣ କରାଯାଇଥିଲା। ଚିନିକଳ ନ ହେବାରୁ ଅଧିଗୃହୀତ ଜମିରେ ଫୁଡ୍ ଓ ଟେକ୍ସଟାଇଲ ପାର୍କ ନିର୍ମାଣ ହେବ ବୋଲି ପରେ ନିଷ୍ପତ୍ତି ନିଆଯାଇଥିଲା। ଏହାମଧ୍ୟରେ ୨୪ବର୍ଷ ବିତିଥିଲେ ବି ସେଠାରେ କୌଣସି ପ୍ରକଳ୍ପ ହୋଇପାରି ନାହିଁ। ସରକାରଙ୍କୁ ଜମି ଛାଡ଼ିଥିବା ଭଣ୍ଡାରିପୋଖରୀ ବ୍ଲକ ପାହିମହୁରା, ମଞ୍ଜୁରିଗଡ଼ିଆ ଓ ହେଲପୁର ଗଁାର ଜମିହରା ଲୋକେ ଏନେଇ ବାରମ୍ବାର ଆନ୍ଦୋଳନ କରି କୌଣସି ସୁଫଳ ପାଇନାହାନ୍ତି। ସେମାନେ ଅଧିଗୃହୀତ ଜମି ଉପରେ ପାଚେରି ନିର୍ମାଣ କାର୍ଯ୍ୟକୁ ବିରୋଧ କରି ଏହାକୁ ରାତାରାତି ଭାଙ୍ଗି ପକାଇଥିଲେ। ୧୯୯୩ ରେ ଭଦ୍ରକ ନୂତନ ଜିଲା ମାନ୍ୟତା ପାଇଥିଲେ ମଧ୍ୟ ଏଯାଏ ଜିଲାସ୍ତରୀୟ ଷ୍ଟାଡିୟମ ଭଳି କେତେକ ପ୍ରକଳ୍ପ କେବଳ ପ୍ରସ୍ତାବରେ ଅଟକି ରହିଛି। ସ୍ଥାନୀୟ ନେହେରୁ ଷ୍ଟାଡିୟମ୍କୁ ଜିଲାସ୍ତରୀୟ କରାଯିବା ଉଦ୍ୟମ ଫେଲ୍ ମାରିଛି। ସେଠାରେ ମାଲିକାନା ସ୍ବତ୍ୱକୁ ନେଇ ବିବାଦ ଲାଗିଥିବାରୁ ଷ୍ଟାଡିୟମର ବିକାଶ ହୋଇପାରୁ ନାହିଁ। ଅନ୍ୟତ୍ର ଷ୍ଟାଡିୟମ ନିର୍ମାଣ ସକାଶେ ମଧ୍ୟ ବିକଳ୍ପ ସ୍ଥାନ ଚିହ୍ନଟ ହୋଇପାରୁ ନାହିଁ। ସହର ମଧ୍ୟଭାଗରେ ଥିବା ଜିଲା ଜେଲରେ ସ୍ଥାନାଭାବ ଯୋଗୁ ଅନ୍ୟତ୍ର ନୂତନ ଜେଲ ପ୍ରତିଷ୍ଠା ଯୋଜନା ହୋଇଥିଲା, ଯାହାକି ଏଯାଏ କାର୍ଯ୍ୟକାରୀ ହୋଇପାରି ନାହିଁ। ବହୁଦରଡ଼ାର ୨୦ ଏକର ଜମିରେ ଜେଲ କରାଯିବାକୁ ସ୍ଥିର ହୋଇଥିଲେ ବି ୭ ବର୍ଷ ହେଲା କାର୍ଯ୍ୟ ଅଟକି ରହିଛି। ଆବଶ୍ୟକ ଭିତ୍ତିଭୂମି ଓ ସ୍ଥାନାଭାବ ଯୋଗୁ ଭଦ୍ରକରେ ମେଡିକାଲ କଲେଜ, କୃଷି ବିଶ୍ୱବିଦ୍ୟାଳୟ ଏବଂ ନର୍ସିଂ ସ୍କୁଲ ପ୍ରତିଷ୍ଠା ଦାବିକୁ ଅଣଦେଖା କରାଯାଇ ଆସୁଛି। ଆଇନଜୀବୀ ଗଦାଧର ବଳ ତାଙ୍କ ପ୍ରତିକ୍ରିୟାରେ କହିଛନ୍ତି, ଜିଲାରେ ଶିଳ୍ପ ପ୍ରତିଷ୍ଠା ହେଉ ନ ଥିବାରୁ ବହୁ ଶ୍ରମିକ ରାଜ୍ୟ ବାହାରକୁ ଦାଦନ ଖଟି ଯିବାକୁ ବାଧ୍ୟ ହେଉଛନ୍ତି। ଜିଲାରେ ଶିଳ୍ପ ପ୍ରତିଷ୍ଠା ପାଇଁ ଜମି ଅଧିଗୃହୀତ ହୋଇ କାମରେ ଲାଗି ନ ପାରିବା ଏକ ବିଡ଼ମ୍ବନା। ରାଜନୈତିକ ଇଚ୍ଛାଶକ୍ତି ଅଭାବରୁ ଜିଲାରେ ବିକାଶ କାର୍ଯ୍ୟ ବାଧାପ୍ରାପ୍ତ ହେଉଛି ବୋଲି ଶ୍ରମିକ ନେତା ସମର ବଳ କହିଛନ୍ତି। ଅଧିଗୃହୀତ ଜମିରେ ପ୍ରସ୍ତାବିତ ଫୁଡ୍ ଓ ଟେକ୍ସଟାଇଲ ପାର୍କ ନିର୍ମାଣ ସମ୍ପର୍କରେ ଜିଲା ଅତିରିକ୍ତ ପ୍ରକଳ୍ପ ଅଧିକାରୀ ରାଜେନ୍ଦ୍ର କୁମାର ପଣ୍ଡାଙ୍କୁ ପଚାରିବାରୁ କେଉଁ କମ୍ପାନୀ ଶିଳ୍ପ ପ୍ରତିଷ୍ଠା କରିବ ତାହା ସ୍ଥିର ହୋଇପାରି ନ ଥିବାରୁ ଉକ୍ତ ଜାଗା କାମରେ ଲାଗିପାରି ନାହିଁ ବୋଲି କହିଛନ୍ତି।
