ଚମ୍ପୁଆ,୧୭ା୭(ଡି.ଏନ.ଏ.)-ଚମ୍ପୁଆରେ ସ୍ବାଭାବିକ ବର୍ଷା ହେଉ ନ ଥିବାରୁ ଧାନତଳି ନଷ୍ଟ ହେବାକୁ ବସିଥିବା ବେଳେ ଚାଷୀଙ୍କ ଚିନ୍ତା ବଢିବାରେ ଲାଗିଛି। ମୌସୁମୀ ବର୍ଷାକୁ ଅପେକ୍ଷା କରି ରହିଥିବା ଚାଷୀ ଶେଷରେ ଲଘୁଚାପ ବର୍ଷାକୁ ଅନେଇ ବସିରହିଥିଲେ ମଧ୍ୟ ବର୍ଷାର ଦେଖା ନାହଁ। ଫଳରେ ଧାନକ୍ଷେତ ଫାଟି ଆଁ କରୁଥିବା ବେଳେ ତଳି ଶୁଖିବା ଆରମ୍ଭ ହେଲାଣି। ସୂଚନା ଅନୁସାରେ ଚମ୍ପୁଆ କୃଷିଜିଲାରେ ଏଥର ସ୍ବାଭାବିକ ବର୍ଷା ହୋଇନାହଁ। ଫଳରେ ଚାଷ ନିମନ୍ତେ ରଖାଯାଇଥିବା ଟାର୍ଗେଟ ପୂରଣ ହେବା ନେଇ ସନ୍ଦେହ ଦେଖାଦେଇଛି। ଚମ୍ପୁଆ ବ୍ଲକରେ ଚଳିତ ଋତୁରେ ଧାନ ୧୪୨୦୦ ହେକ୍ଟର ଓ ଅଣଧାନକୁ ମିଶାଇ ୨୨୩୪୦ ହେକ୍ଟର ଟାର୍ଗେଟ ରହିଥିବାବେଳେ ଧାନ ୩୬୭୪ ହେକ୍ଟର ଓ ଅଣଧାନକୁ ମିଶାଇ ୬୦୫୯ ହେକ୍ଟର କରାଯାଇପାରିଛି ଏବଂ ୭୨୦ ହେକ୍ଟର ତଳି ପକାଯାଇଛି। ଝୁମ୍ପୁରା ବ୍ଲକରେ ଧାନ ୧୮୫୫୫ ହେକ୍ଟର ଓ ଅଣଧାନକୁ ମିଶାଇ ୨୪୬୩୦ ହେକ୍ଟର ଟାର୍ଗେଟ ରହିଥିବା ବେଳେ ମାତ୍ର ଧାନ ୪୯୯୩ ହେକ୍ଟର କରାଯାଇଛ ଏବଂ୧୧୧୭ହେକ୍ଟର ତଳି ପକାଯାଇଛି। ସେହିପରି ଯୋଡା ବ୍ଲକରେ ଧାନ ୮୨୬୦ ହେକ୍ଟର ଓ ଅଣଧାନକୁ ମିଶାଇ ୧୪୨୮୫ ହେକ୍ଟର ଟାର୍ଗେଟ ଥିବାବେଳେ ଧାନ ୧୩୦୦ ହେକ୍ଟର କରାଯାଇଛି ଏବଂ ୭୫୦ ହେକ୍ଟର ତଳି ପକାଯାଇଛି। ବର୍ଷା ଅଭାବରୁ ବିଲ ଶୁଖର ଫାଟି ଯାଉଥିବା ବେଳେ ତଳିଗୁଡିକ ଝାଉଁଳିବା ଆରମ୍ଭ ହେଲାଣି। ବର୍ଷା ବିହୁନେ ଚାଷୀ ଆତଙ୍କିତ ହୋଇ ଚିନ୍ତାଗ୍ରସ୍ତ ହୋଇଥିବା ବେଳେ ଚାଷପାଇଁ କରିଥିବା ଖର୍ଚ୍ଚ ପାଇବ କି ନାହଁ ତାହା ଏବେ ସନ୍ଧିହିନ ହୋଇପଡିଛି। ଏନେଇ ଜିଲା କୃଷି ଅଧିକାରୀ ଗଜେନ୍ଦ୍ରନାଥ ଗୋଛାୟତଙ୍କୁ ପଚାରିବାରୁ ବର୍ଷା ନହେବା ଫଳରେ ଏହି ପରିସ୍ଥିତି ଉପୁଜିଛି। ଆଗକୁ ୨ଦିନ ମଧ୍ୟରେ ବର୍ଷା ନ ହେଲେ ତଳି ନଷ୍ଟ ହେବାର ସମ୍ଭାବନା ଅଧିକ ହେବବୋଲି ସୂଚନା ଦେଇଛନ୍ତି।
