ପାଟଣାଗଡ଼,୨୧।୬(ଡି.ଏନ୍.ଏ.): ଗତ ୫ ତାରିଖରେ ଗମ୍ଭାରୀ ଗ୍ରାମଠାରେ ନିମ୍ନମାନର ରାସ୍ତାକାମକୁ ନେଇ ପାଟଣାଗଡ଼ ବିଧାୟକ ସରୋଜ ମେହେର ପୂର୍ତ୍ତ ବିଭାଗ ଜେଇଙ୍କୁ ଉଠ୍ବସ୍ କରିଥିବା ଘଟଣାରେ ବିଧାୟକଙ୍କ ନାମରେ ଆଟ୍ରୋସିଟି ମାମଲା ରୁଜୁ ହୋଇଥିଲା। ଜିଲା ଆଦିବାସି କଲ୍ୟାଣ ସଂଘ ପକ୍ଷରୁ ବିଧାୟକଙ୍କ ଗିରଫ ଦାବି ଜୋର ଧରିଥିବା ବେଳେ ଶୁକ୍ରବାର ପାଟଣାଗଡ଼ ଓବିସି ମଞ୍ଚ ପକ୍ଷରୁ ବିଧାୟକଙ୍କ ଉପରୁ ଆଟ୍ରୋସିଟି ଆଇନ ପ୍ରତ୍ୟାହାର ପାଇଁ ପାଟଣାଗଡ଼ ଥାନା ଘେରାଉ ହୋଇଛି। ଓବିସି ମଞ୍ଚର କର୍ମକର୍ତ୍ତା ସ୍ଥାନୀୟ ଭୋଳାନାଥ କଲ୍ୟାଣ ମଣ୍ଡପରୁ ଏକ ବିଶାଳ ରାଲିରେ ବାହାରି ପାଟଣାଗଡ଼ ଥାନାରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଥିଲେ। ପରେ ବଲାଙ୍ଗୀର ଅତରିକ୍ତ ଆରକ୍ଷୀ ଅଧୀକ୍ଷକ ସୁବାସ ଜମାଦାରଙ୍କ ସହିତ ଆଲୋଚନା କରି ତାଙ୍କୁ ଦାବି ଜଣାଇଥିଲେ ଏବଂ ଏହାର ନିରପେକ୍ଷ ତଦନ୍ତ କରାଯାଉ ବୋଲି ଦାବି କରିଥିଲେ।
ଏଥିରେ ଓବିସି ମଞ୍ଚ ସଂଯୋଜକ ପ୍ରକାଶ ଭୋଇ, ମଞ୍ଚର ଯତି ପଧାନ, ଗୋପ ମେହେର, ଦିଲୀପ ମେହେର ଲକ୍ଷେଘର ଗଣ୍ଡା ସମାଜର ସଭ୍ୟାସଭ୍ୟ, ଯୁବ ଆଦିବାସୀ ସଂଘର ସଭ୍ୟାସଭ୍ୟ ଉପସ୍ଥିତ ଥିଲେ।
