ରାସଗୋବିନ୍ଦପୁର,୯।୧(ଡି.ଏନ୍.ଏ.): ମୟୂରଭଞ୍ଜ ଜିଲା ରାସଗୋବିନ୍ଦପୁର ଥାନା ଅଧୀନ ମୂଷାମାରୀ ବାଲିଖାଦାନ ନିକଟ ବାଲି ଷ୍ଟକ୍ ଥିବା ପାର୍ଶ୍ୱରୁ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଛି। ମୃତକ ହେଲେ ମୂଷାମାରୀ ଗ୍ରାମର ମିଣ୍ଟୁ ତରେଇ। ମିଣ୍ଟୁଙ୍କୁ ହତ୍ୟା କରାଯାଇଥିବା ପରିବାରଲୋକେ ଅଭିଯୋଗ କରିଛନ୍ତି। ପୋଲିସ ଘଟଣାର ତଦନ୍ତ ଜାରି ରଖିଛି।
ସୂଚନାନୁଯାୟୀ, ମିଣ୍ଟୁ ଦୀର୍ଘଦିନ ଧରି ଉକ୍ତ ବାଲିଖାଦାନକୁ ବିରୋଧ କରି ଆସୁଥିଲେ। ସକାଳେ ତାଙ୍କ ମୃତଦେହ ବାଲି ଗଚ୍ଛିତ ଥିବା ସ୍ଥାନରେ ପଡ଼ି ରହିଥିବା ଦେଖାଯାଇଥିଲା। ମିଣ୍ଟୁଙ୍କୁ ହତ୍ୟା କରାଯାଇଥିବା ଅଭିଯୋଗ କରି ଗ୍ରାମବାସୀ ଓ ପରିବାରବର୍ଗ ମୃତଦେହକୁ ଧରି ରାସଗୋବିନ୍ଦପୁର-ବାରିପଦା ମୁଖ୍ୟରାସ୍ତା ମୂଷାମାରୀ ଛକରେ ଅବରୋଧ କରିଥିଲେ। ଫଳରେ ରାସଗୋବିନ୍ଦପୁର ଓ ବାରିପଦା ମଧ୍ୟରେ ଯାତାୟାତ ଠପ୍ ହୋଇପଡ଼ିଥିଲା। ଘଟଣାସ୍ଥଳରେ ରାସଗୋବିନ୍ଦପୁର ଅତିରିକ୍ତ ତହସିଲଦାର ପ୍ରଭାତ କୁମାର ମହାପାତ୍ର, ରାସଗୋବିନ୍ଦପୁର ଥାନା ଆଇଆଇସି କେ.ସି. ପଲେଇ ପ୍ରମୁଖ ଉପସ୍ଥିତ ରହି ଲୋକଙ୍କୁ ବୁଝାଶୁଝା କରିଥିଲେ। ପରେ ପୋଲିସ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପ୍ରତିଶ୍ରୁତି ଦେବା ପରେ ରାସ୍ତାରୋକୋ ହଟିଥିବା ଜଣାପଡ଼ିଛି।
