ନୂଆଗାଁ,୧।୭(ଡି.ଏନ୍.ଏ.): ଗରିବ ଲୋକଙ୍କ ଜୀବନ କଚ୍ଚା ଚାଳ ଘରେ ବିତୁଥିବାବେଳେ ସରକାରଙ୍କ ଆବାସ ଯୋଜନାରେ ପକ୍କା ଘରଟିଏ ପାଇବା ପାଇଁ ଅନେକେ ସ୍ବପ୍ନ ଦେଖିଥାନ୍ତି। କିନ୍ତୁ ଯୋଜନା ଠିକ୍ ଭାବେ କାର୍ଯ୍ୟକାରୀ ହେଉ ନ ଥିବାରୁ ଆବାସ ଯୋଜନାର ସଫଳ ରୂପାୟନ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ବାସ୍ତବ ହିତାଧିକାରୀମାନେ ପକ୍କାଘର ପାଇବା ପାଇଁ ବିକଳ ହେଉଥିବାବେଳେ ନୟାଗଡ଼ ଜିଲା ନୂଆଗାଁ ବ୍ଲକରୁ ଫେରିଯିବାକୁ ବସିଛି ପ୍ରାୟ ୧୩୦୦ରୁ ଊର୍ଦ୍ଧ୍ୱ ଆବାସ ଗୃହ। ସମସ୍ତଙ୍କୁ ପକ୍କା ଘରଟିଏ ଯୋଗାଇ ଦେବା ପାଇଁ ସରକାର ପ୍ରତିଶ୍ରୁତି ଦେଇଥିବାବେଳେ ଯୋଜନାରୁ ଅନେକ ହିତାଧିକାରୀ ଏବେ ବାଦ ପଡ଼ିବାକୁ ଯାଉଥିବାରୁ ଅସନ୍ତୋଷ ସୃଷ୍ଟି ହୋଇଛି। ନୂଆଗାଁ ବ୍ଲକରୁ ପ୍ରାପ୍ତ ତଥ୍ୟ ଅନୁସାରେ, ୨୦୧୧ ମସିହା ସର୍ଭେ ଅନୁସାରେ ନୂଆଗାଁ ବ୍ଲକର ୨୨ ପଞ୍ଚାୟତ ପାଇଁ ୨୮୨୯ ଗୋଟି ଆବାସ ଗୃହ ଯୋଗାଇ ଦିଆଯାଇଛି । ଏହା ଜାଣିବା ପରେ ଗୃହହୀନ ଲୋକେ ଘର ପାଇବା ନେଇ ଅନେକ ଆଶା ବାନ୍ଧିଥିଲେ । କିନ୍ତୁୁ ସେଥିରୁ ପ୍ରାୟ ୧୩୦୦ରୁ ଊର୍ଦ୍ଧ୍ୱ ଆବାସ ଅନୁଦାନ ଫେରିଯିବ ବୋଲି ଶୁଣିବା ପରେ ସେମାନଙ୍କ ଆଶା ମଉଳିଯାଇଛି । ହରିଜନଙ୍କ ପାଇଁ ୯୨୨, ଆଦିବାସୀଙ୍କ ପାଇଁ ୬୫୦ ଓ ସାଧାରଣବର୍ଗଙ୍କ ପାଇଁ ୧୨୫୭ ଆବାସ ସଂରକ୍ଷିତ ରହିଛି । ବର୍ତ୍ତମାନ ଏହି ବ୍ଲକରେ ସାଧାରଣ ବର୍ଗ ଅପେକ୍ଷା ଦଳିତ ଓ ଆଦିବାସୀମାନେ ଅଧିକ ଗୃହହୀନ ଥିବାବେଳେ ସେମାନଙ୍କ ପାଇଁ କମ୍ ଆବାସ ଗୃହ ସଂରକ୍ଷିତ ରହିଛି । ୨୦୧୧ ମସିହାର ସର୍ଭେ ଅନୁସାରେ ଦଳିତ ଓ ଆଦିବାସୀ ଲୋକଙ୍କୁ ଗୃହହୀନ ଦର୍ଶାଯାଇ ନ ଥିବାରୁ ବର୍ତ୍ତମାନର ଏହି ଗୃହହୀନ ଲୋକଙ୍କୁ ଆବାସ ଯୋଜନାରେ ସାମିଲ କରିବା ସମ୍ଭବ ହେଉ ନ ଥିବା କହିଛନ୍ତି ନୂଆଗାଁ ବିଡିଓ ଶିରିୟାଲ ଶୁଭ୍ର ପଟେଲ। ସର୍ଭେ ରିପୋର୍ଟରେ ଆବଶ୍ୟକ ସଂଖ୍ୟକ ହିତାଧିକାରୀ ନ ଥିବାରୁ କାର୍ଯ୍ୟାଦେଶ ଫେରିଯିବାକୁ ବସିଛି। ଏହି ବ୍ଲକର ବହୁ ପଞ୍ଚାୟତ ଆଦିବାସୀ ଅଧ୍ୟୁଷିତ ହୋଇଥିବାବେଳେ ଅନେକ ଗୃହହୀନ ଗରିବ ଅଛନ୍ତି । ସେ ହେଲେ କାପ୍ତାପଲ୍ଲୀ ପଞ୍ଚାୟତସ୍ଥ ବାମୁରି ଗ୍ରାମର ବିଶ୍ୱନାଥ ଜାନି। ବିଶ୍ୱନାଥ ସ୍ତ୍ରୀ କମଳା, ବିବାହିତା ଝିଅ ରାଜଲକ୍ଷ୍ମୀ ଓ ନାତୁଣୀକୁ ଧରି ଏକ କଚ୍ଚା ଘରେ ରହୁଥିବା ସତ୍ତ୍ୱେ ଆବାସ ଯୋଜନାରୁ ବଞ୍ଚତ୍ତ ହୋଇଛନ୍ତିି। ସେହିପରି ଶାବୁରୀ ଜାନି, ଚନ୍ଦ୍ରମଣୀ ଜାନି ମଧ୍ୟ ବାସ୍ତବରେ ପକ୍କାଗୃହ ପାଇବା ଯୋଗ୍ୟ ହେବା ସତ୍ତ୍ୱେ ହିତାଧିକାରୀ ତାଲିକାରୁ ବଞ୍ଚତ୍ତ ହୋଇଛନ୍ତି। ତେବେ ଏଭଳି ସମସ୍ୟାର ସମାଧାନ ପାଇଁ ତାଲିକାରେ ନାମ ଥିବା ଦଳିତ, ଆଦିବାସୀଙ୍କ ପାଇଁ ଆବାସ ଗୃହର ନିଅଣ୍ଟ ହେଲେ ନୂଆଗାଁ ବ୍ଲକସ୍ଥ ପଞ୍ଚାୟତସ୍ତରୀୟ ସଂରକ୍ଷିତ ଆବାସକୁ ଅବଳବଦଳ କରାଯାଇ ପାରିବ ବୋଲି ବିଡିଓ ପଟେଲ କହିଛନ୍ତି।
