ଲାଠୋର, ୮ା୬ (ଡି.ଏନ.ଏ): ସରକାର ଭୂମିହୀନମାନକୁ ବସୁନ୍ଧରା ଯୋଜନାରେ ସାମିଲ କରି ୪ ଡିସିମିଲ ଘରଡିହ ଯୁଗେଇ ଦେଉଛନ୍। ହେଲେ ବିଭାଗୀୟ ଅଧ୍କାରୀମାନକର ଖାମଖିଆଲି ମନଭାବ ଲାଗି ଅନେକ ଭୂମିହୀନ ଘରଡିହ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପ୍ରାଖୋଲ ତହସିଲ ଅଧୀନ ଲାଠୋର ବନ୍ଧପଡ଼ଡାରେ।
ସୂଚନା ଅନ୍ସାରେ ଲାଠୋର ବନ୍ଧପଡ଼ାର ଅନେକ ଗରିବ ଭୂମିହୀନ ପରିବାର ବସୁନ୍ଧରା ଯୋଜନାରେ ଆବେଦନ କରି ନିରାଶ ହେଇଛନ୍। ଇ ପରିବାରମାନେ ଗୋଚର, ଜଲଚର ଜାଗାରେ ଛୁଟିଆ କୁରିଆଟେ ଲେଖେଁ କରି ମୁଡ୍ ଗୁଁଜିଥିବାର ପଡ଼ାର ପ୍ରହଲ୍ଲାଦ ସେଠ, ଶଶି ହଂସ, ଦୁର୍ଗା ହଂସ, କମଳ ବିଶି, ରଞ୍ଜିତ ବିଶି, କୃଷ୍ଣ ପାତ୍ର, ସନ୍ୟାସୀ ପାତ୍ର, ଡିଙ୍ଗର ବାଗ, ପରକ୍ଷିତ ବାଗ ପରମୁଖ ଅଭିଯୋଗ କରିଛନ୍। ଗଲା ୫୦ ବଛର୍ରୁ ଅଧ୍କା ହେବା ଇ ପରିବାରମାନେ ଲାଠୋର ବଁଧ୍ ପାସେ ଥିବାର ଗୋଚର ଆର ଜଲଚର ଜାଗାରେ କୁରିଆଟେ ଲେଖେଁ କରି କୁଟୁମବସିଆ ମୁଡ଼ ଗୁଁଜୁଛନ୍। ପେସାରେ ଇମାନେ ହେମାଲି ଆଏ। ଫିଦିନ ହେମାଲି କାମ୍ରୁ ଯାହା ରୁଜଗାର କରୁଛନ୍ ସେଥ୍ରେ ତାକର ପରିବାର ଚଲୁଛେ। ଇ ପରିବାରମାନେ ନିହାତି ଗରିବ୍ ହେଇଥିଲାବେଲେ ଜମି ଘିନି ଘର ତିଆରିବାର ତାକତ୍ ନଁାଇଁନ। ଆଏବାର ଦିନେ ଇ ଗରିବ ପରିବାରମାନେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଏବାର ଆଶ୍ ଅଛେ। ହେଲେ ଜାଗାଠାନ୍ ଅଭାବୁ ଇମାନେ କେନ୍ଠାନେ ଘର ବନାବେ ସେ ଚିନ୍ତାରେ ରହିଛନ୍। ବାରବାର ଲାଠୋର ରାଜସ୍ବ ନିରୀକ୍ଷକଁର ଅଫିସ ସଂଗେ ଯୋଗାଯୋଗ ରଖୁଥିଲେ ବି କେହେନ୍ସି ପରକାର ଉପକାର ନାଇଁ ମିଲୁଥିବାର ସେମାନେ ଅଭିଯୋଗ କରିଛନ୍। ଇ ସମସିଆଟା ଖାଲି ଲାଠୋର ବନ୍ଧପଡ଼ାରେ ଦେଖାଦେଇଛେ ସେଟା ନୁହେ, ଲାଠୋର ଅଂଚଲର ଅନେକ ଗଁାରେ ଗରିବ୍ ଭୂମିହୀନମାନେ ଏନ୍ତା ସମସିଆରେ ଛଁଦି ହେଇ ରହିଛନ୍। ଇ ବାବ୍ଦେ ଖପ୍ରାଖୋଲ ତହସିଲଦାର ନିରଞ୍ଜନ ନାଏକକୁଁ ପଚରାଲାରୁ ପଡ଼ାକେ ପରିଦରଶନରେ ଯିମି, ଘଟନାର ତଦଁତ କରି ସରକାରୀ ହିସାବେ ଅଧିବାସୀମାନକୁ ଜମି ଯୁଗେଇ ଦେବାର ଦିଗେ ପଦକ୍ଷେପ ନିଆଯିବା ବଲି ସେ କହିଥିଲେ।
