ଫାଇନାନ୍ସ କମ୍ପାନୀ କର୍ମଚାରୀଙ୍କଠାରୁ ୭.୨୮ ଲକ୍ଷ ଲୁଟ୍‌
10:10 amMay 27, 2023 / 08

ଖୋର୍ଦ୍ଧା ଅଫିସ,୨୭ା୫: ଗତ କିଛିଦିନର ନୀରବତା ପରେ ଖୋର୍ଦ୍ଧାରେ ପୁଣି ମାତିଛନ୍ତି ଲୁଟେରା। ଏମାନଙ୍କ ଟାର୍ଗେଟରେ ରହିଛନ୍ତି ଫାଇନାନ୍ସ କମ୍ପାନୀ ଏଜେଣ୍ଟ। ଶୁକ୍ରବାର ଅପରାହ୍ନ ୩ଟା ୩୦ରେ ଆଦର୍ଶ ଥାନା ସାମନ୍ତରାପୁର ବୁଡ଼ିବଗିଚା ଛକରୁ ଦୁଇଜଣ ବ୍ଲାକ୍‌ ପଲ୍‌ସରଧାରୀ ଫାଇନାନ୍ସ କମ୍ପାନୀ କର୍ମଚାରୀଙ୍କଠାରୁ ୭ ଲକ୍ଷ ୨୮ ହଜାର ଟଙ୍କା ଲୁଟିନେଇ ଫେରାର ହୋଇଯାଇଛନ୍ତି। ପୋଲିସ ପହଞ୍ଚି ନିକଟ ଦୋକାନରେ ସିସିଟିଭି ଫୁଟେଜ୍‌ ଯାଞ୍ଚ କରିଛି। ଲୁଟ୍‌ ସମୟର ଦୃଶ୍ୟ କଏଦ ହୋଇଥିବା ଜଣାପଡ଼ିଛି। ଅନ୍ୟପଟେ କମ୍ପାନୀ ମ୍ୟାନେଜରଙ୍କ ଅଭିଯୋଗକ୍ରମେ ପୋଲିସ ତଦନ୍ତ ଆରମ୍ଭ କରିଛି।
ମୁତାବକ, ନବୀନାବାଗସ୍ଥିତ ଏକ ଘରୋଇ ଫାଇନାନ୍ସ କମ୍ପାନୀର ଦୁଇ କର୍ମଚାରୀ ବ୍ୟାଗ୍‌ରେ ୭ ଲକ୍ଷ ୨୮ହଜାର ଟଙ୍କା ନେଇ ବ୍ୟାଙ୍କ୍‌ ଅଫ୍‌ ଇଣ୍ଡିଆ ଶାଖାରେ ଜମା କରିବା ଲାଗି ବାଇକ୍‌ରେ ଯାଉଥିଲେ। ଏହି ସମୟରେ ପଛପଟୁ ସେମାନଙ୍କୁ ପିଛା କରିଥିଲେ ଦୁଇ ବ୍ଲାକ୍‌ ପଲ୍‌ସରଧାରୀ ଯୁବକ। ଚାଳକ ଲାଲ୍‌ରଙ୍ଗର ଟୋପି ଏବଂ ପଛରେ ବସିଥିବା ଯୁବକ ଧଳାରଙ୍ଗର ଟୋପି ପରିଧାନ କରିଥିଲେ। ରାସ୍ତା ଶୂନ୍‌ଶାନ୍‌ର ସୁଯୋଗ ନେଇ ପଲ୍‌ସର ପଛରେ ବସିଥିବା ଯୁବକ ଜଣକ ଟଙ୍କା ଭର୍ତ୍ତି ବ୍ୟାଗ୍‌ ଝାମ୍ପିଥିଲେ। ଫଳରେ ଫାଇନାନ୍ସ କର୍ମଚାରୀ ବାଇକ୍‌ରୁ ଖସିପଡ଼ିଥିଲେ। ପରେ ପଲ୍‌ସରଧାରୀ ଯୁବକ ତାଙ୍କ ବ୍ୟାଗ୍‌ ଝାମ୍ପିନେଇ ପଳାଇବା ବେଳେ ଫାଇନାନ୍ସ କର୍ମଚାରୀ ସେମାନଙ୍କ ପିଛା କରିଥିଲେ ମଧ୍ୟ ଧରିପାରି ନ ଥିଲେ। ଲୁଟେରାଦ୍ୱୟ ଖୋର୍ଦ୍ଧା ଟାଉନ ଅଭିମୁଖେ ଦ୍ରୁତଗତିରେ ପଳାଇଥିଲେ। ଏନେଇ କମ୍ପାନୀ ମ୍ୟାନେଜର ଥାନାରେ ଅଭିଯୋଗ କରିଥିଲେ। ଘଟଣାର ତଦନ୍ତ ଜାରି ରହିଛି ବୋଲି ପୋଲିସ କହିଛି।