ପାଟନା,୪।୮: ବଡ଼ ବଡ଼ ରାଜନୈତିକ ଦଳକୁ ନିର୍ବାଚନ ଜିତିବାର ରଣନୀତି ଦେଉଥିବା ରାଜନୈତିକ ବିଶ୍ଳେଷକରୁ ସିଧାସଳଖ ରାଜନୀତିକୁ ପ୍ରବେଶ କରିଥିବା ଜନ ସୁରାଜ ପାର୍ଟିର ମୁଖ୍ୟ ପ୍ରଶାନ୍ତ କିଶୋର ବାଙ୍କିପୁର ବିଧାନସଭା ଉପନିର୍ବାଚନରେ ଏକ ଐତିହାସିକ ବିଜୟ ହାସଲ କରିଛନ୍ତି।
ଭାଜପାର ଜାତୀୟ ଅଧ୍ୟକ୍ଷ ନିତିନ ନବୀନ ରାଜ୍ୟ ସଭାକୁ ଯିବା ପରେ ଖାଲି ହୋଇଥିବା ଏହି ଆସନରେ ପ୍ରଶାନ୍ତ କିଶୋର ଭାଜପା ପ୍ରାର୍ଥୀ ନୀରଜ କୁମାରଙ୍କୁ ୧୯,୩୨୪ରୁ ଅଧିକ ଭୋଟରେ ପରାସ୍ତ କରିଛନ୍ତି।
ଏହି ବଡ଼ ବିଜୟ ପରେ ବର୍ତ୍ତମାନ ସବୁଠାରୁ ବଡ଼ ପ୍ରଶ୍ନ ହେଉଛି, ବିଧାୟକ ହେବା ପରେ ପ୍ରଶାନ୍ତ କିଶୋର ପ୍ରତି ମାସରେ କେତେ ଦରମା ପାଇବେ ଏବଂ ତାଙ୍କୁ କେଉଁ କେଉଁ ସରକାରୀ ସୁବିଧା ମିଳିବ।
ବିହାରର ବିଧାୟକଙ୍କୁ ମାସକୁ କେତେ ଦରମା ମିଳେ?
ବିଧାୟକ ହେବା ପରେ ସାଧାରଣତଃ ସବୁଠାରୁ ଅଧିକ ଚର୍ଚ୍ଚା ହୁଏ ତାଙ୍କ ମାସିକ ବେତନ ଓ ସୁବିଧାକୁ ନେଇ। ବିହାରରେ ଜଣେ ବିଧାୟକଙ୍କ ମୂଳ ବେତନ (ବେସିକ ପେ) ମାସକୁ ୫୦ ହଜାର ଟଙ୍କା। ତେବେ ବିଭିନ୍ନ ଭତ୍ତା ମିଶିବା ପରେ ମୋଟ ଆୟ ଅଧିକ ବଢ଼ିଯାଏ। ୫୦ ହଜାର ଟଙ୍କାର ମୂଳ ବେତନ ସହ ୫୫ ହଜାର ଟଙ୍କା ନିର୍ବାଚନୀମଣ୍ଡଳୀ ଭତ୍ତା, ୧୫ ହଜାର ଟଙ୍କା ଷ୍ଟେସନରୀ ଭତ୍ତା ଏବଂ ୪୦ ହଜାର ଟଙ୍କା ବ୍ୟକ୍ତିଗତ ସହାୟକ (ପର୍ସନାଲ ଆସିଷ୍ଟାଣ୍ଟ) ଭତ୍ତା ମିଳିଥାଏ।
ଏହା ବ୍ୟତୀତ ବିଧାନସଭା ବୈଠକରେ ଯୋଗଦେବା ପାଇଁ ପ୍ରତିଦିନ ୩ ହଜାର ଟଙ୍କା ବୈଠକ ଭତ୍ତା ଏବଂ ମାସକୁ ୨୯ ହଜାର ଟଙ୍କା ଆତିଥ୍ୟ ଭତ୍ତା ମଧ୍ୟ ପ୍ରଦାନ କରାଯାଏ। ସବୁ ଭତ୍ତାକୁ ମିଶାଇ ଜଣେ ବିଧାୟକଙ୍କ ମାସିକ ଆୟ ସହଜରେ ୧.୫ ଲକ୍ଷ ଟଙ୍କାରୁ ଅଧିକ ହୋଇଯାଏ।
ଦରମା ବ୍ୟତୀତ ବିଧାୟକମାନଙ୍କୁ ମିଳୁଥିବା ସୁବିଧା ମଧ୍ୟ କମ ନୁହେଁ। ବିହାରର ବିଧାୟକମାନଙ୍କୁ ଦେଶ ମଧ୍ୟରେ ରେଳ କିମ୍ବା ବିମାନ ଯାତ୍ରା ପାଇଁ ବାର୍ଷିକ ୪ ଲକ୍ଷ ଟଙ୍କାର ଭ୍ରମଣ ବଜେଟ ଦିଆଯାଏ। ନୂଆ ଗାଡ଼ି କିଣିବାକୁ ଚାହିଁଲେ ସରକାରଙ୍କ ପକ୍ଷରୁ ୨୫ ଲକ୍ଷ ଟଙ୍କା ପର୍ଯ୍ୟନ୍ତ ଗାଡ଼ି ଋଣ ସହଜ ସର୍ତ୍ତରେ ମିଳିଥାଏ। ଏହାଛଡ଼ା ପ୍ରତିବର୍ଷ ଭ୍ରମଣ ପାଇଁ ଅତିରିକ୍ତ ୧ ଲକ୍ଷ ଟଙ୍କା ମଧ୍ୟ ପ୍ରଦାନ କରାଯାଏ। ବିହାରର ରାଜଧାନୀ ପାଟନାରେ ବିଧାୟକମାନଙ୍କୁ ରହିବା ପାଇଁ ସରକାରୀ ବାସଭବନ ଯୋଗାଇ ଦିଆଯାଏ। ଏହା ସହ ବିଦ୍ୟୁତ, ପାଣି ଏବଂ ଟେଲିଫୋନ ବିଲରେ ସମ୍ପୂର୍ଣ୍ଣ ଛାଡ଼ ସୁବିଧା ମଧ୍ୟ ମିଳିଥାଏ। ସୁରକ୍ଷା ଦୃଷ୍ଟିରୁ ବିଧାୟକମାନଙ୍କ ସହ ସବୁବେଳେ ପୋଲିସ ସୁରକ୍ଷାକର୍ମୀ ନିୟୋଜିତ ରହନ୍ତି। ଅସୁସ୍ଥତା କିମ୍ବା ଚିକିତ୍ସାର ଆବଶ୍ୟକତା ହେଲେ ବିଧାୟକ ଏବଂ ତାଙ୍କ ପରିବାର ସଦସ୍ୟମାନେ ସରକାରୀ ହସ୍ପିଟାଲରେ ସମ୍ପୂର୍ଣ୍ଣ ମାଗଣା କିମ୍ବା ଅତ୍ୟନ୍ତ ରିହାତି ଦରରେ ଚିକିତ୍ସା ସୁବିଧା ପାଇବାର ଅଧିକାର ରଖନ୍ତି।
