ମୁମ୍ବାଇ,୭।୧: ଜବାହରଲାଲ ନେହେରୁ ୟୁନିଭର୍ସିଟିରେ ଦେଖାଯାଇଥିବା ଛାତ୍ର ଅଶାନ୍ତିକୁ ନେଇ ମୁମ୍ବାଇର ଗେଟ୍ ଓ୍ବେ ଅଫ୍ ଇଣ୍ଡିଆରେ ସୋମବାର ବିରୋଧ ପ୍ରଦର୍ଶନ କରାଯାଇଥିଲା। ମଙ୍ଗଳବାର ସେଠାରେ ‘ଫ୍ରି କଶ୍ମୀର’ ପୋଷ୍ଟର ଦେଖିବା ପରେ ଏବେ ଏହାକୁ ନେଇ ରାଜନୀତି ଆରମ୍ଭ ହୋଇଯାଇଛି। ଏହାକୁ ନେଇ ଶିବସେନା ନେତା ସଞ୍ଜୟ ରାଉତ କହିଛନ୍ତି ଯଦି କୌଣସି ବ୍ୟକ୍ତି କଶ୍ମୀରକୁ ଭାରତଠାରୁ ଅଲଗା କରିବା କଥା କୁହନ୍ତି ତେବେ ତାହା ବରଦାସ୍ତ କରାଯିବ ନାହିଁ। ସେ କହିଛନ୍ତି ଏହି ପୋଷ୍ଟରର ଉଦ୍ଦେଶ୍ୟ ହେଉଛି କଶ୍ମୀରରେ ମୋବାଇଲ ଓ ଇଣ୍ଟରନେଟ୍ ସେବାକୁ ନେଇ ଥିବା ପ୍ରତିବନ୍ଧକ। ଏକ ଖବରକାଗଜରେ ପ୍ରକାଶିତ ଖବରରୁ ସଞ୍ଜୟ ଜାଣିବାକୁ ପାଇଛନ୍ତି କି କଶ୍ମୀରରେ ମୋବାଇଲ ଓ ଇଣ୍ଟରନେଟ୍ ସେବାକୁ ନେଇ ଥିବା ପ୍ରତିବନ୍ଧକକୁ ହଟାଇବାକୁ ଦର୍ଶାଇ ଏମାନେ ‘ଫ୍ରି କଶ୍ମୀର’ ପୋଷ୍ଟର ପ୍ରଦର୍ଶନ କରିଛନ୍ତି। ଏହାପରେ ଭାରତୀୟ ଜନତା ପାର୍ଟି(ଭାଜପା)ସଞ୍ଜୟଙ୍କୁ ଟାର୍ଗେଟ କରି କହିଛି ସେ କୁଆଡେ ଏବେ କଂଗ୍ରେସ ଭାଷାରେ କଥା ହେଉଛନ୍ତି। ଅନ୍ୟପଟେ ‘ଫ୍ରି କଶ୍ମୀର’ ପୋଷ୍ଟରକୁ ନେଇ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପା ନେତା ଦେବେନ୍ଦ୍ର ଫଡନବିସ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଏହାର ଜବାବ ମାଗିଛନ୍ତି।
